Вторник, марта 19, 2024
Важное

Маень 12-це чистэ Мордовиянь Государственной Собраниясо ёвтазельть «Мордовия многонациональная» Республикань фотографиянь конкурсонь изницятне, конанть анокстакшнызь МР-нь Государственной Собраниясь ды Од ломанень парламентэсь.  Сынь казезельть дипломсо ды казнесэ.

Явшизь сынст МР-нь Госсобраниянь Председателесь Владимир Чибиркин, полавтыцясь Наталья Долматова ды Од ломанень палатань прявтось Виктория Богдашкина. Пелькстамонтень кучозельть 500 ламо важодевкст 200 профессиональной ды ушодыця фотографтнень пельде, кинень 10 иестэ саезь 35 иеть. «Многоликая Мордовия», «Национальные праздники народов Мордовии», «Архитектура родного края», «Мордовия с высоты птичьего полета» ды «Пейзаж». Истя лемдезельть номинациятне, ансяк жюрись кочкась эштё зярыя роботат ды казинзе сынст башка казнесэ.

Изницятнень марто вастовомсто  Госсобраниянь Председателесь Владимир Чибиркин тешкстызе: «Мордовия многонациональная» пелькстамось – те минек республикадонть, сонзэ ломантнеде проект, конась невти минек масторонь историянть ды койтнень-кирдатнень, невти сень, кода тесэнь ломантне вечксызь тиринь моданть. Эрьва фотографиясь – те эрямонь башка пелькске, вейсэ сынь невтить покштояк покш артовкс, конанть лангс ливтеви мокшотнень ды эрзятнень лия ёнов а молиця раськень культуранть».

 * * *

Тимур Раскин (фотосонть) тонавтни Орданьбуень райононь Баеньбуе велень школасо, сисемеце классо. Цёрынесь – «Мордовия многонациональная» республиканской пелькстамонь призёр.

Мордовиянь Госсобраниясь Од ломанень парламентэнтень совицятнень марто мартсто ушодызь «Мордовия многонациональная» фотонь коряс пелькстамонть. Эйсэнзэ ульнесть зярыя номинацият. Пелькстамодонть Тимурнэнь ёвтасть школасо ды сонзэ сеске чачсь мелезэ невтемс эйсэнзэ ёрокчинзэ. Вейсэ аванзо марто сынь кармасть анокстамо. Цёрынесь кучизе фотонзо «Многоликая Мордовия» номинациянтень ды лиссь призёрокс. Фотонть лангсо невтезь авазо – Лариса Викторовна Раскина ды аванзо ялгазо – Татьяна Викторовна Безрукова. Фотось теезель 2012 иестэ Саранск ошсо ютавтозь кенярксчистэ. Сонзэ кучомсто Тимур сёрмадсь истят валт: «Те фотось монень пек вечкеви, секс мекс вейке героинясь – авам. 2012 иестэ авам ульнесь покш чисэ, конась алтазель Мордовиянть Россиянь государстванть марто 1000 иень вейсэндявомантень. Авам эрзянь оршамопельсэ пек мазый. Ульнесь мелем невтемс те мазычинть тынк туртовгак».

Цёрынесь пек кенярдсь, зярдо гайневтсть Саранскойстэ ды тердизь казне мельга. Пелькстамонь жюринтень пек вечкевсь фотось ды алонзо сёрмадовксось. Тимур пек талнось, ялатеке весе ютась парсте, эдь вакссонзо ульнесь авазо, конась свал муи оймавтыця валт. Казненть тензэ максызе Владимир Васильевич Чибиркин – МР-нь Госсобраниянь Председателесь. Цёрынентень, каземань конёвдо башка, максозель питней казне.

Тимуронь кудораськензэ кенярдыть кисэнзэ, арсить тензэ седе товгак покш изнямот ды эсензэ вийс кемема!

Яна Кудашкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».