Вторник, марта 19, 2024
Важное

Галина Николаевна Герасимова школасо тонавтнемстэ пек вечксь келень ды литературань уроктнень. Мельсэнзэ нейгак аштить васенце тонавтыцянзо Римма Дмитриевна Гераськинань уроктне, сонзэ лембе вановтозо, кедень лембе кундавксозо. Секскак школань прядомадо мейле Галя мольсь тонавтнеме Мордовиянь М.Е.Евсевьев лемсэ государственной педагогической институтов.


Чачсь Галина Дубёнкабуень Поводелесэ. Тетязо, Николай Михайлович, важодсь трактористэкс, авазо, Анна Никитична – дояркакс. Семияст покшоль, вете эйкакшт. Ды кияк зярдояк эзь аште тевтеме. Эрьвась топавтсь сень, мезе кармавтсть покштне.

Вузонть прядомадо мейле Галина апак кавтолдо мольсь важодеме школав. Од тейтеренть пек покшоль мелезэ тонавтомс эйкакштнень тиринь ёнксонь вечкеме, эрзянь келень содамо. Сон васня важодсь Дубёнка ёнксонь Чеберчинань, Пичалень, Моргань школатнесэ. Мейле эрямонь кизэ пачтизе васоло ёнксов – Камчаткав. Колмо иеть эрясь ды важодсь тосо. Ансяк седеесь тердсь тиринь ёнксов ды велявтсь мекев.
Галина Николаевна 26 иеть важоди тонавтыцякс. Меельце сисем иетнень перть Саранскоень 12 № гимназиясо вети эрзянь кель. Тонавты 2-це классто саезь 6-це классос тонавтницятнень.

– Васня ульнесь стака ошонь рузонь эйкакштнень марто муемс вейке лувс совамонть. Эрявсь ламо важодемс асатыкстнэнь лангсо, конат стякшность икелень. Аламонь-аламонь, эскельксэнь-эскелькс минек школань эйкакштне кармасть мельспаросо вастомо эрзянь келень уроктнень. Ней уш апак тално, шожда оймесэ якан мон уроктнес.
Уроктнесэ минь эйкакштнень марто ламо кортатано тиринь ёнксонть вечкемадо, ваннотано сонзэ историянть, ледстнетяно содавикс ломантнень. Вечкить эйкакштне ловномо эрзянь валморот, ёвкст. Тонавтнетяно эрзянь валт, лиясто натой валрисьметь ладсетяно. Сехте пек вечкевить эйкакштнень туртов аволь классо важодемань уроктне. Тосо минь ловнотано ёвкст, легендат – сынст вельде ледстнетяно мокшэрзянь кезерень шканть. Ламо шка явтано някань теема тевентень. Тейнетяно панксонь нумолкайть, тундонь нармунть, тикшестэ някат. Сеедьстэ уроктнесэ тевс нолдтнетяно интернетстэ саевкстнэнь, интерактивной лазонть, конань коряс эйкакштне вечкить важодеме.
Мон вечкса школасо важодема тевенть, вечксынь тонавтницян, сынст мельспаросо ваныця сельмест, панжадо седеест, конат бажить максомс весе эсь лембест. А мон каршост максан эсь седей лембем, весе содамочинь, – ёвтни Галина Николаевна.

Тонавтыцянть чуросто эрси ютко шказо. Школасо важодемадо башка Галина Николаевна якси ошонь культурань эрьва кодамо покшчива. Сеедьстэ сайни кедезэнзэ книгат. Вечкевикс книганзо К.Абрамовонь «Пургаз» ды Л.Макуловонь «Учительница». Кизэнь шкане эрзянь авась котьми-ози пиресэ, вечки озавтнеме цецят. Тельня мельспаросо кирякстни сокссо.

Мирдезэ Пётр теке ёнксонь, Морга велень. Анастасия тейтерест туртов кеветее иеть. Сон тонавтни 12№ гимназиянь 9-це классо. Содасы эрзянь келенть, тонавтни англань ды французонь кельтнень.

Аволь умок Галина Николаевна невтизе прянзо «Лучший учитель мордовского (мокшанского, эрзянского) языка городского округа Саранск-2020» пелькстамосонть. Эрзянь келень тонавтыцятнень ютксо сон изнясь те конкурссонть. Ёвтатано тензэ тень коряс поздоровт, икелев молема тевть ды од изнявкст!

Татьяна Маторкина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».