Суббота, мая 08, 2021
Важное

Эрзянь ды мокшонь раськетнень культуранть, тиринь койтнень-кирдатнень ванстомга меельце шкастонть эрьва ковсто Саранскойсэ ютавтови «Кедьчелькевень ош» («Город мастеров») раськень-художественной промыслань кедьёнкстнэнь выставка-ярмунка. Эсь теевксэст тесэ невтить творческой вейсэндявкстнэ ды ськамост важодиця кедьчелькев ломантне Саранск ошсто ды республикань весе районтнэстэ.



Невтемась пурнавкшны Мордовия Республикань Экономикань, микшнемань ды предпринимательствань, Культурань, раськень политикань ды архивень тевень министерстватнень ды республикань муниципальной образованиятнень лезксэст вельде. Выставкань-ярмункань важодема таркакс кочказь «Сити Парк» ТРЦ-сь, косо свалшкане пурнавкшныть ламо ломанть.

Ютазь субутасто тагояк пурназель истямо ярмунка. Сонзэ участникекс кармасть зярыя районтнэнь кедьчелькев ломантне. Истя, Орданьбуе ёнксонь Орозбуе велень кедьчелькевтне Юрий Александрович ды Надежда Михайловна Аксеновтне невтизь масторлангонть келес весенень содавикс лембе кемтнень ды понасто анокстазь лия теевкстнэнь. Кадык телеськак уш прядовсь, ансяк рамицятнень те а лоткавты. Сынь уш нейке анокстыть сыця сёксентень ды телентень. Теке марто, мастертнэнь ули эштё мейсэ дивавтомс. Выставкав-ярмункав сынь усксть понасто теезь киякс ланга ацамот, тапкат, жилеткат, банясо парямонь туртов рукавцят ды шапкат ды, нама, вадрядояк вадря лембе кемть.

Ицял ёнксонь Береговые Сыреси велень кедьчелькевесь Пётр Першин выставкантень ускинзе чувтосто эсь теевксэнзэ. Тесэ ульнесть раськень тешкс марто чувтонь пенчть, налкшкеть, банянь туртов кедьёнкст, керсема лазнэть, конатнень лангсо невтеви кодамояк герой (Вирьава, эрзява ды седе тов) ды кудосо эрявикс лия кедьёнкст ды мазылгавтомкат.

Покш Березникень бондаресь Олег Буров выставкань инжетнень туртов ускинзе эсь парнетнень-боцькинетнень. А вана Торбеева ёнксонь Людмила Беськаева – эсь кедьсэ теевть някатнень. Те невтемась явовсь лия ёнов а молиця мазычисэ. Кодат ансяк някат тесэ арасельть: эрзянь ды мокшонь раськень невтицят, мультфильмань геройть, кудатят. Някат, конат алтыть уцяска, шумбрачи, пси ды кеме вечкема.

Истя жо выставкасонть-ярмункасонть ульнесть гигерьстэ паргинеть-чакшкеть, илёвсто теезь кептернеть, сёвонень чакшт-вакант, понань сурестэ кодазь цюлкат-варьгат.

Весементь коряс невтемась пек удалась. Сонзэ пурныцятне алтыть ютавтнемс истят ярмункат эрьва ковсто.

Юлия Еремина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».