Маень 24-це чистэ республикань школатнесэ ютавтовсть линейкат – весень туртов гайгсь меельце баягинесь. Веенстнэнень учовсть кизэнь каникулатне, а вана 9-це ды 11-це класстнэнь прядыцятнень ней а шожда шкаст – неть читнестэ ушодовсть государственной экзаментнэ. Эряви меремс, сынст вадрясто максоманть коряс мелявтыть аволь ансяк эйкакштне, пек мелявтыть тонавтыцятнеяк. Эдь те сынст содамочитненьгак ваннома: кода ды мезе маштсть максомс эсь тонавтницятненень.
Аволь умок минь вастовкшнынек Орданьбуень райононь Низовкань средней общеобразовательной школань тонавтыцятнень марто. Сынь евтнесть эсь школанть ланга, эйкакштнень марто важодемадонть ды кортасть талновтыця кевкстематнеде, конатнестэ сехте прявтось – пекстасызь-арась школанть сы тонавтнема иестэнть. Ды пек кецявты, бути зярс те кевкстемась а талновты. Ансяк истят велетне ков седе ие яла аламолгадыть.
Орданьбуень Низовка велень школась сеть уцяскавтнень ютксо, косо улить тонавтницят. Тонавтнема иенть прядовомс 11 класстнэсэ лововсь 101 эйкакш. Ансяк, тагояк 70 тонавтницятнень усксить 3 автобуссо 13 маласо аштиця велетнестэ. Теде башка, Куцян велесэ зярс кадовсь филиалост, тосо 15 тонавтницят. Школанть юрсо важоди эйдень кужо, ков якить 17 эйкакшт. Тонавтыцят улить весе предметтнэнь коряс, сындест 21 ломань.
Школань прявтось Юрий Геннадьевич Бедин важоди Низовкасо 2012 иестэ саезь. Сонзэ тиринь Пиксяси велесэ школанть пекстызь уш 2016 иестэ. Юрий Геннадьевич ризнэзь корты велень вандынь чиденть – сехте вишкине классось – 1-цесь, тосо ансяк 2 эйкакшт. Лиятнесэ – 8-9, сехте покш классось – 9-цесь, косо 17 ломанть. Ды а содави, зяро кадовить тонавтнеме 10-це классос. Школась жо Низовкасо пек вадря. Вете иеде икеле «Образование» нацпроектэнть вельде тесэ панжозель «Точка роста» ды ускозель эрьва кодамо оборудования. Одкстомтозельть информатикань, трудонь ды ОБЖ-нь кабинеттнэ. Школасонть покш мель явови спортонтеньгак. Спортзалдо башка, школанть вальмало теезь неень шкань вешематнень коряс комплексной стадион: тельня валови кирякстнемань тарка – эйкакштне налксить хоккейсэ, кизна чевте газононть лангсо – футболсо. Юрий Геннадьевич ашти каштанчисэ тонавтницянзо кувалма: «Ниле иеть мельга-мельцек сокссо ардтнемань спартакиадасо эйкакштне сайнесть васенце таркат. Сестэ изнямонь кис школантень макснильть ярмакт, конатнень лангс рамазель од спортивной инвентарь: сокст ды оскат».
Тонавтыцятнень седеест сэреди вейкень кис – Орданьбуень районсо ламо покш велеть, а вана школат тосо арасть. «Седеесь кирьмицяви – ардат велетнева – кудотне аштить чавот. Тувталось чарькодеви – важодема таркат арасть… Секскак одтнэ тей а лиядыть, сыретне кулыть, истя велетне чамитькак. Кецнетяно, минек велесэ эште чийнить эйкакшт», – корты школань прявтось.
Икеле иетнестэ Низовкань школанть ламот прядызь сырнень медаль марто ды ней важодить врачокс, тонавтыцякс... Тешкстасынек, школась тесэ национальной: эрзянь келесь ды литературась тонавтови кода предмет, оценкась путови аттестатскак. Тесэ тонавтнесь филологиянь наукань кандидатось, Н.П. Огарев лемсэ МГУ-нь филологиянь факультетэнь эрзянь келень кафедрань доцентэсь Елена Филипповна Клементьева. Ламотнень содасызь «Сятко» ды «Чилисема» журналонь ловныцятне. Неть: Наталья Жочкина, Алеся Клементьева, Анна Калинкина, Елизавета Удельнова – сынь сермадыть эрзянь кельсэ валморот, евтнемат. Миньгак сынст парсте содасынек. Весе сынь пек лембестэ ледстнить эсь вечкевикс тонавтыцяст – Зоя Викторовна Клементьевань. Умок ульнесь меленек теевемс содавиксэкс те алкуксонь тонавтыцянть марто, конась машты кирвазтеме эйкакштнень оймесэ шкинемань сяткине. Ды вана меленек топавтовсь – кортнинек мартонзо.
