Вторник, марта 19, 2024
Важное
Шкась ливти, варштамо а кенерят. Эштё аволь умок республикань велень хозяйстватнесэ мольсь сюронь видемась, ней вана уш сынст урядамо шкась сась. Течинь чине сюронь нуемась моли малав весе районтнэсэ.
Тедеде Мордовиянь аграрийтненень эряви урядамс 464 тёжат гектарт сюро (те ансяк видьмекст, кукурузанть апак лово). Неень шкасто эрьва гектарсто саеви косо-бути 28,3 центнерт.

Кода ламот лиятнеяк, нуеманть шкастонзо ушодызь Ромоданова ёнксонь «Агрофирма Трофимовщинское» ООО-сонть, кона сови «АПО Элеком» ОАО-нть юрс. Неть читнестэ минь ульнинек хозяйствасонть ды эсь сельмсэ неинек, кодамо алкукс «пси» шка, ды аволь ансяк пертьпельксэнть коряс, ушодовсь аграрийтнень туртов.

– Течи хозяйствасонть тевтне лаказь лакить. Ушодовсь сюронь нуемась, – ёвтни «Агрофирма Трофимовщинское» ООО-нь управляющеесь Сергей Жуков. – Паксятнес лисинек медьковонь 14-це чистэ. Васняяк ушодынек пиякс шужонть нуеме. Сондензэ видезь тёжадо ламо гектарт. Шужось уш кенерсь вадрясто, секскак бажатано пурнамс сонзэ седе куроксто. Вейке гектарсто саеви 27 центнерт. Нама, учинек седе ламо, ансяк шкась пек пси, сюронть аламодо костизе. Пивсэмстэ важоди кевейкее комбайна, вететне эйстэст – ДОН-т ды эштё кото – ACROS 530. Неть комбайнатне эсенек, Россиянь. Комбайнёртнэ сынст шныть. Истя жо нуезь шужонть усксить комсь автомашинат, зярыя эсенек, лиятне сиведезь. Весемезэ шужонть урядамосо важодить малав ниленьгемень ломанть.

Пивсэзесь сеске ускови «АПО Элеком» ОАО-нь элеваторс. Эряви меремс, шужонть коряс хозяйствась кемекстась договор Саранск ошонь пиянь пидиця заводонть марто. Истя, 500 гектартнэстэ шужось юты сыненст. Лиясь жо кадови хозяйствантень.

Кода ёвтнесь агрофирмань агрономось Михаил Бурлаков, шуждонть башка Трофимовщинань хозяйствасонть видезь 230 гектарт яровой товзюро, 540 – озимой товзюро, 230 гектарт кснав, 1,5 тёжат гектарт ламбамо якстерькай, 300 гектарт кукуруза, конань эйстэ 100 гектартнэ – сюрокс.

– Шужось кенерсь парсте, сюрось коське. Летькесь эйсэнзэ ансяк 8,8 %, – корты Михаил Бурлаков. – Минь васня ушодынек аволь озимойтнестэ, а шужонть нуемасто, вана эштё аламос ды сюрось карми певереме. Ушосонть пек пси, секскак шканть а таргсетяно, роботатано эрязасто. Арсеви, кеменьшка чинь перть шужось нуеви.
Сюронь пивсэмань тевтнеде кортамсто, агрономось ледстинзе комбайнатненьгак ды сынст руль экшсэ важодицятненьгак.

– Тевтне эдь парсте молить сестэ, зярдо техникасонть важоди алкуксонь специалист, – корты Михаил Николаевич. – Комбайнёртнэнь свал кочкатано весеме ёндо анокстазь. Улить истят комбайнёронок, конат эйкакш порасто саезь нуить сюро. Эдь сынь чачсть ды кассть велесэ. Весемесь моли тосто!

