Декабрянь 20-це чистэ А. С. Пушкин лемсэ Национальной библиотекань актовой залсо казезельть эйдень кужов якицятне ды школань тонавтницятне – Равчирень финнэнь-угрань культурань центрань «Финнэнь-угрань теште – 2025» республиканской пелькстамосонть изницятне. Саранск ошонь, Инсаронь, Рузаевкань, Лямбирень, Кочкуровань районтнэнь образовательной ды художественной школатнень тонавтыцятне ды тонавтницятне ноябрянь 19-це чистэ саезь декабрянь 13-це чис анокстасть малав 260 мельстуиця важодемат. Эйстэдест сядотне кармасть изницякс ды призёрокс. Сынь казезельть дипломсо ды ламбамо казнесэ.
Финнэнь-угрань «тештетне» дивавтымизь эсь мазычисэст ды вейке омбоце ёнов амолемасост. Суресэ ды човалясо викшнезь, чувто ды фарфор ланга артозь, сёвонень, чувтонь, олгонь, коцтонь, войлоконь ды натой пряникень, мазылгавтозь раськень сёрмасо – весе сынь теезь эйкакштнень, тетятнень-аватнень, тонавтыцятнень кедьсэ.
Ламо тештинеть анокстасть Саранск ошонь 8, 79, 85, 93, 103, 127 №№ эйдень кужотне ды 17, 19 №№ школатне. Гран-принть саизе Барашкина Софья, Саранск ошонь 41-це школань 1 «А» классонь тонавтницясь.
Од иеде икеле те пелькстамось казсь алкуксонь кенярксчинь ëжо ды невтизе минек раськень культурань мазычинть!