Кода карминек содамо, Зоя Викторовна Низовкань школасо ськамонзо высшей категория марто тонавтыця. Чачсь-кассь теске, Низовкасо. 11 классто мейле Зоя Дугушкина (тейтерьксэнь фамилиязо) од тейтересь тусь тонавтнеме Ицялонь педучилищав, конань прядомадо мейле сась тонавтомо эсензэ школав. Сестэ директорокс важодсь Светлана Михайловна Ермолаева, конась ней велень прявт. Сонзэ ульнесь мелезэ, штобу Зоя Викторовна поладовлизе тонавтнеманзо М.Е. Евсевьев лемсэ пединститутонь (ней университет) филологиянь факультетсэ. Тейтересь истя тейськак. Аламо шкань ютазь, лиссь мирденень эсест велень цера экшс, кона марто кастсть кавто тейтерть. Зоя Викторовна важоди Низовкань школасо эрзянь келень ды литературань тонавтыцякс 1994 иестэ саезь. Эстензэ эрзянь келень вечкемась сась тонавтыцяст Вера Ивановна Клементьевань пельде. Сон маштыль пек мазыйстэ эрзякс кортамо, парсте мероприятиянь ветямо. Самай сон ушодсь пурнамо школань музеенть. Сон прок сятколь, кона кирвазтсь весень эсь перьканзо, кода покштнень, истя вишкинетненьгак.
Эсензэ важодемадо Зоя Викторовна евтни покш вечкема марто:
– Эрьва ломанесь кочки эстензэ ки эли, паряк, Пазось тензэ максы те кинть. Арсян, пек уцяскаван сень коряс, мекс муия эсь прям тонавтыцянь тевсэнть. Койсэнь, семиясон ульнесь тень туртов покш невтевкс – авамгак ды бабамгак тонавтыцяльть. Авань ялганзояк весе тонавтыцяльть. Сынст тевест-валост ютасть монь сельме икельга. Тонавтымизь эрьва мезень тееме, вишка пингестэ саезь карминь лездамо аванень, мейле уш эстеньгак кочкия те кинть ды те шкас важодян, бажан урокто башка теемс тонавтыцянь лия тевтькак.
Ней тонавтницятнень эйстэ ламо рузт, ансяк, тень лангс апак вано, сыньгак бажить тонавтомс эрзянь келенть. Мельстуицякс тенст марявить эрзянь келень уроктне, конат сеедьстэ ютавтневить кода семинарт, кенярксчить, музеень част, косо ламо мезе евтнить икелень эрямодо велень сыре ломантнеяк. Те тенст пек вечкеви.
Неень шкась веши ламо полавтовомат эрямосонок. Минськак телефонтомо ней ковгак. Секскак эйкакштненень эряви таштонть невтемс од полавтовоматнень вельде. Кода мерсь республикань культурань министрась Светлана Баулина, эряви муемс сехте сыренть, сехте кезэренсенть, тень таргамс ды невтемс шкань вешематнень коряс. Минек важодемасояк те эряви, эдь культурась ды образованиясь сюлмавозь вейкест-вейкест марто. Саемга, интерактивной доскатне максыть лезкс тонавтницятненень. Мартонзо седе кепедеви мелест-бажамост те эли тона заданиянть топавтомсто.
Зоя Викторовнань тонавтницянзо примить участия эрьва кодамо пелькстамосо ды олимпиадасо. Сайнить изнямонь таркат, мезесь пек кенярдовты тонавтыцяст. Меельцеде тонавтницянзо невтизь содамочист районсо – колмо изницят, вейке призер. Регионъютконь этапсонть те иестэнть сайсть 1-це тарка литературань коряс. А умок ютась Северо-Восточной федеральной олимпиада, косо лиссть 2-це таркас.
