Четверг, ноября 30, 2023
Важное

Владимир Иванович Ромашкин (Йовлань Оло) чачсь 1951 иестэ. Сентябрянь 6-це чистэ тензэ топодевельть бу 72 иеть. Сонзэ лементь содасызь ламо мастортнэсэ. Фольклорист, музыкант, кинодокументалист, «Торама» фольклорно-этнографической ансамблянть пурныця, сон ламо тейсь эсь раськензэ туртов. Васняяк, Владимир Ромашкинэнь покш путовксозо минек раськень фольклоронтень. Сон вельмевтинзе кезэрень моротнень, конат пурназельть ды сёрмадозельть минек республикань буетнева экспедицияв яксемстэ.


Кочкуровань райононь Вирь Тавла велесэ «Этно-кудо» музеесь Йовлань Олонь чачома чистэнзэ ютавтсь панжадо кенкшень чи. Пертьпельксэськак те чистэнть ульнесь лембе, теке кизэнь, мерят, сонгак тешкстась ине эрзянь ломаненть чачома чинзэ, кона эсь седейлембесэ эрямо пингстэ эждсь весе малавиксэнзэ. А стяко те вишка кудынесь свал ульнесь пешксе ломанде. Ды вана нейгак сядодо ламо инжеть сакшность те чистэнть Йовлань Олонь лемензэ кундамо, тевензэ-валонзо ледстямо.

Те тевенть ушодыцятне ды топавтыцятне ульнесть «Литова» эрзянь авань вейсэндявксось ды «Тюштянь налксемат» финнэнь-угрань налксематнень вельмевтемань клубось. Инжетнень эсь моросост ды налксемасост кенярдовтызь «Дворец культуры г.о. Саранск» МБУК-нь «Вармава», «Ламзурь» ды «Толава» ансамблятне. Мартост А. С. Пушкин лемсэ Национальной библиотекань краеведениянь литературань отделениянь важодицятне, прявт библиотекартне В. Б. Бояркина, В. И. Пронина ды отделэнь прявтось Н.В. Бочканова. Сынь ульнесть кезэрень коень невтицякс, налксемань ветицякс, ёвтнесть В. И. Ромашкинэнь эрямодо ды шкинемадо.

Музеень свалшкань азоравась Раиса Васильевна Водясова ды Пакся Тавла велень «Толава» ансамблясь инжетнень вастсть орта вакссо кши-сал марто. Васенцекс пачкодсть «Луховский лицей» МОУ-нь 3-це «А» классонь тонавтницятне Елена Александровна Великанова классонь ветиест марто. Аламос аштезь, састь 39-це школань 3-це «Г» классонь эйкакштне тонавтыцяст ды ильтицяст марто. Этно-кудова экскурсиядо мейле эйкакштнень марто ютавтозельть «Тюштянь налксемань» пелькстамотне: штерес сурень тапарямось, кескавсо тюремась, налонь ёртнемась, канатонь ускомась ды лият. «Литова» эрзянь авань вейсэндявксось инжетненень невтсь сёксень пек мазый кой – «Норовавань чи», конань пингстэ Нороваванть кедьстэ вешсть сюпав эмежть-сюрот. Кода корты «Литовань» прявтось Раиса Щанкина: «Минек те коесь умок ладязь, ютавтнинек сонзэ Вирь Тавласо седе икелеяк, сон пек мазый, «сюпав» эрзянь моросо, эмежсэ-норовсо». «Литовась», кезэрень моротнеде башка, ютавтсь эйкакштнень марто кенярксов налксема, лемезэ – «Кшуманнесэ». Атинекс оршнезель В.И. Алямкина, нуцькинекс ульнесь Н. В. Бочканова. Зяро ульнесть кенярдомат ды пейдемат, зярдо эйкакштнень-«кшуманнетнень» «таргсесть пандясто»! Весе те корты седе – истят коень невтематне ютавтовить аволь стяко. Сынь содавтыть вишкинетнень минек раськень культуранть марто, конась, истя потмозонзо чопавтемадо мейле, тееви седеяк мельстуицякс ды маряви истямо малавиксэкс.

