Республикань велень хозяйствань предприятиятнесэ неень шканеяк поладовить тевтне. Косо таргить ламбамо якстерькаенть, косо пивсыть соянть ды кукурузанть, теке жо шкане сокить паксятнень, анокстыть сы иень видемантень.
Тедеде сюрось эрьва косо чачсь вадря. Минь пачколинек Отяжелень райононь «Сабанчеевское» ООО-в, косо пачтясть тенек, кода сексня молить тевтне хозяйствасонть. Вастовинек предприятиянь прявтонть Александр Палькинэнь марто.
– Александр Ефимович, инескеть, евтнеде, мезе тедеде видниде паксятнесэ? Кода ютась нуемась?
– Тунда сюротнеде виднинек 7,5 тежат гектарт. 2000 гектарт озимой товзюро, 261 гектар кснав, истя жо яровой товзюро ды шуж, 131 гектар сюрокс кукуруза, 336 гектарт силосокс кукуруза, 65 гектарт рапс, 1850 гектарт ламбамо якстерькай, ламо иень тикшетнеде видезельть 1335 гектарт. Васенцеде видинек 100 гектарт соя, варчамонь кис, сон моли ракшатненень андомапелекс.
Сюронь-бобань культуратне чачсть вадрят, весемезэ пурнынек 29 тежат тоннат. Мелят, саемга, 24360 тоннат. Озимой сюронть урожаесь – 38,9 ц гектарсто, яровоесь – 34,3, шужось – 40,8, кснавось – 36,6. Кода рединк, невтевкстнэсэ ули вадря касома, те пек кецявты. Ней пивсэтяно силосокс кукурузанть. Кавксо тежат тоннат анокстазь, эште кавто тежат эрявить. Сенаждонть истя жо анокстазь кемень тежат тоннат. Кадовсь нуемс сюрокс кукурузанть – 130 гектарт. Паксятнесэ таргави ламбамо якстерькаеськак.
Раминек хозяйствантень эрьва кодамо техника. Неть: «Полесье» од комбайна, силосонь трамбовщик, электрооборудования марто «Хозяин» миксер, конась теи-аноксты ракшатненень андомапеленть, комбинированной дисковой вадря культиватор ды лия мезе. Весемесь эряви, весемесь пек лезды тенек. Од комбайнань рамамось свал кеняркс эрьва предприятиянтень, эрьва нуицянтень.
Сюкпря евтавлинь мартон важодицятненень: растениеводствань коряс прявтонь полавтыцянтень Вера Кочуринанень, животноводствань коряс прявтонь полавтыцянтень Павел Лисиннэнь, механизациянь коряс прявтонь полавтыцянтень Алексей Чугуновнень ды ламо лиятненень. Ансяк вейсэ важодезь, вейкень-вейкень чарькодезь, топавтови арсезесь, саевить изнявкстнэ.
– Александр Ефимович, паксятнеде башка, мезе одось ферматнесэ?
– Минек скалонь ферматне панжозь Сабанцелесэ, Аловасо ды Алашеевкасо. Витнинек-петнинек Аловасо ферманть, тосо икеле кирдевсть 120 скалт, ней – малав 200. Стявттано ферма Сабанцелесэ. Тов кельгить 300 прят. Сон карми неень шкань вешематнень коряс, автоматизированной, симдемань системань эждемка марто. Нолдынек важодеме комбикормовой заводонть. Стявтынек комбикоромонь ванстомань колмо таркат. Теде башка, ладинек ловсонь блок – те истямо кельмевтемань покш оборудования, косо ванстови ловсось. Тов кельгить 10 тежат тоннат. Ловсонть усктано Ицялонь сырань теемань комбинатов ды Саранскоень консервной заводов. Мелят Сабанцелень отделениясонть вейке скалсто потявтсть 6 тоннат ловсо, тедеде – 10 тоннадо ламо. Те кенярдовты!
