Масторлангсо улить истят ломанть, кинь марто содавиксэкс теевемстэ маряви пингень перть сонзэ содасак. Кортамстояк валонок кодаяк а прядовить.
Истя лиссь нейгак, ансяк эрьвачинь тевтне лоткавтымизь кевкстнеме ды кунсоломо Отяжелень райононь Ламбаське велень «МАПО Восток» ООО-нь главной бухгалтерэнь полавтыцянть Ирина Сошниковань. Ирина Григорьевнань эрямонь ды важодемань кидензэ течи евтнетяно минек ловныцятненень.
Ламо эйкакшонь триця семиясотевтнедеяк свал ламо
Отяжелень райононь Ламбаськесэ эриця Курочкинтнэнь раськесь содавикс покш семиясо. Паро, те вадря коесь поладовсь эйкакштнесэ ды нуцькатнесэ. Ирина Сошниковань тетязо-авазо, Григорий Акимович ды Зинаида Павловна, кавонест кассть покш семиясо. Невтемакс, тетянзо ульнесть сисем сазоронзо ды ялаксонзо. Сон ульнесь сырнень кедь ломань! Эрьва мезень тееме маштсь ды аволь ансяк эсест кудоютконть витнеме-мазылгавтомо кенерсь, истя жо колхозонь тевтнень топавтомсто, эсест велень эрицятненень лездамсто ульнесть ламо паро тевензэ. Ютко шкасто кинень кудонь чапомо, кинень кардазонь тееме сыргиль, низэ, Зинаида Павловна, зярдояк каршо эзь моле. Содась, весенень эряви лездамс, бути мезень тееме маштат, иляк вансто прят, капшак паро тевень тееме.
Тешкстасынек, тейтерьавась сонськак ульнесь ламо эйкакшонь триця семиясто, косо трявсть-кастовсть кавксо эйкакшт. Сеть семиятненень, кинень савсь эрямс Ине Отечественной войнадо мейлень стака иетнестэ, а шождаль: вачо пеке цидярдсть, стака робота топавтсть. Зинаида Павловна (тейтерьксэнь фамилиязо – Егорцева) вишкинестэ содасы, кода а шожда якамс ракша мельга, васня яла аванстэнь лездась, мейле сонсь пингень перть фермасо роботась. Семиясь эрясь покш ояксчисэ, вейке-вейкенень лездазь. Зинаида Павловнанень Пазось макссь мазый вайгель, вечксь кенярксчитнестэ морамо, тенень тонавтсь тейтерензэяк. Мирдесь ды нись кемсть, касыть эйкакштне, вейсэ кармить сыречист ютавтомо, нуцькань кастомо-ваномо. Зыянов тевесь жо свал сакшны апак учне.
Кодашка покш кажо семиянть куродызе, зярдо а шкастонзо ведьгемень иесэ кулось кудазорось Григорий Акимович. Зинаида Павловна кадовсь ськамонзо вете эйкакш марто. Сестэ Иринанень, семиясонть сон колмоцель, ульнесть 17 иеть, тейтерькась ансяк ушодсь тонавтнеме Чувашиянь Алатырь ошонь совхозсо-техникумсо бухгалтер специальностенть коряс, конань парсте прядомадо мейле, паряк, вузсояк поладовлизе тонавтнеманзо, ансяк сон капшась велявтомс тиринь велев лездамо, аванзо марто ялаксонзо ды сазоронзо кастомо.
Те семиясонть, аволь весемесь мольсь валанясто. Шкань ютазь таго лиссь покш кажо. Саша цераст туртов ульнесть колоньгемень иеть, сон апак учне кулось… А евтавияк, кодамо седейризкс сестэ саизе аваст, Зинаида Павловнань, ды, нама, весе семиянть. Те шкас эзь юта те сэредьксэсь сынст ойместэст.
Весе эйкакштне муизь эрямонь кист
Шкась юты эрязасто. Кассть эйкакштне, цератне урьвакстсть, тейтертне лиссть мирденень. Курочкинтнэнь омбоце цераст, Евгений, Н.П. Огарев лемсэ МГУ-нь строительной факультетэнть прядомадо мейле тусь важодеме Московов. Сонзэ истя жо покш семиязо, колмо эйкакшонзо. Ирина эрямонзо сюлмизе велень хозяйстванть марто, важоди тиринь велесэ. Сон – ламо эйкакшонь триця ава. Димань ды Кристинань кавтонь-кавтонь эйдест, сынь эрить Саранскойсэ. Галина ды Надежда эрить ды важодить Ташто Шайговань районсо. Мезесь яви Курочкинтнэнь семиянть лиятнеде, сынь весе вечкить важодеме, эрьва тевенть алкуксокс топавтомо, тейтертне аваст ладсо маштыть парсте морамо.
