Вторник, марта 19, 2024
Важное

Москов ошсо яволявтозельть «СМИротворец» Весероссиянь XIV-це пелькстамонь изницятнень лемест. Те сетне, кить пачтить СМИ-сэ раськеютконь ды этноконфессиональной тевтнеде, Россиясо эриця раськетнень культурадост ды койдест-кирдадост. Конкурсось ютавтови РФ-нь Президентэнть пингстэ раськеютконь тевтнень коряс советэнть лезксэнзэ вельде.

«СМИротворец» пелькстамонь ютавтыцятне – раськетнень тевтнень коряс федеральной агентствась ды Межэтнической журналистикань гильдиясь. Пелькстыцятнень ютксо федеральной ды региональной, истя жо локальной ды этнической СМИ-тне, блогонь ветицят. 2022 иестэ эсь важодемаст кучизь минек масторонь 1238 СМИ-тне ды блогтне. Весемезэ экспертэнь советэсь ваннось малав 13 тёжат материалт.

Изницятне тердезельть Московов колмо чис, сынст туртов арсезель сюпав программа. Васняяк инжетненень ютавтсть ошканть мельстуиця экскурсия. Седе тов весе мольсть ТАСС Россиянь информационной агентствав. Тесэ ютась пресс-конференция. Лембе вал марто пурнавозтненень пшкадсь раськетнень тевест коряс федеральной агентствань прявтонь полавтыцясь Станислав Бедкин.

Ламо иень перть конкурсонь материалтнэнь ванкшны РФ-нь Президентэнь внутренней политикань управлениянь раськень политикань департаментэнь прявтось Татьяна Вагина. Сон кортась:

– Ламо важодематне, конатнень ванкшнотано вайгелень максомсто, кадовить седейзэнек. Покш мельспаро ловномс сынст, сёрмадозь лембестэ, чарькодевикс кельсэ. Сюкпря тенк!

– Иеде иес ванкшнотано, кодат важодемат тенек сыть. Редятано, кода полавтовить минек СМИ-тне. Ризнэвти, конёвонь изданиятне киртявить, пекставить. Натой сетне, конатнень сядо иест. Сынст таркаст саить блогтне. Ды мезе дивавты, ловныцяст пек ламо. Блогертнэ важодить од ломанень платформатнесэ: Тик-Токсо ды Ютубсо. Сеедьстэ сынь явить мель этнической темантень, конась тукшны мельс ловныцянтень. Минек темась лезды тенек ванстомс прянок, раськенек, келенек. А мезть сёпомс, интернетсэ ламо негатив. Ломанентень стака чарькодемс, кие сёрмадыцясь – алкуксонь автор эли коммерческой, паряк, се, кона канды зыян минек масторонтень?! «СМИротворец» пелькстамось лездась кастомс журналистикань башка ёнкс. Россиянь комсь вузсо анокстыть журналистт, конат кармить важодеме раськеютконь кевкстематнень коряс, – кортась межэтнической журналистикань гильдиянь прявтось Маргарита Лянге.

Теде мейле покш вастовома ютась М. В. Ломоносов лемсэ МГУ-нь журналистикань факультетсэ. Инжетнень марто вастовкшнось Государственной думань раськетнень тевтнень коряс комитетэнь прявтось Геннадий Семигин. Журналистикань факультетэнь деканось Елена Вартанова ловнось «Современное медиапространство: актуальные тенденции» лекция. Межэтнической журналистикань гильдиянь прявтось Маргарита Лянге ютавтсь «Лучшие практики региональных и федеральных СМИ в сфере межэтнических отношений» семинар. Журналисттнэ ёвтнесть, косто састь ды кодамо СМИ-сэ важодить, кодат материалт кучность «СМИротворец» пелькстамонтень. Ледстясынек, «Эрзянь правдасто» кучозельть зярыя важодемат, жюрись тешкстынзе Валентина Юдинань «Володинтнэнь покш семиясь» (Орданьбуень Володинтнэнь ламо эйкакшонь триця семиядо) ды Татьяна Маторкинань «Викшнемась – те алкуксонь «орма» (Дубёнкань райононь Поводелень Татьяна Борчина викшницядонть) важодематнень. СМИ-тне анокстасть мельстуиця теле- ды радиопередачат, фильмат, газетасо лисезь ды интернетсэ путозь мельстуиця материалт.

Омбоце чистэнть Московонь Правительствань Конгресс-центрасо ютась «Новые реалии в медиапространстве» этнической ды региональной СМИ-тнень VI-це Медиафорумось. Сонзэ панжизе Московонь раськень политикань ды раськеютконь сюлмавкстнэнь коряс департаментэнь прявтось Виталий Сучков. Промкссонть кортасть, кода полавтовсь медиасредась, кода од ломантне мусть интернетсэ эсь пряст невтемань од таркат, кепедевкшнесь миграциянь темаськак.