– Кода те изнявсь тенк?
– Полавтынек скалтнэнь андомань рациононть. Тердтнинек эсь тевень содыця ломанть, конатнень марто кочкинек виде рацион. Ловсось кармась ламолгадомо, зярдо човоринек эрьва кодамо андомапель, совавтынек соя, премикст, витаминт. Соянть истяко а макссак, эряви термической обработка 30–160 градуссо, сонзэ эряви човорямс мезеяк марто. Тень кувалма скалонь потявтыцятнень зарплатасткак кассть.
Мон паро мельсэ ванкшнан скалтнэнь мельга: зяро максыть ловсо, кода кастомс невтевкстнэнь, мезе од совавтомс производствас. Свал арсян, кодамо паксяс мезе видемс. Ды зярдо неят теезенть, кода кортыть, результатонть, седеяк кецнят, седеяк вельмить вийть молемс ансяк икелев.
А.Е. Палькин эйкакш пингестэ саезь тонавтозь мода лангсо важодеме. Сынст семиясо свал трясть ламо ракшат: скалт, букат, тулякат. Ковгак тевтнеде а оргодят, эрявить теемс. Сон эзь тонадо ве таркасо аштеме, а чарькоди нузякс ломантнень.
«Сабанчеевское» ООО-с самодо икеле кувать кирдсь крестьянско-фермерской хозяйства, нинзэ марто трясть-кастсть куркат. Секскак велень тевтнень ды мелявкстнэнь парсте содасынзе.
Пивсыть соянть ды кукурузанть
Павел Владимирович Лисин омбоце ие важоди предприятиясонть. Кода уш вере сермадынек, сон ракшань трямонть коряс прявтонь полавтыця. Чачсь Отяжеле поселкасо. Ков молемс школань прядомадо мейле, кодамо специальность кочкамс, теньсэ превс путомат макссь тетязо. Мольсь тонавтнеме Н.П. Огарев лемсэ МГУ-нь Аграрной институтов, кочкизе «Зоотехния» направлениянть. Прядызе вузонть 2004 иестэ ды сеске кармась роботамо «Мордовский бекон» предприятиясонть зоотехникекс. Велень хозяйствасо стажозо уш комсь иеть. Ней сон ванкшны ферматнень, производстванть, прявтсонзо ламо важодицят.
«Сабанчеевское» ООО-нь паксятне сравтозь ламонь таркава, зярыя велетнень перька. Зярдо тосо ульнинек, комбайнатне пивсэсть кукурузанть. Сон чачсь вадря, сэрезэ покш, початкатне кеметь. Владимир Геннадьевич Саврушкин КамАЗсо ускси кукурузанть, ламо иень перть роботы тесэ. Тердинек церанть кортамо, ансяк сон ахолдась кедьсэнзэ, келя, аютко, эряви куроксто пачтямс нуезенть.
Лия васоло паксясо цератне пивсэсть соянть. Шумбракстнинек комбайнеронть Иван Сергеевич Кочуринэнь марто. Сонгак уш малав комсь иеть велень хозяйствасо. Чачсь Капазэлесэ, прядызе Кемлянь аграрной колледженть. Роботамо кармакшнось эсензэ велесэ механикекс. Кизна озыль комбайнас нуеме. Ледстни, кода васня кармась нуеме «Нивасо», «Донсо», седе тов уш появасть «Акростнэ».
– Соясь – сексень культура. Кенерсь парсте, саеви вадрясто. Тедеде сюротнень нуемась парсте ютась, пиземетне эзть пансе эйсэнек. Пивсэматнеде мейле озан тракторонь руль экшс. Анокстасынек модатнень тундонь видемантень. Мон яла почодан удобреният, якстерькаентень теян культивация. Иень эрьва шкасто улить тевть, паксятне а учить, весементь эряви теемс шкастонзо, – корты механизаторось.
Татьяна МАТОРКИНА
Фототне Егор Горинэнь