Февралень 6-7-це читнестэ Н. П. Огарëв лемсэ МГУ-нь аудиториятнесэ ютась регионъютконь эрзянь ды мокшонь кельтнень ды литературатнень коряс 26-це олимпиадась, косо содамочист невтизь 9-11-це класстнэсэ сядодо ламо тонавтницятне.
Истя жо олимпиадань участникекс, Мордовиянсетнеде башка, кармасть региональной этапонь олимпиадань изницятне ды призёртнэ: Татарстан, Чувашия республикатнестэ, Ульяновской, Пензань, Оренбургонь областтнестэ. Тосто весемезэ сакшность 14 тонавтницят ды 8 тонавтыцят.
Филологиянь факультетэнь деканось Иван Николаевич Рябов мельспаросо вастсь инжетнень. Вузонть ды школанть ютксо кеме сюлмотнеде сон кортась кода пек эрявикс тевде:
– Эряви меремс, университетэсь кармась улеме те олимпиадань площадкакс ламо иеде икеле ды, нама, прявт тевенть теи филологиянь факультетэсь. Те минек туртов пек эрявикс тев, эдь минь несынек, кодат эйкакшт сыть те олимпиадантень ды кодат сынст содамочист. Ды, нама, неть эйкакштнень ютксто кочксетяно эстенек сыця шкань студентт. Кода свал, миненек эрявить сетне, конат вадрясто содасызь эрзянь ды мокшонь кельтнень, мейле сынст тердтяно тонавтнеме филологиянь факультетсэ.
Иван Николаевич истя жо тешкстызе стакачинтькак:
– Тиринь кельтнень коряс содамочитне ков ие яла лавшомить, тонавтницятне седе стакасто кармасть невтеме содамочист ды тесэ чумось аволь эйкакштнень. Тувталось сеньсэ, келесь кармась стувтовомо, секскак эряви седе келейстэ нолдамс тевс минсенек кельтнень интернетскак, телевиденияскак ды лия тевтнес. Аволь ансяк кудосо тетяст-аваст ютксо эйкакштне кортневельть тиринь кельсэ, истя жо школаськак седе келейстэ эйсэст нолдаволь тевс.
Тень лангс апак вано, олимпиадань коряс вешематне а полавтневить, мезде пачтясь Надежда Васильевна Салмова:
– Эрьва иестэ олимпиадас совавтовить аволь ансяк программань коряс кевкстематне, истя жо тевс нолдави лия материалгак. Олимпиадась секень кис улияк олимпиада, козонь совавтовить седе домка кевкстемат кельтнень коряс.
Чарькодеви, олимпиадась ютавтови тиринь кельтнень ванстомаст ды виевгавтомаст кис ды невти корязост тонавтницятнень содамочист.
Пелькстамонтень совавтозельть тестэнь заданият ды тиринь кельсэ сочинениянь сёрмадомась. Теде башка, практической пелькссэнть тонавтницятне невтизь эсь пряст творческой пелькстамосояк.
Зярс эйкакштне сёрмадсть олимпиада, тонавтыцятне тердезельть «Проектная деятельность в сфере преподавания мордовских языков и литературы» семинаронтень, косо вузонь преподавательтне ды кой-кона школань тонавтыцятне невтизь эсь важодемань лувонть ды од ёнкстнэнь, конатне маштовить нолдамс тевс келень ды литературань коряс уроктнесэ.
Теде мейле минь кортнинек сехте васолдо сыцятнень марто. Эрзянь келень тонавтыцясь Ирина Николаевна Русскина Оренбургонь областень Бугурусланской райононь Нуштайкина велестэ усксь кавто тонавтницят — Виктория Артёминань (8-це класс) ды Татьяна Нигматуллинань (9-це класс). Кода карминек содамо, кавонест тейтерькатне сайсть паро таркат – Татьяна изнясь келень коряс олимпиадасонть ды творческой секциясонть, Викториянень сатотсь 3-це таркась келень ды литературань пелькстамотнесэ.
И. Н. Русскина ёвтнесь Нуштайкинань школадонть: «Минек школась аволь пек покш, 9 классонь, тонавтнить 65 эйкакшт. Эрзянь келень тонавтоманть коряс улить стакачить. Васня вишка класстнэсэяк сон ветявсь, ней кадовсь ансяк покштнесэ, предметэнть саизь, кадсть ансяк факультатив ды аволь классонь занятиянь кружок. Ютавтнетяно эсь вийсэ кенярксчить, саемга, «Мордовский народ в сердце моем», «Эрзянь кель». Аволь умок 12 эйкакштне колмо чис якасть Московов, тосонь пелькстамосо морызь «Чиньжарамо» моронть ды сайсть васенце тарка. Велесэнек ней эрзякс кортыть ансяк сыре ломантне. Стакалгавты тевенть се, велесь ламо раськень, ней седе ламо казахт тосо, секскак эсь ютковаст велень эрицятне кортнить рузокс. Эряви тешкстамс, казахтнеяк тонавтнить мартонок эрзянь келенть ды, натой, валморонокак, конатнень сайнетяно «Сятко» ды «Чилисема» журналтнэстэ. Ве валсо, малавгалить минек культурантень».
Эйкакштнень туртов истямо олимпиадась – те паро кой, косо сынь теевить содавиксэкс вейкест-вейкест марто ды лия регионсто Мордовияв самось тенст маряви пек талновтыцякс. Лиякс а кода, ловт, сынь поладыть койтнень-кирдатнень ды келенть ванстоманзо эсест тиринь ёнкссо. Ёроков тейтересь Татьяна Нигматуллина мерсь: «Минь сынек эсь прянок невтеме ды виенек варчамо. Кадык велесэнек аволь пек парсте содасызь эрзянь келенть, ансяк минь сонзэ тонавтнетяно ды а стувтнетяно ундоксонок».
Лисни, од ломантнень ули мелест тонавтнемс тиринь кельтнень, домкалгавтомс ды сюпалгавтомс эсь содамочитнень корязост, мезесь пек кенярдовты.
Марина Агафонова