Меельце шкасто кенярдовты се тевесь – од ломантне седе сеедьстэ кармасть явомо мель Интернетсэ тиринь кельсэ сайтонь, лопань, каналонь, ве валсо, блогонь ветямонтень. Минек республикасояк улить истят эряза тейтерть-церат. Сынст ютксо – эрзянь мазыйкась Анастасия Юсупова-Вдовина, конась вети «Валскень тештине» каналонть.
Тейтересь чачсь-кассь Дубенка велесэ. Тетязо-авазо – эрзянь ломанть, эрить ды важодить тиринь районсо. Настя уш ветеце ие эри Саранскойсэ. Сон – Н.П. Огарев лемсэ МГУ-нь социологиянь факультетэнь студентка. Неень шкасто тонавтни магистратурасо, седе тов бажи важодемс социологокс. Сон ансяк аволь умок кармась кортамо тиринь эрзянь кельсэ, теде икеле ансяк чарькодилизе сонзэ. Кода тешксты минек героинясь, эйкакш пингестэ мартонзо кортасть рузонь кельсэ. Малавиксэнзэ пельсть, ошсо эрямсто тейтерест карми виздеме эрзянь акцентэнзэ кувалма. Истят тевть вастневить ламот районтнэсэ. Ней, саемга, велень ламот школатнесэ эрзянь келесь ветяви кода факультатив. Маласо шкасто, паряк, теяк а кадови. Ацирьгавты, мезе учомс седе тов, бути неень шкань од ломантне весе кармить виздеме кортамо тиринь кельсэ? Арсян, тень каршо эряви бороцямс. Ды васняяк тетятненень-аватненень, кинь эйкакшост молить тиринь кельсэ кортамонть каршо.
– Школасо тонавтнемстэ покш мель явинь эсь кудораськень генеалогической чувтонь тонавтнемантень. Истя, карминь содамо, монь покштятне-бабатне сисемеце поколенияс эрзянь ломанельть. Тень кувалма аштян покш каштанчисэ, – евтни Анастасия.
Университетсэ тонавтнемстэ тейтересь лиссь мирденень татаронь цера экшс. Лия раськень семиясо эрямсто Анастасия неизе, кодамо мель путови тиринь келенть, койтнень-кирдатнень ванстомантень ды вечкемантень. Истя сон арсезевсь, зярдо-бути мирдензэ марто сынст чачить эйкакшост, конатне кармить содамо рузонь ды татаронь кельтнень, а кода жо эрзянсесь? Неть арсематне кармавтызьгак ушодомс тонавтнеме покштянь-бабань келенть.
– Тень коряс пшкадинь Интернетэнтень. Теевинь содавиксэкс Александр Учеваткин марто, кона тердимим эсензэ «ВКонтакте» социальной сетьсэ «Кортамо кудо» эрзянь келень тонавтнемань клубонтень. Тосо кортамотне ютавтовить онлайн вельде. Мельспаросо тонавтнетяно теориянть, ветятано практической занятиятнень, конатнень шкасто моратанояк. Лиясто ловнотано «Мастораванть» эли кодамояк эрзянь сермадыцянть валморонзо. Ве валсо – тонавтнемань программась мельстуиця ды лезэнь кандыця. Меельце шкастонть мон ков седе парсте карминь кортамо тиринь кельсэ, мезесь пек кенярдовты ды лезды вечкевикс тевсэнь – эрзянь кельсэ каналонь ветямосонть, – корты тейтересь.
Васняяк «Валскень тештине» каналонть Анастасия ветясь мокшонь тейтерь марто вейсэ. Секе-тев лиснесть эрзянь ды мокшонь кельсэ сермадовкст. Шкань ютазь сон кармась ветямо каналонть ськамонзо.
Эряви меремс, неень шкане каналонть контентэзэ мельстуиця, смустев. Анастасия бажи содавтомс ловныцянзо-ваныцянзо эрзянь-мокшонь раськенть культуранзо ды историянзо марто. Тейтересь евтни койтнеде-кирдатнеде, оршамопельтнеде, раськень мазылгавтоматнеде. Лиясто натой путни видеот, косо пиди-пани эрзянь ярсамопельть эли моры тиринь кельсэ морот. Аволь умок сон ютавтызе рузонь содавикс моронть эрзянь кельс ды путызе эсензэ каналозонзо. Кода тешксты Анастасия, ломантненень мельс тусь ютавтозь каверэсь. Маласо шкасто тейтересь тагояк арси ютавтомс кодамояк моро.
Кода кортыть, ероков ломанесь ероков эрьва мейсэ. Неть валтнэ пек ладить Анастасиянень. Меельце колмо иетнень перть тейтересь тейни раськень мазылгавтомат. Те тевенть сон ушодызе а мезень теемадо. Варчась теемс човалясто кирьгань мазылгавтомат, тевезэ лиссь. Седе тов кармась тейнеме черень мазылгавтомат – пулокерть, рузкс тенст мерить накосникть. Умонь шкатнестэ эрзятнень культурасо пулокертнень кандтнесть од тейтерькатне. Историянь максоматнень коряс, тейтересь мирденень лисемадо икеле максылизе черень мазылгавтоманзо аванстэнь, седе тов те пулокересь казевиль вишка сазорканзо туртов. Мокшонь культурасо жо – пулокеренть кандтнесть ансяк мирдень кедьсэ аватне. Черень истямо мазылгавтомась вастневи лия раськетненьгак. Теде башка, Анастасия тейни сюлгамот, прясуреть, пилекст ды брелокт. Тевс нолды човалят, викшнема суреть, кшнинь ярмакт ды кумпрят (руз. ракушка) . Весе эрявиксэнть рамси онлайн-лавкасто. А вана кшнинь ярмактнень казинзе тензэ покштязо. Сындест Настянь колмо литрань суликань банка, сынст пельнемга тейтересь рамась аволь покш бормашина. Кевкстеманть лангс, кода те машинанть важодеманзо лангс ваныть шабрасо эрицятне, Анастасия пейдезевсь ды мерсь: «Сынь уш умок тонадсть те гайтентень, содыть, мон – ломанесь творческой». Весе важодевкстнэнь фототнень Анастасия путни «Валскень тештине» каналонтень. Кинь ули мелезэ, совадо кедьчелькев тейтеренть курос – эсь ерокчисэнзэ дивавттадызь.
Алена Артемьева
Фототне Анастасия Юсуповань-Вдовинань.