Екатерина Николаевна Фирсова Равчирень финнэнь-угрань раськень культурань центрань прявтокс важоди аволь пек умок. Те енкссонть сон ломанесь од, теке марто ламос бажиця. Кода тешкстызе, сон весементь эште тонавтни. Ды пек паро, улить вадря тонавтыцянзо – эсь тевенть педе-пес содыця коллективезэ, конатнень марто важодемась – покш уцяска.
Течи Екатерина Николаевна – минек редакциянь инже.
Екатерина Фирсова чачсь Покш Березникбуень Кузым эрзянь велесэ. 3-це классонь прядомадо мейле, зярдо сонензэ ульнесть кемень иеть, семиянек састь эрямо Саранскоев. Школадо мейле кочкизе М.Е. Евсевьев лемсэ педагогической институтонть (ней – университет), тонавтнесь вишка классонь тонавтыцянь тевентень. Вузонть прядомадо мейле зярс-бути роботась профессиянь коряс, седе тов кемень иеть макссь музейной тевентень – важодсь 1941–1945 иетнень военной ды трудовой подвигень Мемориальной музейсэ. Ней Екатерина Николаевнань лавтов лангсо Равчирень финнэнь-угрань раськень культурань центрась.
– Важодемань аравтлувтнеде минек кемекстазь ламо. Коллективесь (весемезэ 6 ломанть) тесэ творческой, весе эрязат, превейть, куш мезес чарькодицят. Покш сюкпря тенст, васенце чистэ саезь, кода монь ладимизь прявтокс, весемесэ тень лездыть, пельдест ламос тонавтнян, – евтни Екатерина Николаевна.
Равчирень финнэнь-угрань раськень культурань куншкакуронть важодемазо токши ламо енкст. Васняяк, финнэнь-угрань раськетнень ванстомась: сынст коест-кирдаст, культураст, шкинемаст. Тенень алтазь ламо вастовомат, пелькстамот, мастер-класст.
– Финнэнь-угрань раськетнеде эдь мереви евтнемс куш кода: мазылгавтоматнень, артовкстнэнь, декоративно-прикладной творчестванть вельде. Пек мельс тукшныть минек Од иень пелькстамотне, конатнень прявтсо истя жо ашти финнэнь-угрань тематикась. Тедеде истя жо арсеви «Финно-угорская новогодняя елочная игрушка» республикань пелькстамось, – тешкстызе Екатерина Фирсова. – Истя жо минек важодемасо прявт таркасо ашти исторической ледстнематнень ванстомась. Патриотической енкссонть арсеви боевой тевтеемань ветерантнэнь марто вейсэнь проект. Тень коряс роботась ушодови уш маласо шкастонть. Россиянь раськетнень вейсэндявомань иентень январьстэ ушодовсь «Многонациональная Мордовия» мультимедийной проекттнэнь пелькстамось.
Кода евтнесь Екатерина Николаевна, Россиянь раськетнень вейсэндявомань иентень истя жо арсеви раськень культуратнень музыкальной онлайн-марафон. Равчирень финнэнь-угрань раськетнень культурань куншкакурось Мордовия Республикань Культурань, раськень политикань ды архивень тевень министерстванть лезксэнзэ вельде полады дошкольной учреждениятнесэ «Тропою традиций» интерактивной образовательной этнотуристической проектэнть эрямос совавтоманзо. Проектэсь невти мельстуиця путешествия региононь раськень культурань, историянь ды койтнень-кирдатнень масторонтень. Сонзэ прявт тевезэ – од ломантнень эсь этнической лия енов а молеманть марто содавтомась ды минек покштятнень-бабатнень культурань тевкадовксонтень мелень явомась.
Покш важодема ветяви школасо тонавтницятнень, ссузонь ды вузонь студенттнэнь марто. Кода мерсь Екатерина Фирсова, куншкакурось важоди сень туртов, штобу ванстомс тиринь кельтнень, кемекстамс важодеманть лия регионтнэнь марто (улить регионъютконь проектт), штобу раськетнень ютксо ояксчись ванстоволь седе товгак.
