Вечкевикс ловныцят, минь поладтано евтнеме тенк эрзянь велетнеде, конат сравтовсть республиканок келес. Аволь умок минь пачколинек Орданьбуень Колазелев ды Мадышкав. Кода эрить велетне течи, тенек евтнесть тосонь эрицятне, конат котьмить эрьва чинь тевсэст ды кемить вандынь паро эрямонтень.
– Колазелень (Каласевань) велень поселениянтень совить Колазеле, Канаклейка, Мадышка, Суроделе, Лувне велетне, – ушодызе мартонок кортамонзо поселениянь прявтось Анатолий Иванович Федоров. – Велетне весе маласот, эрицятнеде тесэ лововить весемезэ 830 ломанть. Ламот уш пенсиясот. Пек мелявтовты, од ломантнеде велес эрямо кадовить пек аламо. Весе бажить ошов туеме.
Колазелень велень поселениянь роботниктне неень шкасто башка мель явить специальной военной операциянь участниктнень семиятнень марто важодемантень. Сыненст максови весе эрявикс лезксэсь.
– Весе пшкадематнень коряс снартнетяно лездамс, – тешксты велень администрациянь прявтось. – Монь телефононь номерэм семиятне содасызь, бути мезе эряви, гайневтить.
Анатолий Федоров Колазелень администрациянь прявтокс важоди 12 иеть. Сон чачсь-кассь Мадышкасо ды весе эрямонзо перть важоди тиринь енксонть лезэс. Зярдо велесэнть ульнесь колхоз, роботась агрономокс, велень хозяйствантень макссь 18 иеть. Мейле зярыя иеть ветясь личной подсобной хозяйства, кастсь-трясь ракшат.
– Эрьва кодамо тевсэ роботамс савкшнось, – корты Анатолий Иванович. – Зярдо пшкадсть тень варчамс виень велень администрациянь прявтокс, арсинь-теинь ды карминь. Вана роботан. Нама, минек роботась седе пек сюлмавозь ломантнень марто – свалшкань вастовомат, кортамот, пеняцямотнень ды мелявкстнэнь решамот.
Роботась моли истя, кода республикань ламот лия велетнесэяк. Куш кодамо тевень ды кевкстемань коряс эрицятне чиить прявтонтень.
Анатолий Иванович эсь важодемасо прявтокс кемексты вейкенть – ломантнень марто эряви муемс кель-вал ды эрьва мелявксонть решамс видестэ.
– Минек малав эрьва велесэнть неень шкасто улить Культурань кудот ды клубт, ФАПт, библиотекат, почта, важодить лавкат. Ансяк вейкесь ацирьгавты: арасть важодема таркат, – корты Анатолий Иванович. – Самай те тувталось панияк тесэнь эрицятнень вадря эрямонть мельга покш оштнес. Эдь семиянть эряви трямс, ды од ломантне уш а бажить ладямс эсь эрямонть тиринь велесэ ды чачтомс тесэ эйкакшт.
Самай те, эйкакштнень арасьчись, кармась велетнесэ школатнень пекстамонь тувталокс: Колазелесэ сонзэ пекстызь мелят, Лувнесэ ды Мадышкасо седе икеле иетнестэ. Ней эйкакштнень усксить Низовкав. Школав якицятнедеяк пек аламо, кемень ломантькак а пурнавить. Колазьвелесэ кавто этажсо кирьпецень зданиясонть жо важодить велень весе учреждениятне. Весе вейке таркасот.
Теке марто, поселениясонть важодить крестьянонь-фермерэнь хозяйстват ды индивидуальной предпринимателесь А.Ф. Наумов, конат максыть эрицятненень куш зярыя важодема таркат ды лездыть лисиця мелявкстнэнь решамосо. Хозяйстватне важодить сюронь-тикшень кастомань, сюракшов ракшань трямонь ды ловсонь нолдамонь енкстнэсэ.
Кода тешкстызе А.И. Федоров, государственной покш проектсэ велень поселениясь участия а прими, ансяк башка мель явови самообложениянь программантень. Велетнень туртов те паро лезкс. Истя, самообложениянь коряс мелят витнезель-вадрялгавтозель Канаклейкань калмолангось, икеле иестэнть – Мадышкань. Ней арсеви истят жо роботат ютавтомс Лувнень калмолангсо.
– Ламот ломантне а чарькодить те программанть лезэвчинзэ. Пелить, путсызь ярмакост, а сынь туить ков-бути лияв. Ансяк тесэ весемесь мекевлангт, программанть коряс эрицятнень эрьва целковоентень государствась яви ниле целковойть. Арази те берянь? – корты Анатолий Иванович. – Икеле вана истямо программа арасель, Колазелесэ эрькенть эсенек ярмак лангс ванськавтынек-вадрялгавтынек. А бути государстванть пельде лезкс улевель, пурназь ярмактнень лангс эште мезеяк теевлинек.
Ютазь иестэ велень администрациясь рамась косилка, штобу весе куротнень кизэнь шкастонть кирдемс ваньксстэ, а нолдамс журьбанть касоманзо. Те енкссонть важодить кеместэ.
Нама, куш косо кодамояк покш тев а теят эрицятнень лезкстэме. Улить тесэяк мелень явиця ломанть, конатне снартнить куш мейсэ лездамс чачома енксост туртов. Ламотне эйстэст уш ламо иеть эрить веенга, ялатеке эсь велест а стувтнить. Истяттнэнь ютксо – Анатолий Федорович Наумов (Сарапулсо эри), Анатолий Николаевич Карасев (Московсто), Анатолий Васильевич Бузлаев (Саранск ош, «Лидер-Компаунд» АО-сь) ды лиятне.
