Пек мельспаро, што минек шкань од ломантнень ютксо улить истят, конатнень седейсэ пии-палы покш вечкема тиринь раськень койтненень-кирдатненень, культурантень ды келентень. Бажить сынст эрьва ёндо ванстомантень-вельмевтемантень. Те корты седе, эрямось поладови седе товгак. Эрзянь ломантнень ули вандынь чист, сатыть виест цидярдомс весе стакачитнень каршо.
Саемга, минек од тештинетне, Алёна Кудимова ды Ариадна Леонтьева, вишка шкасто саезь ды неень шкас путыть покш мель ды ламо вийть, штобу кувалгавтомс ды седеяк мазылгавтомс эрзянь келенть ды раськенть эрямонзо. Эсест моросо, седямосо ды стихень сёрмадомасо сынь седеяк келемтить минек раськенть сёлмонзо. Эряви меремс седеяк, кодамо ёнксонь эрзя илязат уле, косо бу аволить эря, бути превсэть, мельсэть ды седейсэть эри вечкема тиринь келентень ды а виздят те ёжонть ломань ютксо невтеме, содак, тон теят покш ды паро тев, тон сюпалгавтат сонзэ ды кепедят эрзянь ломантнень каштанчист.
Ариадна Леонтьева марто минь вастовинек якшамо телень чистэ. Ансяк зярдо ушодынек кортамонть, кельме ёжось сеске ёмась. Тейтеренть эйстэ юты истямо лембе, мерят, сон алкуксонь чипай. Мельспаро важодемс истямо од ломань марто.
Ариаднань чачома-касома тарказо – Орданьбуень райононь Кеченьбуе (Кечушево) велесь. Тетянзо-аванзо эрзянь ломанть. Тетязо, Игорь Олегович, од шкасто саезь важоди велень церьковасо батюшкакс ды топавты Орданьбуень епархиянь од ломанень отделэнь прявтонь тевенть. Авазо, Татьяна Ильинична, лезды мирдензэ туртов церьковасо. Семиясонть Ариадна а ськамонзо, ули Злата покш сазорозо.
Музыканть марто Ариадна теевсь оякс вишка шкасто. Васняяк пиже тейтерькинекс якиль церьковань школав, косо морсиль хорсо, седе тов тетязо максызе тонавтнеме Орданьбуень Эйкакшонь искусствань школав. Тосо Ариадна тонавтнесь раськень морот ёнксонть коряс 11-це классонть прядовомс.
– Морамсто мон а содылинь кодамояк сизема. Кирьгапарем сэреди, а мон ялатеке моран. А сёпан, зярдо тетям васенцеде ветимим музыкальной школав – пек молинь каршонзо. Мелем тосо тонавтнемс овсе арасель. Эдь монень вечкевсь ансяк ютко шкасто морсемс нурька морот, эли зярдо тошнакадан тевтеме. Зярсыя теке бука коня алга весень ланс ванынь ды ансяк шкань ютазь, зярдо музыкань коряс тонавтыцятне озавтымизь инструмент ваксс ды ушодсть мартон чевтестэ кортамо, тонавтомо, ёвтнеме музыканть историядо, чарькодинь, тесэ ламо мезе эсень туртов од панжан, эряви ансяк тенень путомс седей ды мель, – ёвтни Ариадна.
Музыкальной школасо тонавтнемстэ тейтересь панжизе эсензэ туртов фольклоронть, сон покш мельсэ кармась тонавтнеме раськень моротнень, теке марто, сонензэ вечкевсь седе домкасто тонавтнемс тиринь келенть, коензэ-кирданзо ды оршамопелензэ.
– Ансяк сестэ чарькодинь, кодамо минек кеме ды уцяскав раськенек, кодат мазыйть ды киньгак ёнов а молицят викшнезь палянок ды пацянок. Музыкальной школасо тонавтнемстэ совинь «Ладушки» ансамбляс. Ледстяса, минь свал яксинек райононь ды республикань пелькстамотнева. А весть ульнинек «Шумбрат, Мордовия!» фестивальсэ, – ёвтни тейтересь.
Школанть прядомадо мейле Ариадна кармась тонавтнеме Н. П. Огарёв лемсэ МГУ-нь филологиянь факультетсэ. Ды студентэкскак а соды оймамо. Университетэнь весе пелькстамотнесэ бажи невтемс ёрокчинзэ. Истя жо факультетсэ сови «Нармоннят» ансамблянтень ды сон студсоветэнь профорентационной-секторонь прявт. Тейтересь прядсь Отрядной гитаристэнь школа ды ней сови Отрядной гитаристэнь союзс.
– Умок бажинь тонадомс седямо гитарасо. Истяко маштан налксеме электрической синтезаторсо, укулелесэ (ниле струнань гитарасо) ды ней вана гитарасояк. А умок вадря ялгам казсь тень турвасо седямонь гармошка, ней ули покш мелем тонадомс налксеме эйсэнзэ, – корты Ариадна.
Телень оймсема читнестэ Ариадна кунсолыцятненень казсь алкуксонь Од иень кеняркс, сон эрзякс морызе Дора морыцянть «Влюбилась» моронзо, конань эрзянь кельс ютавтызе Александр Данильчев.
– А сёпан, монень вечкеви морамсто эли седямсто снимамс эсень прян телефонс ды мейле путнемс клиптнень Интернетэнь лопатнес. Истя теинь те моронть мартояк. Васня снимия прям кода моран, мейле кучия Александр Данильчевнень. Сон шнымем ды мерсь апак арсе путомс клипенть эсень ВКонтакте лопазон. Зярдо тевесь теезель, маризь морамом – телефоном эзь сода оймамо, бизнэсь чинь перть. Вадрясто морамонть кисэ ламо од ды сыре ломанть ёвтасть тень шнамонь валт. Арсян, музыкась канды эрямозон уцяска, – мизолдозь корты тейтересь.
Ариадна ломанесь од, ёроков, секскак сонзэ седеезэ ды пря удемезэ а содыть оймамо. Истя, зярдо сон моли тиринь велев, тейтеренть прянек-пильгенек копачасы мелень кепедема ды сон ушоды сёрмадомо валморот. Седе сеедьстэ тейтересь сёрмады чачома тарканзо ланга.
– Арсян, ломаненть икеле аштить ламо ёнкст, штобу варчамс прянзо те или тона тевсэнть. Ломантне эдь, теке модась – певтеметь, – корты Ариадна.
Истямо ломань лангс ванозь, свал чачи мель панжомс эсеть эйсэ од ёнкст ды ёрокчить.
Алёна АРТЕМЬЕВА