Вторник, марта 19, 2024
Важное

Саранскойсэ ютась раськень промыслань ды ремеслань фестиваль

Ютазь оймсема читнестэ Саранскойсэ, Мордовэкспоцентранть юрсо ютавтовсь «Тев» раськень промыслань ды ремеслань регионъютконь фестивалесь. Сон алтавсь Россиясо Раськень культурань сюпавчитнень иентень. Фестиваленть шкасто важодсть зярыя площадкат: раськень промыслатнень ды ремеслатнень выставкась, кедьчелькевтнень пельде мастер-класст, «Поёт село родное» велетнень фольклорной коллективтнень фестиваль-пелькстамо, «Национальный костюм на подиуме» оршамопелень пелькстамо-невтема, «Цёмарат» раськень ярсамопельтнень невтема, «Добрых рук мастерство» книгань регионъютконь выставка, «Народные художественные промыслы: перспективы развития» морга экшсэ кортамо. Ваномс алкукс ульнесь мезе лангс.

Раськень промыслань ярмункасонть эсь ёрокчист невтизь Равчирень 15 субъектэнь, Мордовия Республикань муниципальной 22 райононь ды Саранск ошонь кедьчелькев ломантне. Фестивальсэнть ульнесть раськень оршамот, чувто ланга артома ды керсема, коцтсто теевкст ды някат, илёвсто, гигерьстэ, ленгестэ теевкст ды ламо лия мезе, косо эрьва регионось невтинзе эсь промыслатнень ды ремеслатнень, конатнень вельде пачтяви эсь тиринь ёнксонь лия ёнов а молиця культурань сюпавчись.

Эряви ёвтамс, Мордовия Республикань Ояксчинь кудонь «Тев» раськень промыслань ды культурань регионъютконь фестиваль» проектэсь лиссь изницякс Россиянь Культурань фондонь грантонь пелькстамосо. Ды тевс нолдавсь «Культура» национальной проектэнь «Творческие люди» федеральной проектэнть лувсо.

Проектэнть топавтомасо лездасть – МР-нь Культурань, раськень политикань ды архивень тевень министерствась, МР-нь Раськень творчествань кудось, Финнэнь-угрань раськетнень культурань Равчирень центрась.

«Тев» раськень промыслань ды ремеслань регионъютконь фестивалесь панжовсь культурной программасо, конанть лувсо артисттнэ весень кенярдовтызь а покш невтемасо. Мордовия Республикань Прявтонть Артём Здуновонь пельде пурнавозтненень пшкадсь МР-нь Правительствань Председателень полавтыцясь Галина Лотванова.

– Течи минек республикасо ютавтови покш кенярксчи. Пек паро, што оймсемань зярыя шкадо мейле минь ютавттано истямо паро фестиваль, – тешкстызе Галина Лотванова. – Тезэ пурнавсть сеть ломантне, конат маштыть тееме мезеяк алкуксонь, конат эсь теевкссэст дивавтыть, кецневтить. Тынь тейтядо покш тев, эдь поладтадо Россиянть историянзо, минек раськень койтнень-кирдатнень. Мордовия Республикань Прявтонть Артём Алексеевич Здуновонь пельде сюкпрянь валт ёвтан фестивалень инжетненень. Течи участникекс кармасть Россиянь Федерациянь 15 регионт. Покш сюкпря, што сыде эсь теевксэнк марто ды эсь ёрокчинк явтадо лиятнень марто. Истя жо покш сюкпря минек республикань муниципальной районтнэнень. Весе 22 районтнэ ды Саранск ошось невтить эсь ёрокчист те фестивальсэнть. Течинь выставканть юрсо важодить мастер-класст. Те пек паро. Эдь неть мастер-класстнэнь вельде эсь ёрокчинть ды содамочитнень минь макстано эйкакштненень ды од ломантненень. А сынь минек республиканть вандынь чизэ.

Истя жо, Галина Алексеевна тешкстызе, те иестэ саезь «Тев» раськень промыслань ды ремеслань регионъютконь фестивалесь карми ютавтневеме эрьва иестэ.

Лембе поздоровт фестивалень участниктненень ды «Поёт село родное» пелькстамонь фольклорной коллективтненень истя жо ёвтась МР-нь Культурань, раськень политикань ды архивень тевень министрась Светлана Баулина.

