Декабрянь 21-це чистэ Республикань Культурань кудосо ютавтовсь «Шумбрат, Мордовия!» раськень шкинемань республикань XXVIII-це фестивалень-пелькстамонь лауреаттнэнь ды дипломанттнэнь Гала-концертэсь. Республикань культурань эрямосонть те эрьва иень сехте редявикс тев.
Артисттнэнень ды инжетненень поздоровонь валт ёвтась Мордовиянь Прявтось Артём Здунов. «Шумбрат, Мордовия!» фестивалесь – те минек сюпавчи. Сон апак пеле эскели республиканть ды масторонть келес, – тешкстызе региононь руководителесь. – Мордовиясь пек вадрясто пряды иенть, секскак миненек эряви невтемс, што оймсемеяк машттано. Минь ламо тейтяно эсь раськень культуранть, келенть ванстоманть туртов – важодтяно электронной ютавтыцятнень, валкстнэнь, оршамопельтнень, раськень ярсамопельтнень коряс. Весементь тень миненек эряви ванстомс эйкакштнень ды нуцькатнень туртов».
Республикань Прявтось ледстизе: меельце иетнестэ Мордовиясо строязь ды педе-пев витнезь велень культурань колоньгеменде ламо учрежденият, рамазь музыкальной од инструментт эйкакшонь искусствань кемгавтово школатнес, колмо театратнес ды ниле музейтнес, учомасо – РДК-нь витнемась.
Виевгады сонсь фестивалесь – тедеде сонзэ участникекс кармасть 5 тёжадо ламо ломанть республикань 120 оштнестэ ды велетнестэ. Сынст ютксо – специальной военной операциянь ветерантнэ ды сынст семиятне.
Региононь руководителесь явшесь государственной наградат культурасо изнявкстнэнь ды фестивальсэнть ёрокчинть невтеманть кисэ.
Мордовиянь Прявтось истя жо казинзе эрьва кодат номинациятнесэ призёртнэнь ды изницятнень.
«Лучший патриотический концерт» номинациясонть фестивалень диплом максозь Ромодановань райононтень, «Лучший патриотический номер» номинациясонть – специальной военной операциянь участникентень, боевой тевтнень ветеранонтень Дмитрий Волковнень.
Темниковань районось изнясь «Верность и преданность народным традициям» номинациясонть, сон истя жо кармась «Мастерство земли мордовской» декоративно-прикладной ды изобразительной искусствань выставкань лауреатокс. «Семьи героев» номинациясонть фестивалень дипломт максозь Матвей Матвеевнень (Инсаронь район), Артём Кочневнень (Рузаевкань район), Виктория Харитонованень (Лямбирень район), Ирина Мурашеванень (Теньгушевань район), Павел Зевайкиннэнь, Регина Егорованень, Рустам Юсуповнень, Юлия Жданкинанень, Валерия Макарованень (Саранск ошонь округ).
«Душа фестиваля» номинациясонть изнясь Евгений Самаркин – Казанень Пазонь Авань пазавань лемсэ храмонь протоиереесь (Орданьбуень район, Жарёнки веле);
«Творческая семейная династия фестиваля» номинациясонть – Канаевтнень семиясь (Рузаевкань район, Левжа веле);
«Самобытный музыкант» номинациясонть – Иван Сургаев, Мордовия Республикань культурань заслуженной важодицясь, Мордовия Республикань Прявтонь премиянь лауреатось, тиринь кельсэ моротнень сёрмадыцясь-морыцясь (Темниковань район).
«Лучший коллектив-спутник» номинациясонть фестивалень диплом максозь Ташто Шайговань райононь Раськень культурань куншкакуронь «Лаймоня» эйкакшонь фольклоронь ансамблянтень. Ансамблянь руководителесь Виктор Пивкин изнясь «Лучший наставник коллектива-спутника» номинациясонть.
«Семейная пара педагогов-наставников» номинациясонть фестивалень диплом максозь Борис ды Светлана Слепцовтненень (Саранск ошонь округ).
Фестивалень сехте талновтыця пельксэсь – цётавкстнэнь ёвтамось.
Покш цётавкстнэнь ды «Шумбрат, Мордовия!» Раськень шкинемань республикань XXVIII-це фестиваленть-пелькстамонть анокстамосо ды ютавтомасо ёрокчинть невтеманть кисэ «Муниципальные образования с численностью населения до 10 000 человек» номинациясонть III-це степенень лауреатонь диплом максозь Отяжелень райононь шкинемань коллективтненень.
II-це степенень лауреатонь диплом максозь Зубова-Полянань райононь шкинемань коллективтненень.
I-це степенень лауреатонь дипломсо тешкстазь Покш Березникень райононь коллективтне.
Фестивалень Гран-прись – Ташто Шайговань райононь артисттнэнь.
«Муниципальные образования с численностью населения свыше 10 000 человек» номинациясонть III-це степенень лауреатонь диплом максозь Рузаевкань райононь шкинемань коллективтненень.
II-це степенень лауреатонь дипломось – Лямбирень райононть.
I-це степенень лауреатонь дипломось – Краснослободской райононть. Истя жо выставкань композициянь вадрясто анокстамонть кисэ Краснослободскоень районось кармась «Мастерство земли мордовской» декоративно-прикладной ды изобразительной искусствань выставкань лауреатокс.
Те номинациясонть Гран-прись максозь Ковылкинань райононь шкинемань коллективтненень.
«Мастерство земли мордовской» декоративно-прикладной ды изобразительной искусствань выставкань анокстамосо покш цётавкстнэнь кисэ лауреатонь дипломось максозь Теньгушевань райононтень.
Концертэнь программань теемасо профессиональной покш уровененть кисэ башка дипломсо казезь Саранск ошонь округонь шкинемань коллективтне.
Тиринь ёнксонь раськень промыслатнень ды ремеслатнень ванстоманть ды сюпалгавтоманть, «Мастерство земли мордовской» декоративно-прикладной ды изобразительной искусствань выставкань анокстамосо покш невтевкстнэнь кисэ фестивалень диплом максозь Орданьбуень райононтень.