Россиянь Президентэсь 2024 иенть яволявтызе Кудораськень иекс. Тешкстасынек, сехте сюпав ды уцяскав ломанекс ловови се, конань ули семиязо. Семиясь эрьва ломаненть туртов – те кеме неже. Эрямонь стакачитнень каршо цидярдомга ломанесь вишка пингестэ саезь ды меельце чис амольди семиястонть вийть.
– Семиясь монь туртов – те кутьмере удало кавто сёлмот. Малавиксэнь лован Пазонть пельде сехте питней казнекс, – тешксты ламо эйкакшонь триця авась Мария Владимировна Исакова.
Мария Владимировнань чачома-касома тарказо – Орданьбуень райононь Тургенева посёлкась. Тесэ авась ютавтызе эйкакш пингензэ. Тиринь посёлкасо эрямось пек вечкевсь тейтерьканть туртов, ансяк школанть прядомадо мейле седеезэнзэ чачсь мель варштамс ды эсензэ лангсо варчамс лия ошонь эрямонть. Ды истя Мария сыргась тонавтнеме Московов. Тосо, Н. Нестерова лемсэ Московонь академиянь юридической факультетсэ, тейтерьканть ушодовсь студентэнь эрямось. Ламо од мельть, кенярксто пешксе чить ды вадря ялгат казсь тейтеренть туртов те шкась. Ансяк сон эзь маряво кода ютась… Мерят, ливтязь ливтясь ды седеентень кадсь лембе ледстнемат. Тонавтнеманть прядомадо мейле Мария зярыя иеть важодсь «Тоннель – 2001» ООО-нь хозяйствань отделсэ микшницякс. Отпусконь ютавтомо свал сакшнось тиринь Тургенева посёлкав. Ды вана весть истямо самсто сонзэ седеезэнзэ вачкодсь вечкемась.
– Сергей мирдем марто вейке-вейкеде содылинек эштё эйкакш пингестэ. Тонавтнинек вейке школасо, ансяк параллельной классо. Сестэ тонавтницятнеде ульнесть байтяк. Переменасто сельметне весе эйкакштнень а неилизь, секскак минь мартонзо эзинек вастовкшно-кортнекшне. Мон прядынь кевейкее класст, Сергей – вейксэ. 9-це классонть прядомадо мейле тетянзо-аванзо марто сон тусь эрямо Тольятти ошов. Од цёрась эрьва кизэ сакшныль Тургеневав бабанстэнь инжекс. 2008 иень кизэстэнть минь вастовинек мартонзо. Школанть прядомадо мейле те ульнесь васенцеде. А сёпан, вечкемань сяткось седеезэнек кирвазсь вейке-вейке лангс васень варштавкссто. Ды се шкастонть саезь минь эзинек явовкшно ве чискак. Зярсыя яжинек прянок, кода улемс. Сон тосо, мон тесэ, явомс зярыя шкас меленек арасель. Ды прынек ве мельс – туемс Московов. Иень ютазь налксинек свадьба. Свадьбань чистэнть минь ванкшнынек Московонь весе достопримечательносттнень, – мельспаросо ёвтни Мария Владимировна.
Ансяк од ломантнень мельс а пек тукшнось Московонь шалныця эрямось. Ды сынь 2011 иестэ мекев велявтсть тиринь Тургеневав. Тесэ чачсь васенце эйкакшост – Елизавета, шкань ютазь, 2013 иестэ – Леонид цёраст, седе тов, 2019 иестэ – веженсесь Алиса.
– Моньгак, мирдемгак эйкакш пингестэ саезь ульнесь покш меленек – чачтомс-кастомс ламо эйкакшт, эдь минь кавонек касынек покш семиясо, монь авань – сисем сазоронзо-ялаксонзо, истя жо ававтоньгак. Секскак вишкинестэ саезь уш седейсэнек раштась ды кемекстась те мелесь. Од тейтерекс свал кевкстнилинь эсь прям, кодамо ёжозо аванть, конань ламо эйкакшонзо?! Истят аватне свал марявсть тень пек сюпавокс. Ды зярдо варчия те ёжонть эсень лангсо, чарькодинь, кодамо те уцяскав ёжось, – корты Мария.
Мариянь ды Владимирэнь Пазось казинзе эйкакшсо колмоксть, мейсэ пек кенярдовтынзе од ломантнень. Нама, трямс-кастомс колмо эйкакшт – а шожда тевесь, ансяк мирдть-нить а ацирьгалить, мекевлангт, бажить невтемс пример лия семиятнень туртов, кодамо те вадря, зярдо тонь чачить ламо эйдеть.
– А сёпан, лован прям пек уцяскавокс – монь колмо тякинень, мон колмоксть аван. Покш мельспаро сайнесамам, зярдо колмо эйдень пшкадить тень эсест чевте вайгельсэст – авай, – мизолдозь корты Мария Владимировна.
Эряви меремс, Исаковтнень покш семиясонть эрьванть ули эсензэ вечкевикс тевезэ. Юткошкасто, конась истямо семиясо эрси пек чуросто, Мария Владимировна вечки ловномо духовной литература ды викшнеме, мирдезэ жо калонь кундсеме. Лиза тейтерест уроктнень прядовомадо мейле эрьва чистэ яки налксеме волейболсо, сонензэ пек вечкеви спортонь те ёнксось, лиясто яви мель викшнемантень. Лёня цёрынькаст вишка шкасто саезь яки музыкальной школав, машты налксеме баянсо ды ниле струнань гитарасо – укулелесэ. Сехте вишкинесь, Алиса, зярс яки эйдень кужов. Семиясонть колмо эйкакшт ды эрьвась вейке-вейке ёнов а молиця. Тетяст-аваст бажить сынст тонавтомс эрямо эсест превсэ, улемс алкуксонь ломанекс, конась свал анок венстемс кедь лезксэнь вешицянтень.
Неень шкасто Мария ды Сергей Исаковтне важодить эсест тиринь посёлкасо. Авась топавты посёлкань администрациясо специалистэнь тев, мирдезэ важоди ЖКХ-со. Мирдть-нить эсест эрямост лангс а пеняцить, нама, сынсткак, кода весеньгак, эрсить талномат-ацирьгалемат, ансяк Исаковтне кемить, мезе илязо лисе эрямонь кинть лангсо, весементь цидярдсызь, эдь зярдо ули истямо покш ды кеме неже, конань лемезэ – семия, сынь изнясызь весе стакачитнень.
Алена Артемьева