РФ-нь Федеральной Собраниянь Федерациянь Советэнь сенаторось, Россиянь Финнэнь-угрань раськетнень ассоциациянь прявтось Пётр Тултаев ёвтызе эсь мелензэ:

– Раськеютконь тевтнень темась минек масторсо – башка ёнкс. Эрьва раськесь бажи ванстомс кельтнень, сынст тонавтоманть, койтнень-кирдатнень, культуранть, виевгавтомс ды сюпалгавтомс сынст. Эрьва раськесь – те сюпавчинек ды каштанчинек. Нама, прявт таркасо ашти раськетнень ютксо зыянонь анолдамось.

Истя жо медиафорумсонть кортасть культурань инициативань Президентэнь фондонь прявтось Роман Карманов, М. В. Ломоносов лемсэ МГУ-нь журналистикань факультетэнь деканось Елена Вартанова ды ламот лият.

Пленарной промкстонть мейле важодемась поладовсь колмо секциява. Сынь алтавсть од ломанень медиакоммуникациятненень; СМИ-сэ мигранттнэнь ды беженецтнэнь темань невтемантень; минек масторонь культурань кодонь чарькодемантень.

«Отражение в медиапространстве культурного кода страны» – истя лемдевсь вейке секциясь. Сонзэ прявтось Маргарита Лянге пачтясь, кода сынь бажасть полавтомс минек шоу-бизнесэнь вишка пельксэнть. Сон ёвтнесь «ЭтноLife – звук Евразии» музыкальной проекттэнть. Сонзэ вельде арсевсь муемс Россиянь раськетнень лия ёнов а молиця морыцятнень ды седицятнень, невтемс сынст покш сцена лангсо. Эсь прядост бажась невтемс 101 команда. Сехте ламо яволявтомат састь Карелиясто ды Башкортостансто. Организатортнэ дивазевсть, зяро ёроков од ломанть улить масторсонок, весе сынь явить мель аутентичной ды неень шкань музыкантень.  Ансяк сыненст пек стака понгомс покш сцена лангс, эйстэст те шкас ламот а содыть.

В. Д. Поленов лемсэ Россиянь раськень творчествань кудонь информационной блоконь прявтось Мария Якунькина пачтясь, кодат этнокультурной проектт тевс нолдавсть раськетнень сюпавчинь иестэнть. «Периодика Ставрополья» издательской кудонь прявтось Анна Абастова ёвтнесь «Этнопутешествие» проектэнть тевс нолдамодо. Сынь ардтнесть эсест краень районтнэва ды пачтясть ловныцятненень мельстуиця таркатнеде, ков мереви молемс, мезе ваномс. Тень мельспаросо вастызь ломантне, ёвтасть сюкпрянь валт.

Коми Республикась – покштояк покш регион. Сонзэ трокс ды кувалт ардтнизе «Регион» журналонь прявт редакторось Полина Романова. Журналистэсь истя жо ёвтнесь ловныцятненень васоло таркатнеде, ков чуросто пачколить инжеть, ансяк ули мезе лангс ваномс.

Кавто иеть, кода «Таня-Матаня» ютуб-каналсо эсь блогонзо вети Татьяна Сальникова. Цёра-ялганзо марто сынь важодить «Москва 24» каналсо. Юткошкасто эли отпусксто ардтнить Россиянь регионтнэва, теить видеот ды ёвтнить минек раськетнеде, культурадост ды эрямодост.

Сехте учовикс ды талновтыця шкась сась чокшне. «Известия Холлсо» ютась «СМИротворец» пелькстамосо изницятнень каземась. 1238 СМИ-тнень ютксто 154 СМИ-ть ды блогт понгсть шорт-листс. Жюрись сынст ютксто кочкась 37 изницят минек масторонь 25 регионсто. Ульнесть кавксо номинацият. Колмо часонь перть мольсь каземась. «Эрзянь правда» газетась сайсь 3-це тарка «Печать» номинациясо «Этнической ды локальной СМИ-тне» пелькссэнть. Сцена лангс лиснесть газетань прявт редакторось Марина Девятова ды специальной корреспондентэсь Татьяна Маторкина. Сынст казинзе раськетнень тевест коряс федеральной агентствань прявтось Игорь Баринов.

Инжетнень туртов мельстуиця концерт невтсть «ЭтноLife – звук Евразии» Весероссиянь музыкальной проектэнь финалисттнэ. Неть: Gurude (Хакасия), Vetkafolk (Москов ош), Дара Яра (Москов ош), Иное Иное (Дагестан), СайлыкО (Тыва), Вероника Ушолик (Чукотка) ды «Ойме» эрзянь ды мокшонь группась (Москов ош).

Кавто мельстуиця читне прядовсть, сынь кадсть эрьванть седейс а стувтовикс ледстнемат. Межэтнической журналистикань гильдиясь ушодсь анокстамо сы иень пелькстамонтень. Сюкпря, «СМИротворец»!

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».