Вторник, марта 19, 2024
Важное

Мельстуиця конкурст яволявтокшность Од иеденть икеле Финнэнь-угрань раськетнень культурань Равчирень куншкакурось (прявтось – Екатерина Модина) ды Республикань Раськень творчествань кудось (прявтось – Татьяна Сидоркина).



Васенцесэнть пелькстамонь участниктне анокстасть Од иень этно-налкшкеть, конатнес совавтсть эрзянь ды мокшонь раськень викшневкст, тешкст, артовкст. Мордовиянь эрицятне весемезэ кандсть 53 теевкст. Мезе тесэ ансяк арасель: някат, налкшкеть, сыця иень тешкст-нумолот, викшнезь понань кемть ды варьгат, ловонь бабинеть, кескавнеть ды натой куз ало чувтосто керсезь ды ашосто артозь келей сюро марто сярдо. Налкшкетне теезельть чувтосто, човалясто, конёвсто, ревень понасто, сёвоньстэ, коцтсто, понань сурестэ... А уш мазычист а ёвтавитькак! Эрзятнень-мокшотнень раськень тюссот, ашосо-якстересэ цивтёрдыцят-кувтолдыцят.

Равчирень куншкакуросто неть налкшкетне понгавтнезельть Республикань краеведениянь музеень ЭтноКузонть лангс ды лиссь алкуксонь ёвксонь чувто. «ЭтноКузонть» панжицякс кармасть раськень Якшаматясь ды Важодиця авась. Сынь арсесть пурнавозтненень содамоёвкст-валмеревкст, шнызь весе кедьчелькевтнень, конатне невтизь эсь ёрокчист те пелькстамосонть. Теде мейле Республикань краеведениянь музеень инжетненень поздоров марто пшкадсь МР-нь Культурань, раськень политикань ды архивной тевень министрань васенце полавтыцясь Александр Губанищев.

– Течи тесэ пурназь лиятнень ёнов а молиця кенярксчи. Маряви, мазылгавтозь кузось – те Од иень свалшкань тешкс. Те иестэнть «Россиянь Кузт» федеральной проектэнть юрсо Мордовия Республикась истя жо кармась сонзэ участникекс ды нолдась эсь республикань проект – «ЭтноКузось эрьва кудос», – мерсь Александр Губанищев. – Мейсэ сонзэ явовиксчись? Сеньсэ, те проектэнть юрсо эрьва мазылгавтозь кузось а моли лиятнень ёнов, сон индивидуальной, кодамо лиясто костояк а нетядо. Неть кузтнэнь лангсо налкшкетне ды мазылгавтомапельтне теезь кедьчелькевтнень кедьвийсэ. Ды омбоце истямо налкшке косояк арась. Эряви ёвтамс, пелькстамонь участникекс кармасть малав ветесядт кедьчелькев ломанть.
Жюринтень пек стакаль кочкамс изницятнень. Кода тешкстызе Равчирень куншкакуронь пелькстамонь координаторось Татьяна Моталина, вейкеяк участникесь эзь кадово казневтеме, эрьвантень электронной почтанть вельде кучовсть сертификатт. Весемезэ кочказельть кемгавтово изницят. «Сехте вадря этно-налкшке» номинациясонть изницякс кармасть Саранск ошонь 97-це № эйдень кужов якицятне Егор Егоркин ды Михаил Галкин, Саранск ошонь «Непоседы» эйдень кужо» ЧДОУ-в якицясь Маргарита Кузнецова, Краснослободской райононь «Центр культуры» МБУ-нь эйкакшонь искусствань школасо тонавтыцятне Светлана Воронская ды Владимир Кудашкин, Саранск ошонь 90-це № эйдень кужов якицясь Аскар Бикмурзин ды лиятне.

Республикань раськень творчествань кудонь конкурссонть невтезельть кедьчелькев ломантнень теевксэст, конатне кучозельть республикань весе районтнэстэ ды Саранск ошсто «ЭтноКузось эрьва кудос» конкурсонтень. Участникекс кармасть малав весе культурной учреждениятнесэ важодиця чувтосто керсицятне, викшницятне, кодыцятне, артыцятне. Сынст теемс, нама, эряволь этно-стильсэ. Сехте мазый, редявикс, лия ёнов а молиця этноаксессуартнэ, конатнень кочкизь эксперттнэ, истя жо саезельть И. Д. Воронин лемсэ Республикань краеведениянь музеень покш кузонть мазылгавтомс.

«ЭтноКузось эрьва кудос» пелькстамосонть III-це степенень дипломсо казевсь Наталья Парамонова (Ромодановань районось), II-це степенень дипломось максовсь Юлия Тростинанень (Лямбирень районось). I-це степенень дипломсо казевсть Ицялонь муниципальной райононь «Центр культуры» МБУ-нь И. П. Кривошеев лемсэ эйкакшонь библиотекань важодицятне. Сынь тешкставсть «Оригинальная техника исполнения в новогодней игрушке» номинациясонть.

Фототне
Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».