Вторник, марта 19, 2024
Важное

«Йовлань Олонь лемсэ этно-кудо» музеесь, кона панжозель 2006 иестэ, зярдояк а эрси чаво. Тосо сеедьстэ ютавтневить эрьва кодат вишкине ды покш вастовомат, морамонь кужот, спортонь коряс пелькстамот.

Ледстясынек эйстэст кой-конатнень. Неть, васняяк, чувто ланга керсицянь «Кой» фестивалесь (сон ульнесь колмоксть), «Торамась терди» эрзянь кезэрень моронь фестивалесь, кона ульнесь котоксть (меельцесь 2019 иестэ). Вирь Тавлась кочказель ды аволь вестькак «Кулдор-калдор» финнэнь-угрань раськень юморонь фестиваленть ютавтома таркакс, ков пурнавкшность ломанть аволь ансяк Мордовиясто, финнэнь-угрань весе регионтнэстэ. Тосо сеедьстэ ютавтневить «Тюштянь налксемат» спортонь коряс пелькстамот, тов секе тев якить видео-клипень снимамо. Теке марто иень перть а лотксить сакшномодо эрьва ёндо ломанть, кить бажить седе ламо содамс эрзянь содавикс музыкантонть, фольклористэнть, «Торама» ансамблянь теицянть эрямодо, сонзэ шкинемадо.


Кеветее иень перть истякак ташто кудынесь седеяк «сыредсь», илейстэ теезь пирявкстнэ наксадсть, лондадома лангсо сценаськак. Паро ладсо кудось эряволь бу витнемс ды одкстомтомс, полавтомс перьканзо пирявкстнэнь, путомс лия сцена, икелензэ теемс лато ало ванома таркат, улезэ козонь ваныцятненень кекшемс чипаень псиденть ды пиземеденть. Музеень прявтось П.В. Рябов аволь весть кепсесь неть кевкстематнень эрьва кодамо промкссо. Ды, кода свал, тень каршо кайсетить ансяк чаво алтамот.

Те иестэ, кона ламо вейсэндявкстнэнь мелест коряс Мордовиясо яволявтозь В.И. Ромашкинэнь иекс, тосо арсеви ютавтомс сеске кавто фестивальть: чувто ланга керсицянь ды «Торамась терди» кезэрень моронь. Сынь кармить улеме таштамковонь 6-це чистэ саезь. Ули кемема, стака ормань кезовось прядови ды тей кармить само чувтосто керсицят, морыцят, лия ломанть, кинь туртов В.И. Ромашкин ульнесь ды кадови эрзянь алкуксонь цёракс, раськень койтнень-кирдатнень вельмевтицякс ды ванстыцякс. Инжетнень а лади вастомс каладо пирявкс, лондадома лангсо сцена марто таркасо. Секс В.И. Ромашкинэнь чачома чистэ 70 иетнень топодеманть кувалма весе покшчитнень ютавтомань коряс оргкомитетэнь вейке промкссо ёвтазель мель пурнавомс весенень ды лездамс ванськавтомс музеенть перька таркатнень, витнемс-петнемс пирявкстнэнь, теемс од эземть. Яволявтозель тердема. Сон марязель.

Ды вана ютазь субутань валске лездыцятне пуромсть Вирь Тавласо «Йовлань Олонь лемсэ этно-кудо» музеенть вальмалов. Сынст ютксо вейсэндявксонь прявт, журналистт, чувто ланга керсицят, морыцят, велень эрицят. Тевтнень ушодомадо икеле ютавтозель Велень озкс. Инешкипазонтень пшкадемстэ ледстязельть эрзянь сеть ломантнень лемест, кить покш путовкс тейсть минек раськенть лезэс. Ютксост гайгсь В.И. Ромашкинэнь лемезэяк. Эряви меремс, Велень озксось тедеде кезовонть кувалма Покш Игнатовасо а ютавтови. Ды мейлеяк, ёвтызе пелеманзо П.В. Рябов, те кезэрень коесь ёми. «Сонзэ поладомс ули а кинень. Эрзянь инязорось, эрзянь келень идемань фондось ней арасть. Секс, паряк, те тевентькак сави саемс эсенек кедьс ды паро мельсэ карматано ютавтнеме Велень озкстнэньгак, и Раськень озкстнэньгак», – ёвтызе мелензэ Петр Рябов.

Лисни, «Йовлань Олонь лемсэ этно-кудо» музеенть тевензэ седеяк ламолгадыть.

Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».