Четверг, мая 13, 2021
Важное

Истямо лем ало книга лиссь «Рузаевский печатник» типографиясо. Сон нолдазь эрзянь-мокшонь раськетнень регионъютконь вейсэндявксонть ушодксонзо коряс. Книгань пурныцясь ды анокстыцясь – вейсэндявксонь прявтось Ю.А. Мишанин. Те тевсэнть покш лезкс тензэ макссть войнань ды трудонь подвигень мемориальной музейсэ важодицятне Н.А. Кручинкин прявтост марто, мезенть кис Юрий Александрович ёвты покш сюкпря.



Книгась алтазь сеть ломантненень, кинь эрямост сюлмавозь мокшэрзянь моданть марто ды кинень савсь тюремс Крыменть кис эрьва кодамо шкасто. Саемс содавикс ушмодеенть П.А. Румянцев-Задунайскоень, кинь эйкакш пингезэ ютась Дубенкань Чеберчина велесэ. Эрямонь шказо савсь XVIII пингентень. Самай се шкастонть мольсть виев тюремат Османской империянть ды Российской империянть ютксо. Неть тюрематнесэ, конат мольсть 1756 иестэ саезь 1763 иенть самс, мейле ушодовсь Рузонь-туркань тюремась (1768 ие), Румянцев невтизе прянзо пек ёроков ушмодеекс.
Раужо иневеденть кис тюрематнесэ ламо изнявкст Россиянть туртов кандсь лия содавикс ушмодеесь Ф.Ф. Ушаков. Черноморской флотонть прявтсо улемстэ Ушаков ламо вийть макссь Севастополенть кемекстамонзо лезэс.

Россиянь флотонь адмиралось эрямонь меельце иетнень ютавтынзе Темниковань Алексеевка велесэ. Те велиненть сон кочкизе сень кувалма: сон аштесь Санаксаронь монастыренть маласо, ков яксиль кисэнзэ озномо лелязо – Феодор преподобноесь.
Книгасонть Ф.Ф. Ушаковдо ёвтневи аволь ансяк ламо тюрематнесэ сонзэ изнявкстнэде, истя жо седе, кодамо покш мель сон явсь солдаттнэнень ды матростнэнень, кода мелявтсь кисэст ды сынст шумбрачист кис. Теде башка Ушаков адмиралось ламо паро тевть тейсь Алексеевка велинесэнть эрямсто. Весе тень кисэ сонзэ лемесь Московонь ды Весе Русень Святейшей Патриархонть Алексий II пазчаньгодеманзо коряс совавтозь святойтнень юткс.
«Крымень модась валозель ломанень верьсэ»

Книгасонть весемеде покш тарка максозь ледстнематненень, конат ловныцянть кандсызь ютазь войнань шкантень, зярдо минек масторось печтясь покштояк покш стакачить, кодат арасельть икеле зярдояк. Сынст эйстэ эзь мене Крымеськак, конань лангс Гитлер явсь пек покш мель ды арсесь саемс сонзэ сеске. Теде кортыть истят валтнэяк, конатнень Адольф Гитлер евтынзе Россиянть лангс каявомадо мейле (1941 иень медьковсто (июльстэ): «Крыменть эряви олякстомтомс весе «аволь эсенектнень» эйстэ ды тарказост ускомс лия эрицят – немецть».

Натой арсезель, кодамо лем максыть Крыментень сонзэ саемадо мейле, – Готенланд («масторось анок»). Лия лем анокстазель Севастополентеньгак – Теодорихсхакен («Теодорихень гавань»).
Книгасонть ёвтневи, кода мольсть тюрематне Крыменть, Севастополенть кис. Сынь мольсть апак лотксе ды эрьва косо: мода ды ведь лангсо. Ансяк вийтне ульнесть аволь вейкеть, секс минек войскатненень савсь потамс. Крымесь понгсь ятонть кедьс. Тосо эрицятненень кармась седеяк стака. Сынст лангсо нарьгасть эрьва кода, леднесть весень, кинь ловсть «аволь эсест». Теде корты немецень 11-це армиясо СД-нь уполномоченноенть Отто Олендорфонь пачтямозо: «…вейке иень перть, зярс ульнинь Россиясо, ломантнеде, конат ледезельть, лововсть 90 тёжат». Те ломанесь седе кувать ульнесь Крымсэ. Лисни, ледезь ломантнень эйстэ седе ламотне эрясть Крымсэ.

Седеяк пек нарьгасть полонс понгозтнень лангсо, кить тюрсть Севастополенть кис. Зярыя чить эзть максне тенст а кши, а ведь. Леднесть весень, кить понгонесть сельмест икелев Севастополь ды Керчь ошотнень перька велетнесэ, морясть эйсэст газсо, живстэ ёртнесть ды лепиявтсть лисьмасо. Весемеде пек кецнесть, зярдо вейке кудос пурназь ломантнень пултылизь мирем.
Весе тень лангс апак вано, Крымсэ эрицятне эзть аште кудова. Ламот теевсть партизанокс.