Р. Б. Щанкина ледстни Владимир Ивановичень кода паро ломаненть ды тиринь масторонь алкуксонь вечкиця цёранть: «Мартонзо миненек савкшнось ламо кува яксемс. Мон якинь кода журналист, сон ардтнесь «Тораманть» марто. Сехте пек мелезэнь ледни, кода минь ульнинек Пенза ёнксонь Шемышейской райононь вейке училищасо. Од ломантне залсонть кепедекшнесть шалт. Ды Володя сэтьместэ, апак пижне стясь ды мерсь: «Шумбрат! Эрь весе вейсэ серьгедтяно «Шумбрат!». Тесэ весе залось виевстэ серьгедсь «Шумбрат!». Мейле сон макссь кевкстема: «Есть ли среди вас эрзя?» Весе чатьмонить, кияк а ёвты прянзо эрзякс. Тесэ вейке цёрынька кепедизе кедензэ: «Я – эрзя». Мейле мельганзо лияткак кармасть кедест кепсеме – ков виздемаст тусь… Сон маштсь ломань марто муеме кель-вал. Зярдояк киньгак эзь налкставто, концертт ютавтнесь аволь кувакасто, пельсь, ломантне сизить. Пек вечкиль ломантнень. Сайтяно истямо тев. Р. Г. Климкина «Сюлгамонь» морсиця ульнесь, зярдо прась сэредеме, минь, аватне, якинек варштамонзо. Мольтяно, ризнэтяно. Каршонок понгсь Владимир Иванович. Кевкстни: «Косто сатадо?». Мерян, якинек Раиса Григорьевнань варштамо, сон талнозевсь ды секе чистэнть мольсь варштамонзо. Вейке те тевеськак корты, кодамо сон пароль ломанесь. Тешкстама, сонсь эйкакшонзо тонавтынзе эрзякс, эзь пижне, эрявить школат-мезть…»

«Торамась» кода чачсь, сеске те ансамблясь невтизе прянзо. Сестэ ульнесь перестройкань шка, китне панжовсть ды сынь ладясть сюлмот ламо финнэнь-угрань мастортнэнь марто. Мейле ледстнесть, кода ульцясо эли вокзалсо кепе ды эрзянь панарсо лиснесть морамо: ярмакт икелест каильть…

Меельцекс этно-кудов састь М.Е. Евсевьев лемсэ педагогической университетэнь студенттнэ, конат обед ёнов Павел Мигунов марто тукшность «Тропа Ромашкина» туристэнь маршрутканть. Павел Валерьевич Йовлань Олонь янтнэде ёвтнесь миненек седе домкасто:
– «Тропа Ромашкина» – те туристэнь ки, конась моли тесэнь пандопрятнева, кува вечксь якамо сонсь Владимир Иванович. Минь мартонзо зярдо-бути арсинек седе, кода тесэ карми туристэнь ян. Мелезэ ульнесь теемс Тавланть туристической куншкакурокс, косо ульнесь содавикс чувтосто керсицянь школась. Сон лия мастортнэсэ несь, кода те весе тееви, ды икелепелев арсесь истямо тевде. Улезэ, нама, сюлмавозь кезэрень пингетнес чопавтеманть марто. Васняяк, эряви чиезь чиемс пандопрянтень. Ёвтамонть коряс, зярдо Тюштя инязорось пшкадсь ломантненень яттнэнь каявома шкасто, весе ушмозо (войско) чийсь инязоронзо малав – эрьвась бажась молемс тиринь масторонь ванстомо…

Од ломантне, конат явить мель спортонтень, нама, эрязасто кузить пандопрянтень, лиятне куроксто сизить ды сыргить седе састо. Янганть ютамо таркаванть аравтнезь минек эпосстонть эрьва кодат саевкст.
Молемстэ эйкакштнень кевкстнян, кие вирьсэнть тамашань прявтось (руз. главный колдун)? Сынь кармить ледстнеме эрьва кодат ёвксонь геройть. Аволь, мерян. Сехте покшось вирьсэнть – вирьванысь. Ды минь мольтяно кудынезэнзэ, косо вастыть эйсэнек сеят, кискат ды лия мезть. Кувать тува якатано, тейтяно фотографият, андтано сеят. Бути ули шка, студенттнэнь марто ютатано омбоце пандованть, валгтано мейле лия ёндо, аволь тува, кува сынек. Каршонок понги лисьмапря, косто амольдтяно ведь.

Видьстэ меремс, туристэнь истямо яннэва якамось пек лезэв весенень – эйкакштнененьгак, покштнененьгак. Ломантне рисьминекс молить виренть ёнов ды стамбарнэ кортнить эсь ютковаст, мезесь неень шкасто телефонтнэнь марто вастневи пек чуросто. Молемстэ ливчакавтови рунгось, ванськады оймесь, пертьпельксэнь мазычинтень кенярды седеесь – целанек весе те шумбралгавты ломаненть.

В. И. Ромашкиндэ ули мезде сёрмадомс. 2021 иестэ ланганзо лиссь цела книга: «Владимир Ромашкин – Тюштя нашего времени». Истят ломантнень пельде паро улевель тонавтнемс весенень, сехте пек – од ломантненень.

Марина Агафонова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».