Вторник, марта 19, 2024
Важное



Июнень 12-це чистэ Мордовиянь Прявтось Артём Здунов якась Отяжбуень Ламбаське велев. Тосо сон ёвтась поздоровт земляктненень Россиянь чинть, Иневанькс Троицянь православной кенярксчинть ды велентень 420 иетнень топодеманть кувалма.



Ламбаське велесь вети историянзо XVI пингенть прядовомсто саезь, те эрзянь кезэрень велесэнть чачсть-кассть ламо содавикс ломанть, ютксост – Советской Союзонь Героесь, генерал-майорось Василий Здунов, эрзянь поэтэсь Яков Кулдыркаев. Ды течияк неть таркатнесэ чачозтне а стувтнить тиринь ёнксонть ды теевезь коень коряс сакшныть тей Троицясто.

Республикань Прявтось васняяк путсь цецят Ине Отечественной войнасонть маштовозь воинтнэнень кеврунгонтень ды ледстинзе сынст чатьмонемань минутасо.

Ламбаськень прявт площадьсэнть киштсть-морасть шкинемань коллективтне, анокстазель республикань весе ёнкстнэстэ раськень промыслань мастертнэнь ды декоративно-прикладной шкинемань выставкась. Эрзянь-мокшонь модась сюпав кедьчелькев ломантнесэ!
«Вечкевикс землякт, сюкпря, тердимизь те кенярксчинтень.
Россиянтень вечкемась ушодови семиянтень, ялгатненень, тиринь модантень вечкемастонть. Весе покшось ушодови вишкинестэнть, вейсэ минь – покш вий! – мерсь Артём Здунов. – Монь туртов покш честь улемс течи тынк марто вейсэ, тиринь Ламбаськень, тиринь Отяжбуень, тиринь Мордовиянь эрицятнень марто вейсэ. Ёвтан весенень поздоровт Россиянь чинть, Иневанькс Троицянь кенярксчинть кувалма, арсян весенень сэтьмечи, шумбрачи ды паро эрямо!»
Кенярксчисэнть казевсть велень важодицятне. Мордовиянь Прявтонть, республикань Правительстванть ды райононь администрациянть пельде казнетне явшевсть АПК-нь важодицятненень, тонавтыцятненень, медиктненень, ветерантнэнень, ламо эйкакшонь триця семиятненень, од специалисттнэнень, семиясо куватьс эрицятненень.

Велень эрицятненень поздоровт истя жо ёвтасть республикань Правительствань Председателесь Владимир Сидоров ды Орданьбуень ды Отяжбуень епископось Вениамин.

Кортасть веленть виевгавтомадо-кепетемадо. Райононь прявтось Виктор Прокин пачтясь, сы иестэ ушодови велень культурань дворецэнть витнемась ды Кулдыркаевень курованть кинть строямось. Теде башка, анокстави неень шкань ловсонь комплексэнь проектэсь. «Прявтось – велесь илязо чамо, ломантне эряст ды важодест тиринь моданть лангсо!» – мерсь сон.

Кенярксчинь официальной пельксэнть прядовомадо мейле Мордовиянь Прявтось кортась велень ломантнень марто, ванызе, кода невтизь ёрокчист вело- ды мотогонщиктне.
* * *

Теке жо чистэнть Республикань Кудосо ютавтовсь важодемань ды общественной тевтеемасо изнявкстнэнь кисэ каземань церемониясь, конась алтазель Россиянь чинтень. Тосо ульнесть Мордовиянь Прявтось Артём Здунов, МР-нь Правительствань Председателесь Владимир Сидоров, МР-нь Госсобраниянь Председателесь Владимир Чибиркин, Мордовиява Прявт федеральной инспекторось Михаил Сезганов ды Саранск ошонь округонь прявтось Игорь Асабин.
Артём Здунов ёвтась поздоровт пурнавозтненень Россиянь чинть, Троицянть ды Саранск ошонь чачома чинть кувалма, арсесь республикань ды масторонь весе эрицятненень сэтьмечи ды весе вадрянть, эрьва семиянтень паро эрямо. «Шкась юты, зяро поколеният полавтовсть, ансяк Россиясь кадови минек тиринь кудокс. Россиясь – те минь тынк марто!» – мерсь А. А. Здунов.

Сон ёвтась сюкпрянь валт масторонь мельтнень-вановтнэнь ванстыцятненень – сетненень, кить ванстыть сэтьмечинть западонь рубежтнесэ, важодить производстватнесэ, лездыть Луганскойстэ, Мариупольстэ ды ДНР-стэ сазь инжетненень, весенень сетненень, кить эрьва чистэ теить минек Тиринь масторонь славанть, эдь героизмась неяви эрьва чинь важодемасонть.

«Ёвтан покш сюкпря Россиянь Президентэнтень Владимир Владимирович Путиннэнь ответственностенть кисэ, конань сон саизе эсензэ лангс, конань саизе эсензэ лангс Россиясь – рузонь мирэнь уцясканть кисэ, лия державатнень уцяскаст кисэ, штобу а нолдамс фашизманть ды национализманть. Те ответственностенть сави варчамс эсест лангсо од ломантнененьгак. Минек туртов ней пек питней вейсэндявомась. Кадык пингеде-пингес кирди славанть минек Россиясь ды минек тиринь Мордовиясь», – тешкстызе Артём Здунов.
Артём Здунов явшесь покш наградат. Истя, важодемасо изнявкстнэнь кисэ Ялгаксчинь орденсэ казезь «Сарансккабель» ООО-нь уськень волочильщикесь Михаил Авдюшкин, «За заслуги перед Отечеством» II степенень орденэнь медальсэ казезь «МАПО-ТРАНС» ООО-нь автогрейдерэнь машинистэсь Пётр Марюшкин ды трудонь ветеранось (китнень строямосонть стажозо 36 иеть) Владимир Шувалов.
Истя жо Мордовиянь од эрицятненень явшезельть Российской Федерациянь гражданинэнь паспортт.
* * *
Июнень 12-це чистэ ошонь Советской площадьсэ валскестэ саезь ульнесь кенярксчинь ёжо. Эйкакштне ды покштнеяк кенярдсть маней пертьпельксэнтень ды невтсть эсь ёрокчист эрьва кодамо пелькстамосо.

Ве ёндо сельмс каявсь пожарной ды полицейской техникань выставкась. Тейтерькатне ды цёрынькатне тевень содазь варчнесть эсь пряст идицякс, мотоциклистэкс ды тевс нолдасть беспилотной теевкстнэнь. Кинь ульнесь мелезэ аламодо экшендемс, инескеть – пожарной гидрансто фонтанось.

Лия пеле ютавтовсь асфальт лангсо артомань пелькстамо. Эйкакштне артсть цецят, гулькат ды маней чи. Весе те ульнесь морыцятнень весёла морост марто.

Кинень эрявсть мазый фотографият, сеть ютасть вейсэ «Шумбрат!» Эрзянь-мокшонь раськетнень ошонь фестивалень театрализованной парадонь-ютамонь колоннанть марто. Истямо мазычи ды раськень оршамонь сюпавчи костояк а неят.

Истя жо важодсть кедьчелькевень выставкат, косо ульнесть ламо мельстуиця кедьёнкст. Эйкакштнень туртов вадря мероприятият анокстакшнось А. С. Пушкин лемсэ оймсема паркось.

Меельцекс пурнавозтненень невтезель мельстуиця концерт, чокшне жо менеленть мазылгавтызе салютось.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».