Декабрянь 9-це чистэ Россиясо тешкставсь Тиринь масторонь Героень чись. Мордовия Республикасо те чинтень алтавсть ламо мероприятият. Вейкесь эйстэст ютась Саранскоень 88 № эйдень кужосо. Тосо уш котоце ие важоди кадетэнь группа, ков совить подготовительной группав якиця эйкакштне.
– Минек эйдень кужосо важоди 11 группа, вейкесь эйстэст лиятнень енов а молиця. Республикасо истят группат вастневить эште зярыя эйдень кужова. Кадетэнь группась кирди кеме сюлмот МР-ва Росгвардиянь Управлениянть марто. Минь вейсэ ютавттано эйкакштнень туртов мероприятият, патриотизмань акцият. Эрьва чись кадетэнь группасо ушодови Гимнань морамосто, седе тов эйкакштне теить зарядка, ютыть строевой анокстамо. Эйкакштнень ули кадетэнь эсест формаст. Сынст туртов эрьва чистэ ютавтовить патриотизмань занятият, конатнень лувсо невтевить видеоурокт ды презентацият, эйкакштне тонавтнить Тиринь масторонтень алтазь стихть ды морот. Мезесь дивавты, сынь явить тенень покш мель. Тетятне-аватне аштить каштанчисэ тень кувалма, чарькодить неть занятиятнень эрявиксчинть. Ютазь иень маень 9-це чистэ эйдень кужонь кадетэнь группась васенцеде ульнесь Изнямонь парадсо. Се чись кармась алкуксонь фуророкс. Эряви евтамс, ламот эйкакштнень ютксто бажить понгомс те группантень. Сехте вишкинетне нейке уш кортыть, келя, зярдо касыть, кармить кадетэкс. Мельспаро, минь касттано алкуксонь патриотт, – корты эйдень кужонь прявтось Ольга Владимировна Борисова.
Ольга Владимировнань ундоксонзо Дубенкань райононь. Тетязо-авазо – эрзянь ломанть. Эйдень кужонь прявтокс важоди 2008 иестэ саезь. Теде икеле роботась лия таркасо, 2010 иестэ сась 88 № эйдень кужов ды те шкас важоди теске. Эйдень кужонь коллективесь покш, эрьва важодицянть марто эряви муемс кель-вал, теке марто ламо важодема тетятнень-аватнень марто, ансяк Ольга Борисовань неть стакачитне а тандавтыть, эдь сон вечксы эсь важодеманзо, теде башка, сонзэ перька уш ламо иеть роботыть эсь тевень содыця, превей ды ероков ломанть, конатне лездыть куш кодамо тевсэ.
Истятнэнь ютксо – эйдень кужонь воспитателесь Екатерина Александровна Зямкина. Тесэ тейтерьавась важоди 13 иеть, вети старшей группанть. Сы иестэ неть эйкакштне кармить улеме кадетэкс. Секскак те иенть перть сынь кеместэ важодить патриотизмань енкссонть.
Авась чачсь Чаунзабуень Покш Маризь велесэ. Екатерина евты сюкпря тетянзо-аванзо туртов – Александр Васильевичнень ды Вера Васильевнанень. Сынь казсть тензэ уцяскав эйкакш пинге. Эште школасо тонавтнемстэ тейтересь арсесь сюлмамс эрямонзо эйкакш марто. Кавксоце классонь прядомадо мейле тусь тонавтнеме Зубова-Полянань педколледжев. Седе мейле тонавтнесь Н.П. Огарев лемсэ МГУ-со психологокс. Вузонть прядомадо мейле сась важодеме 88 № эйдень кужов.
– Ледстнян васенце важодема чинть. Талнынь пек, ансяк весе мелявкстнэ ульнесть стяко. Сюкпря евтан Светлана Васильевна Кижеваткинанень ды ламо лия ломантненень, конатне лездасть тень васенце шкасто. Важодемс эйкакш марто а шожда. Саемга, неень шкань эйкакштне истят мобильнойть ды докат, эль кенерят мельгаст. Ней ламот эйстэст аштить гаджетсэ-телефонсо, налкшкетнеяк весе электроннойть, аволь кода седе икеле. Эйкакштнень дивавтомга, свал сави арсемс кодаткак лия енов а молиця занятият ды мероприятият, – евтни воспитателесь.
