Суббота, сентября 18, 2021
Важное

Неть читнестэ минек республиканть содавтызь медицинань наукань докторось, лётчикенть-истребителенть, Советской Союзонь Героенть М.П. Девятаевень цёразо Александр Михайлович вейсэ нинзэ Фирдаус Исмагиловна марто.


Медьковонь 8-це чистэ Михаил Петрович Девятаевнень топодевельть бу 104 иеть, ды кемекстазь коень коряс малавиксэнзэ сакшныть Мордовияв, штобу тешкстамс те чинть.
– Эрямонзо перть тетям свал Троицянь чистэ сакшныль Торбеевав, штобу вастовомс роднятнень-раськетнень марто, содавтомс авань калмолангонзо. Ды минек яла саилимизь мартонзо, – ёвтни Александр Михайлович. – Тетям эрямосто тусь 2002 иень сундерьковсто. Тедеде Троицянь чистэ минь ним Фирдаус ды лия участниктнень марто ульнинек «Равось – ояксчинь лей» раськеютконь этнокультурной экспедициясо Самарасо. Ды кемекстынек, Мордовияв сатано тетянь чачома чистэ.
Истя лиссь нейгак. Икеле чистэнть, медьковонь 7-це чистэ, покш инжетне вастовкшность МР-нь Культурань, раськень политикань ды архивень тевень министрань тевтнень топавтыцянть Светлана Баулина марто, содавтызь республикань краеведениянь музеенть ды ульнесть А.С. Пушкин лемсэ раськень библиотекасо «Дети России» фотовыставкань панжомасо.
Эряви меремс, минек республикав Девятаевтне састь аволь чавонь кедть. Раськень библиотекань фондс Александр Михайлович казсь вете книгат тетянзо ланга, конатнень ютксо – «Побег из ада» автобиографиясь, кона одс нолдазель Михаил Девятаевень 100 иетненень, истя жо казевсь пусмо, косо максовить лётчикенть сослуживецтнэнь ледстнемаст, косояк а вастневиця публицистикань материалтнэ.


– Те книгась, конань анокстыцязо Юрий Юшкин, кона сестэ ульнесь Мордовиянь архивень службанть прявтсо ды кона ламо вастневсь тетянь марто, нолдазель весемезэ тёжа экземплярсо ды малав сеске теевсь раритетэкс, – ёвтнесь Александр Михайлович. – Истя жо монь покш мелем, штобу Саранскоень ловныцятне седе парсте кармавольть содамо тетянь, кода ломаненть, кодамокс сон ульнесь малавиксэнзэ марто кортамсто. Теде «Роща Шамова» эсь книгасонть пек вадрясто ды видестэ ёвтнесь Казанень хирургось, сёрмадыцясь, артыцясь, чувто ланга керсицясь Алексей Агафонов. Сон тетянень ульнесь паро ялгакс пельпингень перть.
Пек берянь, те шкас аволь весе документтнэ, конат кандовить войнань ды войнадо мейлень шкантень, панжадот. Ансяк ялатеке муевсть пек эрявикс тешкст. Те ёнкссо роботась поладови. Тедедень чадыковсто минь панжинек Михаил Девятаевень лемсэ фонд.
Мероприятиясонть истя жо ульнесь МР-нь Культурань, раськень политикань ды архивень тевень министрань тевтнень топавтыцясь Светлана Баулина. Светлана Никитовна пурнавозтненень мерсь, ней толковави «Девятаев» фильмасонть тевс нолдазь декорациятнень, техниканть Мордовиянтень максомадо кевкстемась. Сынь истя жо кармить прявтокс музейно-исторической комплекссэнть, кона алтави ине лётчикенть подвигентень.
Кода уш тешкставсь икеле, теке чистэнть А.С. Пушкин лемсэ раськень библиотекасонть панжовсь «Дети России» фотовыставкась. Те – фотороботатнень эрьва иень пелькстамо, конань вана уш кавксоцеде ютавты Межэтнической журналистикань гильдиясь. Сехте вадря роботатне совавтозь передвижной экспозициянтень, конась ардтни масторганть уш зярыя иеть.
Пелькстамонть прявт бажамозо – невтемс Россиянь раськетнень культураст мазычинть ды сюпавчинть оршамотнень вельде, кастомс раськень культурантень вечкеманть эрьва семиясонть.
Тедедень аштемковсто саезь сундерьковс «Дети России» выставкась карми важодеме вете регионсо. Пушкинкась кармась васенце библиотекакс, косо сон невтеви.

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».