Комбайнань жаткась – теке ёроков парикмахерэнь машинкась, саи тусто паксятнестэ шужонь прятнень. Сюрось туи вейксэ тоннас бункерс, паксяс жо кадови ансяк олгось. Ды теяк а кувать, вант, сонзэяк уш пурнасызь. Телесь кувака, весемесь маштови.

«Дон-1500Б» комбайнань руленть экшсэ важоди Евгений Ивлиев. Цёрась сонсь Ромодановань, роботы жо Трофимовщинасо. Сон сюронь нуемасо уш ветеце ие, лия шкастонть жо роботы хозяйствасонть механизаторокс.

– Сюронь нуема шкась – а стувтовикс шка. Сонзэ иень перть учат, – корты комбайнёрось. – Зярдо урожаесь паро, седееть кеци ды пурнамс сонзэ покш мельспаро. Ды зярдо ванат пивсэзь сюронть лангс, кенярдат, эдь тесэ ули тонь путовксоткак.

Велень хозяйствасо Евгений Ивлиев важоди уш аволь аламо иеть, колхозонь тевтнес кундась сеске школанть прядомадо мейле. Васень шкасто важодсь ансяк трактористэкс, мейле арсизе варчамс лия техниканть.

– Минек тесэ кувать роботась Николай Никитин. Эсь шкасто сон ульнесь отрядонь прявтокс ды тонавтсь од комбайнёртнэнь. Моненьгак прась уцяска сонзэ кедьсэ тонавтнемс, – корты Евгений Ивлиев. – Цёрась сон ульнесь дока, техникас парсте чарькодиця. Толковась весементь пек парсте. Покш сюкпря тензэ тонавтоманть кисэ.
Ды, эряви меремс, комбайнёронь тевенть цёрась тонавтнизе а беряньстэ, тонавтыцянть кемеманзо эзинзе кола ды теевсь паро специалистэкс. Пивсэме лисемань васенце чистэнть уш, валскень 11 чассто саезь чокшнень 7 часос, сонзэ комбайнась нусь 11 бункер шуж.
Истя жо комбайнёрокс «Агрофирма Трофимовщинское» ООО-сонть важоди Сергей Желтов. Сон Ромодановань, велень хозяйствасо роботы малав весе эрямонзо перть. Важодсь Ромодановань «Маяк» совхозсо, «Ромодановосахар» заводсо, «АПО Элеком» ОАО-со. Трофимовщинань хозяйствасонть важоди трактористэкс. Тунда – видемат, мейле – тикшень анокстамот, вант, уш сы шка паксятнень сокамс-видемс. Телень перть фермасо тевть ды техникань витнема-петнема. Ней жо, омбоце ие, сюронь нуема шкастонть топавты эштё комбайнёронь тевенть.

– Тракторонь руль экшсэ иензэ перть важодят, мелеськак моли, – пейди механизаторось. – Эряви лиясто эсь ёрокчинть варчнемс мейсэяк одсо. Истя, ютазь иестэ озакшнынь комбайнас ды тевень мольсть а беряньстэ. Мелезэнь тусь. Секскак тедеде уш кодаткак кавтолдомат ды пелемат арасельть. Натой учинь сюронь нуемань шканть.

«Агрофирма Трофимовщинское» ООО-со важодицятне а пеняцить кодамояк стакачи лангс. Виде, важодеманть тесэ, кода республикань велень хозяйствань лия предприятиятнесэяк, ушодыть рана валске ды прядокшныть позда чокшне. Шкась ней истямо. Зярс пертьпельксэсь ашти лембе ды сэтьме, сюронть кенерема нуеме. Туить пиземеть, весе тевесь лотки. А эдь кшись – минек прявт сюпавчинек!

Юлия Еремина
https://sun9-28.userapi.com/impg/s_GeGmuHLSgnXAZk-9DuS20lTEycElx8iCYZTg/ai_WyALZQ_I.jpg?size=320x240&quality=96&sign=c721afafa8338a82290e6ecc859d99d6&type=album");">

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».