Невтемакс, Галина Григорьевна прядызе Кирюков лемсэ Саранскоень музыкальной училищанть, ламо иень перть тонавтсь морамо эйкакшт Акишина велень эйдень кужосо. Надежда Григорьевна, аванзо ладсо, эрямонзо сюлмизе велень хозяйстванть марто.
Малав ниленьгемень иеть вейке таркасо
Кода вере тешкстынек, Курочкинтнэнь колмоце эйкакшост Ирина, тонавтнемадо мейле велявтсь тиринь велев ды кармась важодеме «Красный Октябрь» лемсэ колхозсо.1989 иестэ лиссь мирденень, эсест велень од церанть Юрий Дмитриевичень экшс. Сестэ од семиянтень макссть колхозонь кудо. Сынь тетяст-аваст ладсо вейке кавто эйкакшос эзть лотка, трясть- кастсть ниле эйкакшт: кавто церат ды кавто тейтерть. Ниленест эйкакштне тонавтнемадост мейле кадовсть эрямо ды важодеме тиринь республикас. Тетяст-аваст сынь кенярдовтызь вете нуцькасо!
Кудазорось Юрий Дмитриевич кода сеть шкатнестэ, истя нейгак, важоди механизаторокс. Тундосто сексес топавты паксянь тевть, машты роботамо куш комбайнасо, куш тракторсо. Телень перть ялганзо марто витнить техниканть, анокстыть эйсэнзэ тундонь сокамотнес-видематнес.
Ирина Григорьевна мельспаросо евтнесь седе, кода ванстови сынст велесь, теньсэ покш путовксозо «МАПО «Восток» ООО-нь прявтонть Александр Владимирович Трошинэнь. Сонзэ валонзо коряс, бути велесэнть ули хозяйства, соксевить-видневить паксятне, кирдевить ракшат, ломантнень ули важодема таркаст, сестэ велесь а еми.
Алкукскак, Ламбаськесэ ламо тееви социальной кевкстематнень витемга, сыре ломантненень мелень явомга. Кода пачтясь Ирина Сошникова, сынст велесэ улить паро тевень теиця, тиринь велентень лездыця ломанть. Сынст ютксо: Николай Геннадьевич ды Валентин Михайлович Салмовтне, Юрий Геннадьевич Филев, Евгений Николаевич Шульгов ды лият. Неть ломантне ярмакост ды шкаст апак вансто, лездыть тиринь веленть паролгавтомасо, бажить каземс паро ежомарямо тосонь эрицятненень.
«Горнипов» ансамблядонть
Кавто иеде икеле Ламбаське велесэ панжовсь од, неень шкантень ладиця Культурань кудо. Ней тосо ули эрьва кодамо оборудования. Те паро тевентень кенярдсть велень весе эрицятне, нама, сехте пек «Горнипов» ансамблянтень совицятне. Сынст ютксо Ирина Сошниковаяк. Сон тенек пачтясь, кодашка покш кенярксост ульнесь, зярдо од зданиянть панжомадо икеле сыненст стасть мазый оршамопельть. Виде, кото костюмтнень питнест аволь вишкине, стамонь питненть пандызе «МАПО «Восток» ООО-нь прявтось Александр Трошин. Ней котонест тейтерьаватне: Ирина Сошникова, Людмила Русяева, Людмила Кокнаева, Любовь Булыгина, Антонина Автаева, Валентина Емельянова сцена лангс лиснить эрзянь мазый оршамопельсэ. Культурань кудонь прявтонть, те ансамблянь руководителенть Валентина Автаевань бажамонзо вельде ков ансяк эзть пачколе концертэнь программаст марто. Эрьва иестэ ерокчист невтить «Шумбрат, Мордовия!» фестивальсэнть.
Текенень поладсынек, сынь седейшкава казить кеняркс эсест велень ды тиринь райононь эрицятненень, морамсто кепедить ежомарямост, мейсэ мазылгавтыть эрямост.
Валентина Юдина