Пензань областень Мокшан поселкасо ютась «Вастома» эрзянь ды мокшонь культурань фестивалесь. Мокшан робочей поселкась теевсь 1679 иестэ кода ош-крепость. Ней Мокшанской районось ашти минек Рузаевкань райононть марто границясо. Эрицятнень эйстэ малав весе рузт, нама, улить эрзят, мокшот ды лия раськеть. Районсонть ули мокшонь вейке веле – Мордовская Муромка.
Кенярксчинь ютавтыцякс кармасть Пензань областень Эрзянь ды мокшонь раськень культурань автономиясь ды Мокшан робочей поселкань администрациясь. Покшчись алтавсь Ине Отечественной войнасо Изнямонь 80 иетненень ды Масторонь ванстыцянь иентень.
Фестивалень ютавтома таркась уш валске марто пешксель ломанде. Велень поселениятне анокстасть ярсамопелень выставкаст. Весе сынь пидесть-пансть эрзянь ды мокшонь ярсамопельть: пачалксеть, прякат, сюкорот, лапшовник, овтонь лапат ды ламо лия мезе. Фольклорной ансамблятне састыне таргасть вайгелест, анокстасть сцена лангсо морамо. А зяро сакшность декоративно-прикладной искусствань мастерт! Чувтосто керсицят, питней кевстэ мазылгавтомапелень теицят, викшницят-кодыцят.
Кенярксчинть панжомадо икеле творческой коллективтне моро марто ютасть весень икельга.
– 2018 иестэ минек вейсэндявксонь правлениясь сась истямо мельс – Пензань областьсэ эриця эрзятненень-мокшотненень эряви вейсэндявомс. Истя чачсь «Вастома» фестивалесь. Тедеде сон юты сисемецеде. Васенце иетнестэ эрсесь Пензасо. Кецинек, зняро ломанть сакшность тенек, кой-кить семиянек пурнавкшность. Мельспаросо кунсолость тиринь кельсэ моротнень. Седе тов саинек мель ютавтнемс районтнэсэ. Васня вастымизь Сосновоборской районось, мейле – Шемышейской ды Бессоновской. Течи – Мокшансо. Сы иестэ кочкави лия район, макссынек тов фестивалень тешксэнть – чувтонь статуэтканть, конань потсо аштить сюлгамо ды цянав – Пензань модатнень тешксэсь. Мон арсян, истят покшчитнень эряви ютавтнемс районга-велева, самай неть таркатнесэ эрить ломантне, конат ванстыть кельтнень, культуранть, койтнень-кирдатнень. Культурась тесэ эри. Важодить фольклорной коллективтне. Тешкстаса, минек сисем коллективтнень улить народной лемест, – евтнесь Пензань областень эрзянь ды мокшонь раськень культурань автономиянь прявтось Елена Первушкина.
Сон пачтясь, сынст автономиянть юрсо 2019 иестэ саезь панжозь од ломанень отделения. Ули, кинь тонавтомс, кинень кадомс ванстомань ды вельмевтемань тевтнень. Одтнэ парсте лездыть ютавтомс промкстнэнь, кенярксчитнень ды лия вастовоматнень.
Пензань областень государственной краеведениянь музеесь анокстась фестивалентень раськень оршамопелень выставка.
– Течи невттяно Пензань областьсэ эриця раськетнень оршамопелест. Чарькодеви, те аволь кезэрень экспонаттнэ, ялатеке сынст эрявить ванстомс. Тесэ невтевить оригиналтнэнь коряс одс теезь, викшнезь-стазь оршамопельтне: рузонь, эрзянь ды мокшонь, ветькень, татаронь раськень оршамот. Сынст мереви токшемс, оршамс эсеть лангс. Фестивалень инжетне паро мельсэ оршнить лангозост ды тейнить фотографият. Прок мерят, понгить 150 иеде икелень шкас. Улить кирьгас-мештес понгавтовиця мазылгавтоматкак. Сеедьстэ ардтнетяно фольклорной кенярксчитнес, содавттано ломантнень эрьва кодамо раськень оршамопельтнень ды койтнень-кирдатнень марто, – евтнесь музеень культурно-образовательной отделэнь важодицясь Елена Тарасова.