Вечкевикс важодемадо башка, Екатерина Александровнань ули эште вейке сюпавчизэ – семиязо. Сон ламо эйкакшонь триця ава. Мирдензэ марто трить-кастыть колмо эйкакшт. София покш тейтерест – вузонь студентка, Настя ды Костя кавтаськетне – школасо тонавтницят. Екатерина тешксты, кодат сынь мирдензэ марто уцяскав ломанть. Эйкакш пингестэ саезь сынь арсесть покш семиядо. Мелест топавтовсь. Кода лия кудораськесэяк, Зямкинтнэнь улить эсест семиянь салавачист.
– Те коенть ладизь эйкакштне. Эрьва оймсема читнестэ сынь тетяст марто тейнить сывелень прякинеть. Монь марто лездыть панемс Покш Маризь велень рецептэнь коряс панжакай. Те рецептэнть монень евтызе авам, мон жо евтния эйкакшон туртов. Минек модамарень панжакаесь а моли лиятнень енов, эдь прякатопонтень, модамарде башка, каятано човазь сыра, пейчурька ды велькс, лиси пек тантей. Омбоце коесь – эрьва Од иенть васттано тетянок-аванок кедьсэ. Саемга, сыця иенть арсетяно вастомс мирдень тетянзо-аванзо кедьсэ. Эйкакштненень пек вечкеви велень коштось, – евтни Екатерина Александровна.
Эште вейке минек героинясь – Елена Николаевна Сульдина. Эйдень кужосо авась важоди малав 14 иеть. Тей роботамо сась од шкасто. Кода корты, вишкинестэ бажась улемс эйкакшонь врачокс, седе тов мельтне полавтовсть ды сон алтызе прянзо эйкакш марто важодемантень.
Елена Николаевнань чачома енксозо – Покш Березникень Госагыр велесь. Тетязо-авазо – эрзянь ломанть, сынь пингест перть важодсть тиринь велень колхозсо. Сонсь авась эри Саранскойсэ. Мирдензэ марто кастыть кавто тейтерькат.
– Минек важодемасо, кода лия тевсэяк, эрсить стакачить. Ансяк сынь изнявить, зярдо тон неят, кодамо лембе варштавкссо ваныть лангозот эйкакштне, кода учить тонь эрьва валот ды кутмордамот. Минь сынст туртов омбоце ават. А эдь авань важодемась аволь шождатнестэ, – корты Елена Николаевна.
Седе тов кортынек Ирина Николаевна Дорофеева марто. Од ломанесь важоди эйдень кужосо омбоце ие. Чачсь Покш Игнатовань райононь Ташто Чамза велесэ. Школань прядомадо мейле тонавтнесь Ицялонь педагогической колледжсэ, получась диплом ды сась эрямо Саранскоев. Овсе секе жо чистэнть муизе седеень коряс важодеманзо.
– Эйкакштненень вечкемась ютась тень авань пельде. Сон пингензэ перть важоди школасо эрзянь келень ды литературань тонавтыцякс. Мон вишка порасто яксинь авань уроктнес, тонавтнинь пельдензэ, кода ветямс прянть эйкакштнень марто. Монень вечкеви тонавтомс тиринь келенть ды литературанть, секскак эйдень кужосо ветян «Мордовочка» кружоконть. Содавтан эйкакштнень эрзянь келенть, раськень культуранть ды койтнень-кирдатнень марто. Вишкинетненень те тевесь вечкеви. Эрьва занятиясо минь тонавтнетяно од валт, морот, валморот ды натой налксетяно сценкат, – евтни Ирина Николаевна.
Воспитателентень важодемасо лездыть эрзянь кельсэ сермадыцятнень стихотворениянь ды прозань пусмотне. Ирина Николаевна тешксты, минек республикась мазый, сюпав эрьва кодамо раськень ломаньсэ. Секскак эйдень кужонь важодицятненень эряви тонавтомс эйкакштнень вишка порасто саезь вечкемс ды ванстомс тиринь республиканть историянзо, келензэ ды культуранзо, ансяк сестэ минек эйкакштне касыть алкуксонь патриотокс!
Алена Артемьева