– Чарькодеви, покш мель карматано явомо культурантень. Культурась – эрьва раськенть оймезэ. Сонзэ коряс онкстнить эсензэ раськенть виензэ, сюпавчинзэ. Секс эряви минек раськенть, финнэнь-угрань лия раськетнень культураст седе парсте невтемс эрьва ендо кода Россиясо, истя лия мастортнэсэяк, – кемекстызе Екатерина Николаевна. – Седе тов карматано важодеме минек раськень кельтнень, койтнень-кирдатнень ванстоманть коряс, ютавтомо седе ламо мероприятият. Эряви седе сеедьстэ вастневемс ды кортамс. Ансяк истя минек бажамотне пачтявить эйкакштнень седейтнес. Монь тетям кортыль: бути куш кодамо тевенть нолдамс эсь седееть пачк, те теи сэредькс. Теке марто ансяк истя, паро сэредьксэнть вельде, токшевить лиятнень седеест. Ды ансяк истя кармить вадря невтевкст.
Весемесь юты
семиясто
Екатерина Фирсовань тетязо-авазо – Николай Андреевич ды Елена Николаевна Кручинкинтнэ – эрзянь ломанть. Сынь комсьветееде ламо иеть важодсть Кузым велень школасо тонавтыцякс. Тетянзо лемезэ содавикс аволь ансяк Мордовиясо, сонзэ томбалеяк. Сон – «Поиск» патриотической вейсэндявксонь ды Мордовиясо поисковой движениянь ушодыцяль. Аволь умок Николай Андреевич тусь юткстонок. Авазо жо мирдензэ туртов свал ульнесь кеме нежекс ды васенце лездыцякс.
Секскак тонавтыцянь профессиянть Екатерина кочкизе а стяко, Кручинкинтнэнь кудораськесэ те тевенть марто сюлмавозь цела династия – 50-де ламо ломанть.
– Мон касынь истямо семиясо, косо книгатнень ловномась свал ульнесь вечкевикс тевекс. Тетянь ульнесь цела библиотека. Ды, нама, книгань ловноманть вечкилинь монгак. Ней вана седе ламо ловнан эрзянь кельсэ книгат. Бажан седе вадрясто тонавтнемс эсь тиринь келенть, – тешксты Екатерина Николаевна.
Кручинкинтнэнь семиясо кассть колмо эйкакшт. Екатерина – юткстост сехте вишкинесь, улить эште кавто лелянзо. Ды вишкинестэ саезь сынст трясть-кастсть педагогикань ды патриотизмань лувсо.
– Ды истямо лувось монень, арсян, ютась тетянь-авань ды покштянь-бабань верь марто. Монь покштям – Андрей Михайлович Кручинкин – Ине Отечественной войнань участник, Сурань оборонительной рубежень теиця. Бабам, Ольга Андреевна, истя жо Сурань рубежень теицятнень ютксоль. Покштям – Покш Березниксэ «Сурский рубеж» мемориалонь комплексэнь фигуратнень прообразтнэстэ вейкесь, – мерсь Екатерина Фирсова.
Истямо семиясо касозь, косо патриотизмась свал васенце таркасо, Екатерина Николаевна, нама, кода тетязо ды ялаксонзо, примась участия поисковой важодемасонть. Сон ютась комсте ламо экспедицият. Тензэ, кода тейтерентень, нама, ульнесь а шожда, ансяк чавовозь солдаттнэнь кадовксост муевкстнэ ды сынст малавиксэст марто вастовоматне – неть ежомарямотне а онкставить кодамояк стакачисэ. Те весемесь пек питней.
Фирсовтнень семиясо касыть кавто церынеть – Роман ды Михаил. Покшонтень 14 иеть ды сон покш мель яви историянтень. Тонавтни Саранск ошонь 28 № школасо, косо ули пек паро поисковой отряд, конань прявтозо А.И. Планкин пек ламо важоди эйкакштнень марто. Арсеви, церынесь поладсы покштянзо ине тевенть.
Юлия Еремина
Фототне
Егор Горинэнь.