Фестивалень панжомсто лембе вал марто инжетненень пшкадсть Мокшанской райононь прявтось Алевтина Решетченко, МР-нь Культурань, национальной политикань ды архивень тевень министерствань раськеютконь кевкстематнень ды аволь коммерческой вейсэндявкстнэнь важодемаст коряс отделэнь прявтось Даниил Стенькин, Эрзянь ды мокшонь раськень регионъютконь общественной вейсэндявксонь исполкомонь прявтось Татьяна Ларина ды лиятне.
– Эрзянь ды мокшонь кенярксчитне ютыть Россиянь ламо регионга. Ламот марсесть «Шумбрат» фестивальденть. Пензань областьсэ сонзэ лемдизь «Вастомакс». Кецявты, иеде иес сон седеяк келейгады, юты од районсо. Течинь фестивальсэнть ламо мельстуиця таркат, косо невтевить минек историясь, койтне, ютавтовить мастер-класст. Весе те вельмевти ломантнесэ тиринь масторонтень покш вечкеманть. Сюкпря весенень, кить анокстасть те кенярксчинть, – тешкстась Татьяна Ларина.
Концертэнь программасонть ульнесть малав 40 номерт. Кецявтсь, сцена лангс лиснесть эрзянь ды мокшонь ламо коллективть, сынь сакшность 15 районтнэстэ. Ютксост ульнесть эйкакшонь ансамбляткак. Весень вастсть лембестэ, виев цяпамосо. Ваныцятнень туртов морост казизь МР-нь народной артисткась Анна Атласова ды МР-нь заслуженной артисткась Галина Макшева.
2026 иестэ «Вастомась» карми Лопатинской районсо, самай тов максозель тешксэсь-статуэткась.
А менстни вейкеяк кенярксчи
Кенярксчисэнть теевинек содавиксэкс Мария Петровна Алдаевань марто. «Вастомав» сон сась Бессоновской райононь Кижеватова велестэ. Эрзянь авась морси «Шабрат» фольклорной ансамблясо.
– Мон чачинь Городищенской райононь Вышелей велесэ. Прядынь кемень класстнэнь ды молинь тонавтнеме микшницякс. Комсь иеть микшнинь эрьва кодамо велесэ, ульнинь лавкань прявтокс. Ней оймсян кудосо, ванан нуцькат, мукшнан шка морсемс ансамблясо. Тосо ниленек кадовинек. Гармониясо седицянок арась, ули киштицянок! Те – Василий Бодин. Морамонтень вечкемась сась авань пельде. Авам, Евдокия Ивановна Гуляева, эри мартон, сонензэ 92 иеть. Валдо превсэ, пиреваяк чийни, стихтькак ладси, конатнень морсян. Авам эсь шкастонзо морсесь минек велень покш хорсо. Те шкас ванстовсть умонь шкань фотографиятне, косо сынь морыть эрзянь оршамопельсэ, ков ансяк эзть ардтне! Ней вана мон поладыя те тевенть. Авам иень перть викшнесь-мазылгавтсь эрзянь оршамопелень. Мон жо ванстсынь нуцькан туртов. Вишка нуцькан тонавтан эрзякс кортамо, мадемадо икеле – озномо-чекамо. Авань сазоронстэнь 98 иеть, минек раськесэ-буесэ истят вана кувака пингень эрицят улить, – евтни Мария Петровна.
Мария Алдаева ансамблянзо марто сеедьстэ сакшны Мордовиясо ютавтовиця кенярксчитнес. Маныть Раськень Озкссо сон сайсь васенце тарка эрзянь оршамопелень коряс пелькстамосо! Эрзянь оршамопелезэ кезэрень, алкуксонь. Авась истя жо евтнесь, Пензань областьсэ а менстни эрзянь ды мокшонь вейкеяк кенярксчи. Ансамблянзо марто яксить Пазялгов – Покш эрзянь чив, Демкинав – Пуре латков, Пензасо ютавтовиця покшчитнес. Свал мартонзо пиди-пани мезеяк тантей. Сон авась превей, эзизе калавто каштомонзо, кода лиятне! Натой тейни якстерькаень поза. Гайневтить тензэ, евтыть, зяро эряви, кенярксчис позась ули анок.
– Истят кенярксчитне вейсэндить ломантнень. Вастовтано сетнень марто, кинь умок уш эзинек некшне, теевтяно содавиксэкс лия ломантнень марто, мутано од ялгат, – мизолдозь корты Мария Петровна. Нама, те виде, Мария Алдаевань ламоксть некшния минек кенярксчитнестэ, ансяк вана ней теевинь содавиксэкс те паро аванть марто.
Татьяна Маторкина