Исяк, ноябрянь 4-це чистэ, тешкставсь государственной прявт кенярксчитнестэ вейкесь – Раськетнень вейсэндявомань чись. Тенень октябрянь 31-це чистэ Республикань Кудосо ютавтовсь кенярксчинь промкс, конань лувсо важодемань ды общественной тевтеемасо изнявкстнэнь кисэ казезельть республикань ероков эрицятне.
Мордовиянь Прявтось тешкстызе: те кенярксчинть юрсо ашти патриотизмась ды раськетнень вейсэндявомась. 1612 иень ополчениясонть ульнесть рузт, эрзят, мокшот, татарт ды ламо лия раськеть. Сынст патриотизмась – течинь поколениянть туртов невтема.
«Минь кирдтяно мельсэнек Мининэнь ды Пожарскиень прявтсо раськень ополчениянь подвигенть. Умонь 1612 иень тевтне невтизь, кода эрьва кодамо раськень ды пазнэнь кемемань ломантне вейсэндявсть ятонть каршо, мезесь алкукс идизе минек масторонть западонь ятонть каявомадонть, идизе минек государственностенть. Течи кенярксчись канды башка смусть минек туртов. Эряви цидярдомс ды изнямс, минек историянь ундокстнэнь, минек культуранть ды койтнень лангс нежедезь», – мерсь Артем Здунов.
Течи минек масторось вейсэндявсь ды топавты вейсэнь важодема фронтонтень лездамонть коряс. «Мон евтан сюкпря весенень, кие ней виевстэ тюри передовойсэ, кие лезды минек боецтнэнень специальной военной операциянть шкасто, минек границянь регионтнэнень – весенень, кие теи путовкс минек Изнямонтень!» – тешкстызе региононь руководителесь.
Сюкпрянь башка валт республикань Прявтось евтась сетненень, кить ветить од ломантнень марто патриотической тевтееманть, лездыть историянь тевтнень реставрациясонть, кирдить мельсэ ледстнематнень, якить мемориалтнэнь мельга ды панжить од кеврунгот, ветить историянь урокт. «Сюкпря весенень тынк виде важодеманть, масторонть ды минек республиканть эрямосо ероков улеманть кисэ. Арсян тенк кеме шумбрачи, паро эрямо, од изнявкст. Кадык вейсэндявомась свал моли минек Россиянть ды минек республиканть марто!» – мерсь Артем Здунов.
Раськетнень вейсэндявомань чинть кувалма поздоровт истя жо евтасть МР-нь Госсобраниянь Председателесь Владимир Чибиркин ды МР-нь Правительствань Председателесь Батыр Эмеев.
Казнеть явшезь эрьва кодамо профессиянь ломантненень. РФ-нь Президентэнть Указонзо коряс воинской долгонть топавтомсто невтезь мужестванть, отваганть ды апелемачинть кисэ Мужествань орденсэ казезь боевой тевтеематнень ветеранось, специальной военной операциянь участникесь Дмитрий Глазков. Истя жо сонензэ максозь «За храбрость» II степенень медаль. Истямо жо наградасо казезь боевой тевтеемань ветеранось, специальной военной операциянь участникесь Сергей Володин. «За отвагу» медальсэ казезь боевой тевтеематнень ветеранось, специальной военной операциянь участникесь Владислав Федькин.
«За заслуги перед Отечеством» орденэнь II степенень медальсэ казезь «Биохимик» АО-нь инвестициятнень виевгавтомань коряс прявтось Татьяна Лысова ды «Всероссийское ордена Трудового Красного Знамени общество слепых» Мордовия Республикань общественной организациянь председателесь Марина Пуряева.
МР-нь Прявтонть Указонзо коряс машиностроениянь енкссо покш изнявкстнэнь кисэ Мордовия Республикань Славань I степенень орденсэ казезь «Мордовское Агротехническое Машиностроение» АО-нь управляющей директорось Геннадий Громов. Мордовия Республикань Славань орденэнь полной Кавалерэнть лемс гайгсь МР-нь Государственной гимнась.
Мордовиянь зярыя эрицятненень максозь «Лауреат премии Главы Республики Мордовия «Национальное достояние» лемесь. Казезтнень ютксо – «Юлдаш» газетань прявт редакторось Камиль Тангалычев, Покш Березникень райононь «Теремок» 1 № эйдень кужонь воспитателесь Ольга Маркина, Н.П. Огарев лемсэ МГУ-нь Раськень культурань институтонь СПО-нь отделениянь концертмейстерэсь Василий Родионов, МР-нь Народной артистэсь Николай Большаков, Покш Березникень райононь «Память» поисковой отрядонь ветицясь Сергей Косынкин, Лямбирень райононь Покш Елховкань школань рузонь келень ды литературань тонавтыцясь Тамара Разумова.
Весе казезтнень вейсэнди эсь тевентень, эсь модантень ды эсь семиянтень вечкемась.
«Минек семиясо ниле эйкакшт. Мирдем Юрий Михайлович марто кастынек колмо тейтерькат ды цера, – евтнесь журналисттнэнень эйдень кужонь воспитателесь Ольга Маркина. – Минь мартонзо касынек ламо эйкакшонь триця семиятнесэ. Весе ояксчисэ эрицят – кеместэ аштить вейке-вейкень кисэ! Покш семиянь койтнень пачтятано эсенек эйкакштнененьгак. Покш тейтеренек туртов 29 иеть, мирдензэ марто сынст ниле цераст! Ансяк тейтерькаяк эряви! Мон важодян эйдень кужосо, тонавтан вишкинетнень чевтечинтень, видечинтень, Тиринь енксонтень ды Россиянтень вечкемантень!» Ольга Ивановна марто интервьюнть седе келейстэ ловнодо газетань сыця номертнэстэ.
Юлия Еремина