Орданьбуень Баеньбуе велесэ «Вастома» ансамблянть содасызь весе, сынстемест а ютни вейкеяк кенярксчи. 2008 иестэ Нина Раскинань ладизь ветеранонь советэнь прявтокс. Сестэ сонензэ сась арсема пурнамс ансамбля, конась карми вельмевтеме ды виевгавтомо течинь чис ванстовозенть. Истя лисськак, Нина Ивановнань мелензэ кирдизь ды ансамблясь пурназель. Тов совасть тонавтыцят, ловнома кудосо, велень советсэ важодицят ды лият.
Кода тешкстыть ансамблясонть морсицятне, моротнестэ ламотнень тенст лездасть пурнамс велень эрицятне. Аватне яксесть сыре ломантнень кудова, кунсолость эйсэст, марязенть сермалесть. Ды истя репертуарось пурназель, вайгельтне ладязельть.
Эряви меремс, ансамблянть репертуарозо сюпав, кода тов совицятнеяк. Эйсэнзэ морсить эрзяват, мокшават ды рузават. Ялатеке сынь тешкстыть: вечкевикс морост – эрзянь.
– Мон чачинь-касынь Сыре Шайговань буесэ. Зярдо сынь Баеньбуев, а сеске чарькодинь келенть. Ней жо, ламо иень ютазь, кельтне човорявсть. Ялатеке, зярдо моратано эрзянь кезэрень морот, а сеске чарькодевить валтнэ. Сюкпря оян туртов, свал евтасызь, кода седе парсте гайги те эли тона морось. Минек велень эрицятне пек вечксызь концертэнек. Свал кевкстнить, зярдо карматано морамо ды ежост паролгавтомо. Неть валтнэде минекак меленек касы, чачить од вийть седе товгак а кадомс морамонь тевенть, – корты ансамблянь морыцясь Нина Раскина.
Кода кенярдокшность аватне, зярдо ансамбляст тердизь «Шумбрат, Мордовия!» фестивалев. Тосо сынь теевсть содавиксэкс лия морыцятнень марто, конатнень марто ялгаксчи кирдить течинь чис. Тешкстама, «Вастомась» аволь весть изнякшнось райононь пелькстамотнесэ.
Сынст велень эрьва покш чись эли вастовомась ушодовкшны «Баеньбуе велесь сюпав ды мазый…» моросонть. Аватне мерсть, те сынст визиткаст. Ялатеке сехте вечкевикс морост – «Вай, луга, луга».
Зярдо аватнень кевкстьсызь вадрясто морамонь прявт салавачидест – сынь ве вайгельсэ мерить: эрьва чинь репетициятне. Зярдо аватне ушодыть анокстамо концертс, сестэ тенст а марявияк кода шкась ливтязь ливти.
– Малав 40 иеть важодинь школасо, эйкакштнень тонавтынь рузонь келентень ды литературантень. Важодема шканеяк вечкилия морамо тевенть. Сынь ансамблянтень 18 иеде икеле. Эзь марявояк, кода ютась шкась, конань перть ульнесть ламо концертт, вейсэнь важодема ды тевентень вечкема. Минек ансамблясонть вайгельтне пек виевть. Моратано дуэтсэ, триосо, солосо. Мезе бу теевлинь пенсиясо, бути а улевель те ансамблясь. Минь – ломантне ютазь пингень, секскак вечктяно морамо гармония мельга,– корты морыцясь Нина Андреевна Аверьянова.
Ансамблянтень совицятне 18 иень перть печтясть ламо мезе: кенярдсть паронтень, изнясть стакачить. Ве шкане сынст арасель гармониясо седицяст. Эрьва репетицияс ды кенярксчитнес савкшнось тердтнемс сонзэ районсто. Лиясто а лисиль морамось ды а ладсевильть вайгельтне. Кода тешкстыть морыцятне: «Весе стакачитнень ды кеняркстнэнь печтятано вейсэ. Мельсэнек свал кирдтяно валтнэнь: бути минь а карматано ванстомо ды виевгавтомо се сюпавчинть, конась кадовсь покштянок-бабанок пельде, сестэ кие сонзэ невтьсы неень шкань од ломантненень».
Зярдо ушодовсь специальной военной операциясь, ансамблянтень совицятне тонавтнесть кекшемань алтымань кодамо. Те тевенть топавтомо сынь яксильть Орданьбуев. Шкань ютазь велень Культурань кудосонть аватне пурнасть истямо вейсэндявкс сынсь. Эрьва чистэ, ушолксонть ды ежонть лангс апак вано, сынь пурнавить ды кодыть алтымат. Те тевентень вейсэндявсть велень лия аватнеяк. Эрьванть эсензэ ризксэзэ ды мелезэ лездамс минек цератненень.
Ламо иень ютазьгак, «Вастома» морокурось полады эсь тевензэ, кенярдовты ломантнень, од ломантнень тонавты вечкеме ды ванстомо эсь тиринь келенть, раськенть ды культуранть. Течинь чис ансамблясонть морсить кото ломанть. Ней уш сынь теке вейке кудораське.
– «Вастомакс» ансамблянок лемдинек а стяко. Баеньбуе велесь пек кезэрень ды содавикс. Тей сакшныть ламо инжеть, конатнень васттано кши-сал ды мазый моро марто. Ды истя тейтяно а стяко – кадык эйкакшонок ды нуцьканок ваныть лангозонок, сайсызь мельс кезэрень моротнень ды ламо шкань ютазьгак ледстневельть «Вастома» ансамблянть, – корты Нина Раскина.
Яна Кудашкина