Вторник, марта 19, 2024
Важное

Николай Степанович Живаев чачсь 1956 иень ноябрянь 29-це чистэ. Семиясонть ульнесь ветеце эйкакшокс, весемезэ эйстэст кавксонест. Авазо – Ольга Ивановна, важодсь колхозсо – паксясо, фермасо. Пек вечкилизе морамонть. Тетязо, Степан Ильич, Ине     Отечественной войнань участник. Войнав саезель 1942 иестэ, ранязель ды понгокшнось пленс. Войнасто велявтсь инвалидэкс. Важодсь колхозсо ракша мельга якицякс.

 

Николай эштё школасо тонавтнемстэ сёрмалесь заметкат Отяжелень райононь «Вперёд» газетас. Цёранть мелензэ седеяк кастсть газетастонть кучозь гонорартнэ. Лиясто ковозонзо лиснесь аванзо пенсиядонть ламо (сестэ пенсиясь ульнесь 12 целковойть).

Школанть прядомадо мейле Николай тусь тонавтнеме Саранскоев Н.П.Огарёв лемсэ МГУ-нь филологической факультетэв. Эштё студентэкс улемстэ роботась «Мордовский госуниверситет» газетасо.

1979-80 иетнестэ важодсь «Электровыпрямитель» заводонь «За коммунистический труд» газетасо. 1980-91 иетнестэ – «Эрзянь правда» республиканской газетасо. Истя пингензэ перть важодемань тевезэ свал сюлмавозель печатенть марто. Кувать роботась «Известия Мордовии» газетасо, мейле «Мордовия» газетасо. 2013-2017 иетнестэ ульнесь Кочкуровань райононь «Заря» газетань прявт редакторокс. Николай Живаев – журналистэнь конкурсонь ламоксть изниця ды лауреат. МР-нь СМИ-нь заслуженной роботник. Ансяк вете иес тукшнось газетань тевенть эйстэ. 1991-95 иетнестэ роботась Кочкуровань райононь Воеводской велень средней школань директорокс. Ней Николай Степанович пенсиясо. Татьяна нинзэ марто кавто эйкакшост – Элина тейтерест ды Павел цёраст. Конатнень уш кавтонь-кавтонь эйкакшост. Нуцькатне, нама, покштянть ды сырькаенть сехте покш кенярксост.

Николай Степанович валморот икеле зярдояк эзь сёрмале. Сонзэ валонзо коряс, ушодсь те иень мартсто, зярдо ошсто ютась эрямо Ромодановань райононь Пятина велев. Те шканть перть сон сёрмадсь сядодо ламо стихотвореният эрзянь кельсэ, вейке ёвкс ды вейке ёвтнема. Мекс эрзянь кельсэ? Тиринсесь, келя, седе малавикс ды чарькодевикс.

Кода кортыть, ёроков ломанесь эрьва мейсэ ёроков. Николай Степановичень, валморонь сёрмадомадо башка, ули эштё юткошкань вечкевикс тевезэ (хобби). Арты номерэнь коряс картинат. Омбоце пель иес артсь 40 ламо картинат. Покш пельксэнть кирди кудосо, истя жо ламо казсь малавикстнэнень ды ялгатненень.

 

Илядо чие эрямованть…

Шкань-шкань стувтнетяно минь ванстомс

Сень, мезесь таштавсь пингень перть.

Бажинек эрямонть капшавтомс…

Эрямось ютась – тенень кемть!

Вана тейтеремгак уш ава,

Тетям-авамгак уш арасть…

Ансяк ледстнемс ней монень сави,

Зярдо сынь мартонок эрясть.

Молят зеркалантень ды кемат:

Чамась невти эште одсто…

Бути кувать ваномо кармат,

Лия мельть сыть тонь пряс потсто.

Вай, ков ёмась уш мазычинек?!

Сормсевкстнэяк а изнявить…

Одс а велявты эйкакшчинек

Одс тусто черть а кастовить…

Чиезь чиинек эрямованть,

Эзинек вант иенек лангс.

Питнейкс ловинек важодеманть,

Стувтнинек авазонок самс…

Илядо капша – кенертядо!

Весе тевтне а теевить…

Эрьва чинтень тынь кенярдодо –

Сестэ валдо мельть превзэнк сыть.

 

ТЕШТЕ ЛАНГС

А МЕЗТЬ КЕМЕМС...

Менельстэ тештине прась...

Эзь кундавт монень, арась.

Ули кой: арсемат сы –

Тештесь мелеть топавтсы!

Весе тенень кемтядо,

Эли ансяк пейдтядо?

Прамсто тештесь пес палы,

Модас пачкодемс «кулы»...

Бути тевсь истя ашти,

Сестэ мелеськак а сти.

А эряви прянть яжамс,

Иля учо тештенть прамс...

Ули вадря, бути тон

Неят пелеветь од он...

Кадык те онсонть арсемат

Теить эрямов «кустемат»!

Теште лангс а мезть кемемс –

Пельдензэ а мезть учнемс...

Эсь вийтнес тон яла кемть,

Иляк ризнэвть седеенть!

 

СЭРЕДИЦЯНТЬ...

А ВЕЧКИТЬ

Сыре саразось кокны –

Пизэс алт сонсь а канды.

Стяко ярсы зернадо,

Кургонересь панжадо...

Лекси вельть уш стакасто,

А якави бойкасто...

Атякшось вакска чии.

Саразось, вант, лепии...

Ломань ютксояк эрси,

Зярдо кой-ки сэреди...

А вечкить сэредицянть –

Пурдыть ве енов чаманть...