Кода уш ёвтавсь, фестивалень участникекс кармасть республикань весе районтнэнь, Саранск ошонь ды лия регионтнэнь кедьчелькев ломантне. Эсь творчестваст ды ёрокчист невтизь Ульяновскоень, Саратовань, Самарань, Чувашиянь, Нижней Новгородонь, Марий-Элэнь, Удмуртиянь, Пензань, Татарстанонь, Башкириянь ды лия регионтнэнь мастертнэ.

Истя, Орданьбуе ёнксонь Орозбуе велень кедьчелькевтне Юрий Александрович ды Надежда Михайловна Аксеновтне тагояк невтизь масторлангонь келес весенень содавикс лембе кемтнень ды понасто анокстазь лия теевкстнэнь. Сынь уш нейке анокстыть сыця телентень. Кадык лембе кемест умок уш весенень содавикст, ялатеке ули мейсэ эштё дивавтомс. Выставкас-ярмункас сынь усксть понасто теезь киякс ланга ацамот, тапкат, жилеткат, банясо парямонь туртов рукавцят ды шапкат ды, нама, вадрядояк вадря лембе кемть. Теке марто, Юрий Александрович пурнавозтненень невтсь мастер-класс. Кемень кевердемань ёрокчинть варчизь покшнек-вишкиненек.

Отяжеле велень кедьчелькевесь  Сергей Гвоздиков выставкантень ускинзе гигерьстэ эсь теевксэнзэ. Тесэ ульнесть раськень тешкс марто кептернеть, паргинеть, тейтерь-аватнень мазылгавтомапелест туртов шкатулкат. Истя жо Сергей Николаевич гигерьстэ тейни някинеть, конатне туить эрьванть мельс. 

Орданьбуень Редкодубья велень бондаресь Андрей Уваров выставкань инжетнень туртов ускинзе эсь парнетнень-боцькинетнень ды илёвсто кодазь паргинетнень-салазкетнень. 

Выставкасонть пек ламо ульнесть эсь кедьсэ теевть эрьва кодат някат. Неть кужинетне явовсть лия ёнов а молиця мазычисэ. Кодат ансяк някат тесэ арасельть: эрзянь ды мокшонь раськень невтицят, мультфильмань геройть, кудатят; някат, конат алтыть теть уцяска, шумбрачи, пси ды кеме вечкема.

Истя жо выставкасонть-ярмункасонть ульнесть сёвонень чакшт-вакант, лембе сурестэ кодазь цюлкат-варьгат, чувтосто пек ламо теевкст. Лия регионтнэ ваныцятнень дивавтызь эсь раськень викшневкстнэсэ ды артовкстнэсэ, апаро ломанде ды кудосо сэтьмечинь ванстыця теевкстнэсэ.

Ды, нама, кодамо кенярксчи эрзянь ды мокшонь раськень ярсамопельтеме. Тесэяк эсь ёрокчист невтизь весе районтнэ. 

Мордовэкспоцентрань скверэсь жо кармась вадря оймсема таркакс покштнень ды вишкинетнень туртов. Эйкакштненень невтезельть раськень налксемат, покштне эсь пряст кецявтсть седейс токиця моротнесэ.

Эряви меремс, фестиваленть юрсо ульнесть аволь ансяк морамот-киштемат ды выставкат, толковавсть талновтыця кевкстематкак. «Народные художественные промыслы: перспективы развития» кругловой столенть юрсо ванновсть кедьчелькев ломантнень талновтыця кевкстематне ды тешкставсь важодемань аравтлув. Истя жо весе участниктнень туртов ютавтовсь «Этнобренды Мордовии» раськень промыслатнень ды ремеслатнень коряс каталогонь презентациясь.

Омбоце чистэнть фестиваленть содавтызе МР-нь Правительствань Председателесь Владимир Сидоров. Владимир Николаевич ваннызе выставкань эрьва экспозициянть, кортнесь мастертнэнь марто, кевкстнинзе творчествадост.

Кавто читне ливтясть, эзть редявояк. Весементь коряс фестивалесь ютась пек мазыйстэ, кенярдовтынзе весе пурнавозтнень, кепединзе ёжомарямост. Инжетнень валост коряс, сынь покш мельсэ кармить учомо сы иень фестиваленть.

Юлия Еремина

Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».