Маенть ушодовомсто «Эрзянь правда» газетань ВКонтакте ды Одноклассники социальной сеттнень куротнесэ яволявтозь «Монь Россиям» пелькстамось. Минек ловныцятне кучить фотографият, конатнесэ невтеви эрзянь кельсэ вечкевикс газетась минек масторонь куш кодамо велесэ эли ошсо аштиця достопримечательностенть, национальной проекттнэнь лувсо строязь объектэнть, кеврунгонть эли лия ёнов а молиця теевксэнть вакссо.
Лиятне содыть, косо теезь фотографиясь ды мезе лангсонзо невтеви. Эрьва ковсто ёвтавить пелькстамонь изницятне – кие кучсь седе ламо фотографият ды истя жо, кие содась седе ламо таркат.
Майстэ пелькстамонтень кучозь фотографиятнесэ невтезь таркатнень содамонь коряс явовсь Дубёнкань райононь Кочкурвелестэ Татьяна Цыганова. Сон лиссь васенце изницякс, маласо шкастонть минь содавтсынек сонзэ ды казтяно казне. А вана июньстэ ёроковокс кармась Отяжелень эрицясь Ольга Радаева (Пужаева). Неть читнестэ минь вастовинек тейтерь-аванть марто, казинек тензэ казне «Эрзянь правданть» пельде пелькстамонтень мелень явоманть кисэ ды аламошка кортынек эрямодонть ды важодемадонть.
Ольга Венедиктовна Радаева малав 30 иеть важоди медицинань ёнкссонть, 25 эйстэст – медицинань сестракс. 2016 иестэ саезь – Отяжелень райононь больницянь паллиативной отделениянь палатань медсестракс. Эсь роботанть пек вечксы ды овсе а янкси, мекс од шкасто кочкизе те профессиянть.
Ольга Радаева чачсь-кассь Отяжелесэ. Школанть прядомадо мейле тонавтнесь Орданьбуень медицинской училищасо ды сонзэ прядомадо мейле сеске кундась тевс.
– Монь уш вишка шкасто ульнесь покш мелем сюлмамс эрямом медицинань ёнксонть марто. Врачонь ды медсестрань профессиятне тень пек вечкевсть, – ёвтни Ольга Радаева. – Училищасо тонавтнеманть прядыя июнень меельце читнестэ ды уш августсто монь кучимизь роботамо эсенек райононь Чукалишка велев. Аламос тосо роботынь, пурнынь содамочить, тонавтнинь ломань марто важодемантень. Мейле ютавтымизь седе покш велес – Чукалов. Ансяк бажамон ульнесть роботамс Отяжелень райбольницясонть. Саимизь тей. Сеть шкатнестэ медицинань персоналонь асатома арасель, секскак васняяк роботынь санитаркакс.
Эряви ёвтамс, паллиативной отделениясо важодемась а шождатнестэ. Те отделениясь ульнесь панжозь стака, а лецявикс ормасо сэредицятнень туртов. Истя жо тесэ витить сыре ломантнень шумбрачист.
– Минек отделениясь 15 таркас. Важодить тесэ вете медсестрат ды вете санитаркат. Коллективенек пек вадря, важодемс мартост пек шожда, – ёвтни Ольга Венедиктовна. – Эрьва ормалгадозесь минек туртов, теке малавикс ломань. Эрьванть кисэ мелявттано, эрьванть снартнетяно оймавтомс, ладсемс лембе валсо. Сыре ломантнень эсест обуцяст. Аволь весень сон шожда, эрьванть марто эряви муемс кель-вал, вечкевемс тенст. Те а эрьванть лиси. Истя жо тесэ сеедьстэ эрсить истят, конатне а якицят. Сыненст эштёяк седе покш мель явома. Тень мон стакачикс овсе а лован, эсь важодеманть пек вечкса.
Важодемань стакачитнень лангс апак вано, Ольга Радаева муи шка эсь вечкевикс тевентеньгак – сон касты цецят. Сынст марто озямось весе сиземанть шождалгавтсы. Радаевтнень кудост ваясь цеця потс, тундосто саезь позда сёксес сон эрьва кодамо тюсонь панжовкс потсо.
– Цецятнень кастомась – те монь туртов седеень эждема. Монь кудосояк цецятне эрьва чаво таркасонть аштить, кудонь перькаяк эрьва кодат цецят озавтозь. Те иестэ кудо ваксс а покшке бассейна арсинь-теинь, варчнян эсь прям ландшафтной дизайнерэнь тевсэнть, – пейди Ольга Радаева. – Пек вечкан пиресэ важодеме, кастомо эрьва кодат эмежть, ягодат. Кадык те веши ламо вийть, пиревтеме кодаяк.
Истя жо Ольга Радаева минек «Эрзянь правда» газетань свалшкань ловныця. Кода корты авась, сон пек вечксы эрзянь келенть ды покш мельсэ ловны тиринь кельсэ газетанть. Домкасто ваны минек соцсеттнень мельга, штобу мезеяк а менстямс. Секс пелькстамосонтькак кармась сехте ёроковокс. Покш сюкпря тензэ!
Ольга Радаева марто кортамсто чарькодинек, авась пек уцяскав. Сонзэ ули вечкевикс семиязо. Мирдензэ марто кавто эйкакшост. Ули эрямонь тевезэ ды оймень коряс тевезэ. Мезе эштё эряви уцяскав эрямонть туртов.
Юлия Еремина