Февралень 25-це чистэ Владимир Чибиркинэнь прявтсо ютавтовсь Мордовия Республикань Государственной Собраниянь сисемеце тердемань ведьгемень сисемеце сессиясь. Сонзэ важодемасонть ульнесть Мордовиянь Прявтось Артем Здунов, региононь Правительствань, Мордовия Республикань Прявтонь ды Мордовия Республикань Правительствань Администрациянь члентнэ, министерстватнень ды ведомстватнень руководительтне, муниципальной районтнэнь прявттнэ. Депутаттнэ ваннызь промксонь повесткань 16 кевкстематнень.
Кунсолозь Мордовиянь Правительствань тевтеемань невтевкстнэде эрьва иень пачтямось.
Правительствань Председателесь Батыр Эмеев евтнесь депутаттнэнень 2025 иестэ республикань экономикань ды социальной сферань виевгавтомань невтевкстнэде. Нежедькс теезь национальной проекттнэнь ды региональной программатнень топавтомаст лангс.
Батыр Эмеев евтась сюкпря депутаттнэнень вейсэнь лезэв важодеманть кисэ.
Мордовиянь бюджетс совавтозь зярыя полавтомат.
2026 иентень республикань бюджетэнь доходтнэнь покшолмась покшолгавтозь 325 млн целковойтнес аволь налогонь доходтнэнь коряс арсевиця аравтлувтнень кемекстамонть кувалма. Тень ловозь, истя жо ярмактнень кадовкстнэнь вельде, конат апак нолда 2025 иестэ, кастовить килангонь тевтееманть лангс ютавтоматне; эрямо таркатнень явомась; эйкакштнень оймсемаст ды шумбрачист витемась; местной бюджеттнэнень ярмаконь лезксэнь явомась; лембень пачтямонь объекттнэнь витнемась; образованиянь ды од ломанень политикань коряс мероприятиятнес, истя жо социальной эрявикс лия кевкстематнень витемантень.
Кемекстазь полавтоматнень мельсэ кирдезь, 2026 иестэ республикань бюджетэнь доходтнэнь покшолмась карми 79 млрд 623 млн целковойть, расходтнэнь покшолмась – 79 млрд 427 млн целковойть.
Кемекстазь налогонь од льготат бизнесэнть туртов.
Примазь «Об установлении налоговых ставок при применении упрощенной системы налогообложения» Мордовия Республикань Законось, конась тешксты УСН-сэ важодиця предпринимательтнень туртов льготань максомань условиятнень.
Истя жо ней сы шкань аватненень ды декретэнь отпусксо улицятненень мереви получамс юридической лезкс питневтеме.
Келейгавтозь эрицятнень категориясь, кинь ули праваст саемс моданть питневтеме.
Полавтомат совавтозь модань отношениятнень коряс Мордовия Республикань башка законтнэс. Питневтеме модань явомань правась ней тевс нолдави специальной военной операциянь участниктненень, конат казезь Иневанькс Георгиень орденсэ – Георгиень крестсо, истя жо сынст семиятненень.
Мордовия Республикань зярыя законтнэ теезь федеральной законодательстванть коряс.