«Изнямс эли куломс»

Крыменть кис тюрематне мольсть малав колмо иеть. Сядонь сядот од ломанть максызь эрямост сонзэ кис. Сынст ютксо ламотне ульнесть Мордовиясто. Книгасонть максозь 508 солдаттнэнь лемест. Вейкесь эйстэст Павел Максимович Ягунов, кона чачомань коряс секе велестэнть, косо ульнесь П.А. Румянцевень-Задунайскоень тетянзо вотчинась. Те – Дубенкабуень Чеберчина велесь. Ягунов полковникенть прявтсо 170 чить (1942 иень маень 16 чистэ саезь 1942 иень октябрянь 16 чинть самс) мольсть тюремат Аджимушкайской кевпандотнень кис. Неть таркатне, журналистэнть Н. Перфильевень валонзо коряс, лововсть «Крымсэ сехте тандавтниця таркакс». Неть кевпандотне теевсть эсензэ ломаненть вийсэ. Икеле тосонь эрицятне эстест кудот стявтнесть кевстэ, конатнень таргасть мода потсто. Истямо ладсо теевсть мода варят (пещерат). Зярыя пингень перть сынь келейгадсть 171 гектаронь покшолмас. Ютазь пингестэ кевень таргамось лоткавтозель, мода варятне кадозельть.

Гражданской войнанть шкасто тува кекшнесть якстере партизантнэ, шкань ютазь тосонь эрицятне кекшнесть эсест сюпавчист. Ине войнань шкастонть жо кевпандотне кармасть улеме тюрема таркакс.
Книгасонть ёвтневи, кода 1942 иень маень 16 чистэ полковникенть П.М. Ягуновонь прявтсо отрядось ков сатотсть виензэ кирдсь ятонть эйсэ, зярдо минек зярыя подразделениятненень эрявсь ютамсТаманень тона чирев. Эсензэ отрядонть тень теемс эзь сато виезэ. Секс савсь тенст кекшемс Аджимушкайской кевпадотнесэ, косо кекшема тарка эстест мусть тосонь эрицятнеяк: ават, эйкакшт. Се чистэнть саезь неть кевпандотне велявтсть модапотмонь ошокс. Зяро тосо ульнесть ломантнеде – кеветее, комсь, колоньгемень тёжат – кияк видестэ а ёвтасы. Весе сыненст савсь улемс истямо таркасо, косо чоподаль, якшамоль, эзь сатно ярсамопелесь, ведесь. Теке шкасто фашисттнэ секе тев кайсевсть ды снартнесть совамс потс. Эрьва чистэ солдаттнэ тюрсть эрямонь апак вансто. Кить тов понгсть, весе содасть, лисема тарка тосто арасель. Немецтне пиризь сынст эрьва ёндо. Китнень ланга вачкасть минат.

Весемеде пек ломантне майсесть ведень асатноманть кувалма. Немецтне эзть максо лиснемс ведь мельга. Вере ульнесть кавто лисьмат. Васенце шкастонть солдаттнэ (эйстэст ламотне маштовсть) лиснесть ведь мельга. Курок немецтне яжизь неть лисьматнень. Савсь веденть вешнемс кев пандотнень потсто.

Седе тов, фашисттнэ седеяк азаргадсть. Кармасть морямо эйсэст газсо…
… Весе теде ловнозь, пря череть стить ды удеметь карми пельнеме вейкине кевкстемась: «Кода сатотсть виест цидярдомс кевень кескавс понгозь ломантненень?»

Весе тень пингстэ эрявсь теемс гарнизон, кона мезе лангскак апак вано эзь максо пря ды цидярдсь натой 170 чить.
Ягунов полковникесь маштовсь 1942 иень июльстэ (чись апак ёвта). Те ульнесь покш вачкодькс весень туртов. Сонзэ пек вечкилизь. Ды ансяк ськамонзо калмизь кандолазсо.

П.М. Ягуновдо ули повесть, конань сёрмадызе Александр Соболевский. Сонзэ лемезэ «Командир подземного гарнизона». Арсян, те аламо. Истят ломантнеде, кодамоль П.М. Ягунов, эряви снимамс фильма ды аволь вейкеяк. Истят ломантнень вийсэ саезель ютазь войнасо ине изнямось. Секс эряви весементь теемс сынст лемест ды ине тевест астувтомга.
Меельцекс ули мелем пшкадемс ловныцятненень: тердян эйсэнк ловномс те книганть. Сёрмадовкстнэде башка эйзэнзэ совавтозь ламо фотот, конат седеяк келейстэ панжить весе сень, мезе мольсь минек масторсо ютазь войнатнень шкасто.

Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».