Пятница, февраля 03, 2023
Важное


Ютась сырнень сёксесь. Сонзэ меельце читнестэ ашо ловось аламодо вельтизе раужо моданть. Эрямосонокак истя эрси: одсто арсетяно, сыречись эштё васоло ды сон миненек кувать а сы. Ансяк а фатяткак, кода бойкасто юты эрямось… Кодамо сыречи икелепелев эйсэнек учи, нама, теде кияк а соды.



Журналистэнь тевень топавтомсто аволь весть савсь тень улемс сыре ломанень кудотнесэ. А мезть сёпомс, свал нусманя арсема марто тосто тукшнынь. Виде, ламо тувталонь коряс, конатнеде аволь те сёрмадовкссонть пачтятано. Течи ули мелем ёвтнемс эрзянь авадо, Родительский дом «Надежда» АНО-нь прявтонь полавтыцядонть Галина ЯВКИНАДО.

Галина Ивановнань, нать, Вере Пазось кучизе масторлангонтень сыре ломантнень эрямост мазылгавтомо, стака шкасто тенст седейлембень путомо. Те иень сёксень вейке чокшнетнестэ апак учо теевинь содавиксэкс Галина Ивановна марто. Куш, кода кортыть, масторлангсо кияк кинь мартояк содавиксэкс стяко а теевкшны... Минек эрямосонок эрьва ломанесь вастови мезень-бути пек эрявиксэнть кисэ. Истя лиссь Галина Явкина мартояк. Саранскоень Строительной ульцясонть ули кавто этажсо кудо. Васенцеде совамсто, сеске сельмес каяви ваньксчись ды эрьва тарканть мазыйстэ ды тевс лезэвстэ нолдамось. Тов совицятнень лембестэ вастсь Галина Ивановна.

Нама, тосонь эрицятне лиятнень ёнов а молицят, седе сеедьстэ сыре ды сэредиця ломанть. Вана сынст перька, прок тиринь аванзо перька, чарась-велясь те эрзянь ёлганя рунго, мазый авинесь. Кинень максы лецямопель, кинень ёвты чевте вал, кинь марто туи ве ёнов стамбарнэ кортнеме. Видькстан, те вастовомадонть икеле эсь сыречим эзинь нее истямо кудосо. А вана тосо улемстэ вановтом полавтовсь.

…Умок те ульнесь. Тундонь вейке чистэ Орданьбуень Куцян веленть куншкасо ушодсть кудонь калавтомо. Тосо эриця Карповтнень семиясь (кудазорось Иван Прокофьевич ды сонзэ нись Елизавета Ивановна) сайсь мель таштонть таркас стявтомс од. Ледстневи, сестэ сынст родняст ютксто ламот цёратне сакшность лездамо, кода велесэ кортыть, «помоцес».

Покш тевенть ушодызь мельспаросо, кенярдозь кармасть вейке-вейкенень макснезь чочкотнень ве ёнов ёртнеме. Ансяк Карповтнень омбоце эйкакшось, вейксэ иесэ Галина, нусманясто вансь весе сень мельга, мезе теить цёратне. Авазо, Елизавета Ивановна, тейтерензэ ацирьгадоманть редязь, лембестэ варштась лангозонзо, кутмордызе ды чевте вайгельсэ мерсь тензэ: «Иля ризнэ, курок од кудонок карми: седе покш, паро ды мазый».
Тейтерькась капшазь тусь школав. Галинанень сестэ ёвтазельть аволь стяконь валт. Алкукскак, кизэнь перть тетязо-авазо ды весе раськест важодсть кудонь путомань тевтнень перька.

Теле лангс Карповтне совасть од кудос, конась ульнесь покш мельспарокс весе семиянть туртов. Ледстясынек, кудазортнэнь Иван Прокофьевичень ды Елизавета Ивановнань эйкакш пингест ютасть стака Ине Отечественной войнань шкастонть. Эштё вишкинестэ кармасть содамо кшисускомонть питнензэ. Те весементь ледстия а стяко. Эдь Иван Прокофьевич пингензэ перть ульнесь Орданьбуень райононь Куцян велень «Победа» икеле молиця хозяйствасонть трактористэкс, низэ жо, Елизавета Ивановна, кшинь паницяль. Сонзэ ававтозо, Пелагея Григорьевна Суняйкина, покш седейризкс кирдсь мирдензэ Прокофиень Ине Отечественной войнань меельце читнестэ маштовоманть кувалма.

Войнань иетнестэ Прокофийнень пракшнось покш уцяска: вейке тевенть парсте топавтоманзо кисэ макснесть тензэ оймсема чить. Кодашка мельспаросо эрзянь цёрась сакшнось кудов, седеяк пек кенярксовсто вастызе кулянть, зярдо фронтов велявтомадо мейле сёрмасо тензэ пачтясть, што куроксто чачи колмоце эйкакшозо. Те самай ульнесь Иван, кинь марто тензэ вастовомс эзь саво. 1945 иень майстэ, Изнямодонть яволявтомадо икеле, сон маштовсь…

Иван Прокофьевич ды Елизавета Ивановна эрясть покш ояксчисэ, вейке-вейкень чарькодезь ды вечкезь. Трясть-кастсть колмо тейтерть ды вейке цёра. Сехте покшось, Анна Ивановна, ней важоди Кочкуровань райононь «Норов» Агрохолдингень управлениясо, Николай цёраст эри Саранскоенть маласо – Октябрьской райононь Горяйновка велесэ. Вера тейтерест кадовсь тиринь Куцян велес ды эри тетяст-аваст кудосо.
Сеедьстэ оймсема читнестэ Вера Ивановна седейшкава васты сазортнэнь, ялаксонть ды сынст эйкакшост-нуцькаст. Ояксчисэ эрямо, вейке-вейкенень лездамо тонавтызь тетяст-аваст.