А стувтнить культурантькак. Кодамо веле, бути койтнень-кирдатнень а снартнить ванстомс. Эрьва ие ютавтневить велень чить, тешкставить Троицясь, Мастясь, Од иесь, раськень кенярксчитне. Од ломантне эрьва ие арсить мезеяк од. Истя, мелят Колазелесэ ульнесь ютазь пингень 90-це иетнень лувсо дискотека, тедеде пурнакшность «Седяк, гармония!» кенярксчи.
Улить велетнесэ кувака пингень эрицяткак. Ютазь иень ноябрясто 100 иензэ тешкстынзе Мадышкань эрицясь Екатерина Семеновна Журавлева. Маласо шкастонть истя жо 100 иеть топодить Колазелень эрицянтень Александра Петровна Архипованень. Теке марто, 90 иетнень печтизь 24 эрицят, 80 – 55 ломанть.
Кеме сюлмосо эрицятнень марто
Велень поселениянь прявттонть башка, малав эрьва велесэнть улить полавтыцянзо. Колазелесэ – Николай Геннадьевич Зеткин, Лувнесэ – Надежда Павловна Малышева, Мадышкасо – Мария Алексеевна Трофимова. Нурькинестэ евтнетяно эрьвадонть.
Надежда Павловна Малышева чачсь-кассь ды эри Лувне велесэ. Тетязо-авазо, Павел Григорьевич ды Ольга Михайловна Корчегановтне, весе пингест перть роботасть колхозсо. Авазо – ваз мельга якицякс, тетязо – маслозаводсо. Надежда Павловна прядызе 8 классонь школанть ды мольсь тонавтнеме Ицялонь педагогической училищав, седе тов заочна тонавтнесь Н.П. Огарев лемсэ МГУ-нь филологиянь факультестэ.
– Монень эйкакш пингестэ саезь, ансяк кода молинь школав васенце классос, пек мелезэнь тукшнось тонавтыцянь тевесь. Ды уш сестэ эстень путынь аравтома – карман учителекс. Бажамом топавтовсь, – евтни Надежда Малышева.
Важодеманзо ушодызе 1982 иестэ, велесэ. Вейке ие роботась эйдень кужосо, седе тов 26 иеть – школасо, тонавтсь сехте вишкинетнень. Мейле зярс-бути покш класстнэсэ ветясь рузонь ды эрзянь кельтнень, ульнесь внеклассной важодемань коряс организаторокс. 2007 иестэ школанть пекстызь ды Надежда Павловнань тердизь велень администрацияс. Се шкастонть саезь, важоди велень эрицятнень марто, теи весементь, мезе вийсэнзэ сынст мелявкстнэнь решамга.
Малышевтне трясть-кастсть кавто тейтерть. Покш тейтерест эри Саранскойсэ, омбоцесь – Великобританиясо. Улить семияст, эйкакшост. Сынсь мирдть-нить кирдить а покш хозяйства, кастыть эмежть, важодить. Кода тешксты Надежда Павловна, велесэ весе истя эрить.
Мария Алексеевна Трофимовань тиринь велезэ – Колазелесь. Чачсь-кассь сон ламо эйкакшонь триця семиясо. Алексей Степанович ды Татьяна Петровна Баюшкинтнэнь эйкакштнеде чачсть кото – вете тейтерть ды вейке цера. Сынсь важодсть колхозсо, кудазоравась ульнесь вадря стыця, маласо велень весе эрицятнень оршневтсь эсь кедьсэ ставт оршамотнесэ. Школанть прядомадо мейле Мария тонавтнесь Н.П. Огарев лемсэ МГУ-нь филологиянь факультетсэ. Вузонть прядомадо мейле венчась, важодеме кучизь эсь тиринь райононь Лувне велень школав. Тосо роботась пельиешка, чачсь васенце церынест, меле – тейтерест. Зярс эйкакш марто декретсэ аштесь, лиссь робота Суроделесэ, тосо ульнесь начальной школа. Истя педагогонь тевентень Мария Алексеевна макссь комсь иеть. Зярдо школанть пекстызь, робота лиссь велень администрациясо. Ды ней 16 иеть важоди тесэ.
Николай Геннадьевич Зеткин велетнень вейке поселенияс вейсэндявомадо икеле 14 иеть ульнесь Колазелень администрациянь прявтокс. Мейле аламос ардтнесь важодеме Московов, меельце колмо иетнень перть топавты велень поселениянь прявтонь полавтыцянь тевенть.
Николай Зеткин чачсь Колазелесэ. Школадо мейле тусь Саранскоев, ушодсь тонавтнеме университетсэ, эзизе прядо. 9 иеть роботась заводсо, ансяк ошсо эрямось ульнесь аволь сонзэ коряс. Ды сынь семиянек састь эрямо велев.
– Те ульнесть 90-це стака иетне, зарплатат эзть пандо, ошсо эрямс пек стакаль. Велесь жо, кода а кода, вачосто а кадтанзат, эсеть эмежть свал кастат. Стака шкатне прядовсть, ансяк мекев ошов уш эзинек туе. Ды те шкас эрятано ды важодтяно велесэ, – тешкстась Николай Геннадьевич.
...Течи Орданьбуень Колазелесэ, Мадышкасо, Лувнесэ, Канаклейкасо ды Суроделесэ эрямось моли эсь койсэ. Ломантне котьмить эсь кудоютконь тевсэст, роботыть ды кемить, сынст велетнень ули вандынь чист. Велест эште эрить!
Юлия Еремина
Фототне Егор Горинэнь.