Ломанесь, истя эрязь,

Кортыяк, вай, музгордязь...

Вадрясь нацяс стувтови,

Апарось кудос сови?!

Сыре саразонть панизь –

Пизэстэнзэ кшувавтызь...

Алт арасть ды сэреди –

Кияк сонзэ а иди...

 

НЕЙ А ЧИЙНИТЬ КЕПЕ...

Кизэнь шкане минек велев

Эйкакшт усксить ошсто...

Ардыть сынь эсь покштяст пелев –

Лексить ваньксэв коштсо...

Кадык сакшныть, кадык эрить –

Велесь мари вайгельть!

Сыцятне, нать, пенгть а керить,

А кочкить сынь чевгельть...

Сынь а неить скалонь одар,

А потявтыть ловцо.

Скалтнэ ульнесть эрьва кодат...

Ней а несыть онсто!

Ялатеке ошонь эйдтне

Кецтнить покштяст кедьсэ.

Пси читнестэ яксить лейнев –

Пулькить куватьс ведьсэ.

Веенст калнэть кундсить чистэ,

Ардтнить «велопедсэ»...

Омбонст а лиснить пирестэ –

Кочкить пандят кедьсэ...

Витьстэ меремс, компьютерсэ

Налксить пек аламот...

Покштяст марто эйдтне тевсэть,

А кадновить ськамост...

Велесэ эйкакштнэ докат –

Тонавтнить стряпамо...

Бабаст марто пидить прякат,

Кой-кить озыть стамо...

Някатненень стыть платият,

Прясто пильгс оршавтсызь.

Ней арасть, вай, горобият –

Оршамонть а ванстсызь...

Сыця эйкакштнэнь лангс ванан –

Весемесь кецявты!

Севномост киньгак а карман –

Эрямось тонавты!

Ансяк сеетьстэ мон лецтнян:

Кепе свал чийнинек...

Ней жо нуцьканть кедте ветнян –

Минь лиякс якинек...

 

ЛИЯВ КИНТЬ А ПУРДАСАК...

Перть-пельксэнть а манясак –

Лияв кинть а пурдасак!

Мезе перьканок теи –

Ломанесь весень неи!..

Мон редия: пиресэ

Ламо-мезесь а касы...

Пси читне теньсэ чумот!

Вадря читнень – учомот...

Модарькась цветясь-цветясь,

Цветямодо ней лоткась?!

Цецинетне весе прасть,

Унжатне, вай, таго састь...

Пиземе бу, пиземе!

Эрьва ломанесь кеми...

Бути сон туи куроксто,

Тевтнеяк сыргить вадрясто!..

 

БУТИ ШНАТ, ИЛЯ МАНЧЕ!

Улить ломанть пряст пек шныцят...

Мезе кевкстят – свал «вадря!»

Ансяк сынст парсте содыцяст

Кортыть: «Вай, Идемевсь пря!»

Минек велесэ истятнэнь

Пряньшны варакакс лемдить...

Юты шка ды неть шныцятнень

Кудопескак а нолдтнить.

Тонавтомась тенень вейке:

Бути шнат, иля манче.

Кенгелят – чийть тестэ нейке,

Келеть масторга тенси...

 

МОРО КШИДЕ МОРАТАНО...

Яла кортыть эсь юткова:

«Кшись – те весень туртов прявт!»

Сырнень валокс мон сынст лован.

Зяро мелеть, кшиденть сявт!

Кшись а пры тенек менельстэ,

Васня сюронть кастома...

Ламо ливезь лиси эйстэть

Утомс сонзэ ускомга...

Кшивтеме а юты чинек.

Кши марто молить тевтне...

Кшись – те минек сюпавчинек!

Кшивтеме «емить» превтне...

Моро кшиде моратано –

Сюкпря пельденек учи.

Эрьва кода кшинть шнатано –

Паряк, вийть тенек кучи...

 

ЛЕЙ ЧИРЕСЭ МОРЫ ЦЕКОВ...

Лей чиресэ моры цеков –

Удомо а максы веть...

Эрзянь цера, вельть ероков,

Учи тейтерь вензэ перть...

Ламарень цецятнень чинесь

Качады эрьва ендо...

Ве таркасо церась чийнесь –

Седейсэ кивчкадсь ендол...

Прянть ирецтить мельть-арсемат,

Ирецти ламареськак.

Ялгинеть учомсто кемат –

А маряви тенть веськак!

Сулей прась учицянть сельмтнес...

Сон чарькодсь: «Мазыйкась сась!»

Кавто ломантнень седейтнес

Педясь вейсэнь вечкемась!..

Ламарь чувтось вейсэндинзе,

Цеков-морось тусь пек мельс...

Вечкемась сынст тей тердинзе –

Тештест «понгавтомс» менельс!

 

«УЛКОТЬ» ВАЛОСЬ

«КЕКШИ» ШКАНТЬ...

Ки евтасы, зярошка

«Улкоть» валонть «кувалмозо»?

Улкоть – те аламо шка

Эли пек домка «потмозо»?

Улкоть якинь мон вирев...

Улкоть ульнинек Московсо...

Улкоть инжеть састь велев...

Улкоть кудось вельтявсь ловсо...

Улкоть кучинь тенть серма...

Улкоть киштинек свадьбасо...

Улкоть педякшнось орма...

Улкоть паринек банясо...

«Улкоть» валось «кекши» шканть –

Ансяк эрзясь тень чарькоди!

Лиясь кежди, секень вант...

Тензэ смустесь а пачкоди!..

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».