Галина Ивановнань ледстнематнес те шкас кадовсть истят тевтне, сыргози рана валске, кудопотмось пешксе кшинь, прякань тантей чинеде. Куш авазо пингензэ перть важодсь кшинь паницякс, ялатеке кудосояк свал уштыль каштомо ды пек вечксь эрьва мезень пидеме-панеме. Елизавета Ивановна ульнесь седеймариця ды весень марто чевтестэ кортыця ломанекс. Те шкас Куцян велень эрицятне сонзэ ледстнить ансяк паро валсо. Елизавета Карпова маштыль ломаненть кунсоломо, бути эряви, превс путомо. Зярдо омбоце тейтерест Галина сайсь мель эрямонзо алтамс медицинантень, каршо эзь моле. Мекевлангт, баславамодонзо мейле мерсь тензэ: те профессиясь пек паро, ломантненень лездыцянь, ансяк парсте тонавтнек.
Истя, школанть прядомадо мейле ушодсь тонавтнеме медицинской сестрань тевентень Ардатовань медицинской училищасо. Тосо тонавтнемстэ сон теевсь содавиксэкс теке райононь Кельвядне велень од цёранть Николай Явкин марто. Одтнэ вечкевсть вейкест-вейкест туртов ды урьвакстомадо-венчамодо мейле кармасть эрямо Кельвяднесэ.

Училищанть прядомадо мейле Галина Явкина кармась важодеме фельдшерэкс эсест Куцян велесэ. Мирдезэ Николай Петрович эсь шкастонзо служась армиясо, мейле тонавтнесь сварщикекс ды ламо иень перть топавтсь те тевенть тиринь велесэ. Одтнэнень макссть эрямо тарка, муевсь тев фельдшерэнь-акушерэнь пунктсо Галинань туртовгак. Сонзэ ушодсть тердтнеме курок лезксэнь максомо аволь ансяк чить, ветькак саилизь кудосто…
Шкань ютазь Явкинтнэнь семияст покшолгадсь. Сынь пек кенярдсть Станислав, седе тов Евгений эйкакшост чачомаст коряс. Теде мейле Галина Ивановна лиссь важодеме эйдень кужос. Эрьва ков кенерсь кудазоравась, эйкакштнень мельга ваномо, важодеме якамо ды эштё кирдсть кардаз потмо ракшат.

Явкинтнэнь, кода масторлангонь ламот семиятненьгак, эрямо лувост допрок полавтовсь вейксэньгеменце стака иетнестэ. Колхозост каладсь, школанть пекстызь, ков ютакшнось важодеме Галина Явкина. Мезе теемс, ков молемс важодеме, сестэ ламотнень талновтсь те пшти кевкстемась. Весть марясь, Чаунзасо панжсть колбасань теемань цех, саизь сонзэ тов бригадирэкс. А кувать тосо важодемадо мейле, чарькодсь, те аволь сонзэ тевесь. Тосто туемадо мейле мусь тев специальностень коряс, тусь Московов стака сэредицятнень мельга якамо. Аламо шкань ютазь частной медицинской учреждениясонть, косо сон важодсь, ладизь администраторокс. Васень варштавкс лангс, а берянель тарказо, ярмакткак ламо пандсть, ломанькскак эйсэнзэ путсть. Ансяк эрзянь аванть ризнэсь-палсь седеезэ эйкакштнень, мирдензэ, аванзо кисэ.

Апак учонь кулясь, аванзо стакасто сэредемась, седеяк пек кольстизе Галина Ивановнань седеенть, ды сон сась эрямо одов Мордовияв. Ансяк эзь лецяво малавикс ломанезэ, ды аванзо калмамодо мейле сон сайсь мель лездамс стакасто сэредицятненень, ськамост вановттомо кадовозтненень. Истя Пазось ветизе «Надежда» тетянь-авань кудонтень, косо сон сехте стака васень читнестэ саезь, зярдо эрявсь од тевенть ушодомс, кедень илештязь кармась важодеме. Кемтяно, сонзэ вийтне сатыть ламос!

Явкинтнэнь кавонест цёраст кассть превеекс ды тетянь-авань кунсолыцякс. Покшост, Станислав, аванзо ладсо кочкизе медицинанть, важоди специальностень коряс. Омбоцесь, Евгений, М. Е. Евсевьев лемсэ МГПУ-нть (сестэ эштё МГПИ) прядомадо мейле истя жо важоди специальностень коряс. Сон Саранск ошонь округонь омбоце номер школасо тонавтыця.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».