Сон юты июнень 19-це чистэ саезь 24-це чис. Проектэнть топавтыцятне Равчирень финно- угрань раськетнень культурань центрась, субсидияттнень вельде,конатне явозь Мордовиянь Минкультнацонть пельде. Те проектэсь эрьва иестэ ютавтови сень кисэ, штобу кемекстамс вейсэнь кортамотнень культуратнень, кельтнень, койтнень-кирдатнень ванстомань ды виевгавтомань, Россиянь ламонациянь раськетнень вейсладямотнень коряс.

«Федор Достоевский» теплоходсонть тедедень маршрутось юты Равчирень Саратов – Волгоград – Астрахань – Никольское оштнень вакска. Фестивальсэнть кармить важодеме зярыя регионтнэстэ наукань ды образованиянь, культурань ды спортонь роботникть, тиринь келень тонавтыцят, СМИ-нь сотрудникть, НКО-нь представительть: Мордовиядо башка Татарстансто, Чувашиясто, Башкортостансто, Московсто, Ульяновской, Пензань, Самарань, Саратовань областтнестэ.

Фестиваленть программасо – проектэнь презентацият, семинарт, дискуссият, экскурсият, концертт. РФ-нь духовно-нравственной ды культурной сюпавчитнень лангс ванозь ды нежедезь, участниктне кармить кортамо тиринь кельтнень, культуратнень, лия ёнов а молиця койтнень-кирдатнень ванстомадо, национальной каштанчинть кастомадо.
Экспедициясь ушодовсь Саратовань пристаньстэ. Мордовиясто делегациянть вастызь тесэнь региононь прявттнэ, мокшонь ды эрзянь диаспорань ,"Шумбрат" национально-культурной автономиянь представительтне. Вейсэнь концерттэнть ды паронь арсематнеде мейле теплоходось макссь гудок туемадо. Уцяскав ки тенть , "Равось- ояксчинь лей"!
Весе читнень тынк туртов этноэкспедициясонть важоди минек прявт редакторось Марина Девятова