Четверг, декабря 08, 2022
Важное


«ООО МАПО и К» ТНВ велень хозяйствань организациясонть (прявтось Н. В. Ютяев) зярыя отделеният: Пятинасо, Вишка Березниксэ, Кочуновасо (Ромодановань район) ды Эрьмезёнкасо (Чаунзань район). Кода лия районтнэсэяк, тесэ ушодсть сюротнень пивсэме. Сась иень сехте пси шкась. Весе вийтне алтавить паксянь нуемантень.


Кочуновасо минь вастовкшнынек отделениянь роботыцятнень марто. Кода тесэ моли важодемась, миненек ёвтнесь управляющеесь С. Н. САБАЕВ.

– Минек хозяйствась касты сюрот-тикшеть, трятано ракшат. Кирдтяно КРС-нь 1600 прят, сынст ютксо потявтовиця 400 скалт, улить букат. Эрьва чи сайтяно малав 10 тоннат ловсо. Усктано сонзэ Саранскоень консервной заводов.
– Зяро моданк, Сергей Николаевич?
– Моданок 5 тёжат гектарт. Те: 1200 гектарт озимой товзюро, 1150 яровой шуж, 650 гектарт ламбамо якстерькай, 350 гектарт кукуруза. Весе лиясь ламо иень тикшеть. Анокстынек 5 тёжат тоннат сенаж, 500 тоннат тюксо тикше.
– Ламо важодицянк?
– Малав 100. Кизна седеяк ламо. Сынь – Ромодановасто, Болтина, Кочунова велетнестэ. Зарплатась пандови шкастонзо. Ней вана тенек пек эряви осеменатор. Вешнетяно. Ёвтан, зарплатась карми пек вадря.

– Сергей Николаевич, кодамо техниканк?
– Мелят одкстомтынек автопарконок. Весе, мезе эряви, ули: сюронь пивсыця сисем комбайнат – ниле од АКРОСС-т ды колмо ДОН-т. Улить КамАЗ-онок, К-744, МТЗ-1221 тракторонок. Бути зярдо а сатны техникась, вештяно шабра отделениятнестэ.
Сергей Сабаев чачсь Чаунзабуень Комсомольской посёлкасо. Школадо мейле тонавтнесь Н. П. Огарёв лемсэ МГУ-нь экономической факультетсэ «менеджмент» специальностень коряс. Те таркасонть управляющеекс сон важоди 2004 иестэ саезь.

Кочуновань отделениясонть Полетаевтнень семиясто роботыть 7 ялакст ды 2 сазорт. Цела династия.Валост коряс, кавксоце ялаксост эри Белоруссиясо ды сонгак тосо важоди велень хозяйствасо. Весе сынь чачсть Болтина велесэ. Сергей Анатольевич Полетаев школанть прядомадо мейле служась армиясо. Те организациясонть сон роботы 2015 иестэ саезь трактористэкс ды комбайнёрокс. Валонзо коряс, косояк лия таркасо арась мелезэ важодемс, ансяк велесэ. Ризны, кода меельце иетнестэ велетне чамить ды ёмить.
Ялаксозо Евгений Анатольевич – механизатор. Сонзэ ниле эйкакшонзо. Вейкесь, Виталик, сеедьстэ якси тетянзо марто. Пек вечки ардтнеме мартонзо комбайнасо ды тракторсо. Кие соды, паряк, сонгак покшсто касозь озы тракторонь руль экшс.

А вана Максим Чиконаков тесэ ансяк колмо иеть. Сон – Ромодановань райононь Пятина велестэ, тонавтнесь Н. П. Огарёв лемсэ МГУ-нь Аграрной институтсо. Кода уроз эйкакшонтень, Ромодановасто тензэ макссть квартира. Кочуновасо важоди агрономокс.

– Зярдо мон тей сынь роботамо – васенце лездыцям ульнесь Сергей Николаевич ды прявт агрономось. Сюкпря тенст превс путоманть ды тонавтоманть кисэ. Тедеде тундось сась позда, якшамоль, тень лангс апак вано, видезетне лиссть парсте. Вузось тонавты, ансяк мода лангсо весемесь лия, тесэ алкуксонь практика, – кортась Максим.

Татьяна Маторкина
Фототне Э.Ретунский

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».