Эряви тешкстамс, тонавтыцянть ламо изницянзо творческой секциясо. Весемесь ушодовсь эсензэ тейтерензэ эйстэ. Алеся Клементьева а весть якась исследовательской конференцияв, косо ютынзе райононь, регионъютконь этаптнень ды сайнесь таркат. 2016 иестэ ильтякшнызь Мордовиясто федеральной олимпиадав, конась ютавтовсь Московсо Федерациянь Советсэ, тосо лисекшнесь призерокс. Кода прядызе филологиянь факультетэнь 1-це курсонть, кучокшнызь Венгрияв тонавтнеме.
«Мейле сонзэ мельга кармась истя жо важодеме Аня Калинкина. Сонгак келень ды литературань коряс ламо изнямо таркат сайнесь. Сон истямо тештине школасонок ульнесь, мазый тейтерне, сермадовксонзо пек мельстуицят нейгак. Мельганзо шкинемань кинть лангс стясь Лиза Удельнова. Сындест башка сермадыцянь тевентень кундакшность лиятнеяк. Неть: Аня Тюгашкина, Ирина Гусарова, конатнень марто ламо важодинек», – евтни тонавтыцясь.
– Зоя Викторовна, евтадо, инескеть, кода редятадо эйкакштнесэ творческой енксонть?
– Кона эйкакшось творческой, сон сеске редяви. Задания максат, неяви, кода тейсы. Тешкстат эстеть, те вана эйкакшонть ули сермадомас ерокчизэ, эряви кастомс. Эрьва кодат вешнян тевень топавтомань лувт. Аволь ансяк мон сынст тонавтан, монськак мартост апак лотксе тонавтнян. Мелень кепедезь мельгаст ванан. Кой-конатне истя мазыйстэ сермадыть, превскак а саеви. Лиясто эйкакшось, мерят, зоровиця, ансяк максат тев ды дивазеват, кода сон парсте тейсы. Эрьва эйкакшсонть мезе-бути ули, ансяк тень эряви тенек редямс, виензавтомс. Сыремтемс вишка толгельстэ покш толнэ.
Мезесь кецявты Зоя Викторовнань, школань прядомадо мейле ламот саить мель тонавтнемс филологиянь факультетсэ. Ды, нама, теньсэ покш путовксозо школань тонавтыцянть, кона кирвазтизе эйкакшонть оймес тиринь келентень вечкеманть. Эрьва лементь тонавтыцясь кирди мельсэнзэ. Вере евтазтнеде башка, неть эште Альбина Головина, Нина Несытова, Кристина Асанова… Весе, кие марто сон важодсь, кочкизь филологиянь направлениянть. Алеся, Лиза ды Аня получакшность Мордовия Республикань Прявтонь литературной премият. Нама, эйкакштнень изнямост – эрьва тонавтыцянть каштанчизэ.
Зоя Викторовна сонськак ломанесь пек творческой – тонавтыцясь машты пек мазыйстэ рисовамо. Те тевенть, келя, вечкилизе вишка пингестэ саезь. Тень кисэ тагояк евты сюкпря Юрий Александрович Учеватовнень, рисованиянь ды черчениянь тонавтыцянзо туртов. Сон пек строгоель, вечксь ванькс важодемат, келя, чертежтнесэ эрьва точкинесь ды эрьва кикскесь таркасонзо улевель, эзь вечке мельде-валдонь тевть. Те енксось мейле пек маштовсь важодемасо.
Зоя Викторовна зярдояк а аштекшни тевтеме. Минек марто кортамодо мейле капшась анокстамо од пелькстамос. Аволь ансяк эйкакштне, сон сонськак прими участия профессиональной конкурстнэсэ. Мелят тиринь келень кабинетэнь пелькстамосо Мордовиянь келес сайсь васенце тарка. Теде башка, сон вети Эрзянь-мокшонь раськень вейсэндявксонь исполкомонь тевть. «Важодемадонть свал ламо ды, мезесь кенярдовты – сон вечкевикс. Эрьва чинть вастан паро мельсэ. Ды ков саты вием, топавтан вечкевикс тевем», – кемекстызе тонавтыцясь.
Арсетяно Зоя Викторовнанень шумбрачи, валдо эрямо ды кирвазтемс эште аволь вейке седей тиринь келень вечкемантень.
Марина Агафонова