Вторник, марта 19, 2024
Важное


Ольга Семишова «Тепличное» АО-со важоди 2005 иестэ саезь. Сась тей предприятиядонть ялганзо ёвтнематнеде мейле. Сась зярыя шкас ды кадовсь вана уш малав кеветее иес.


Ольга чачсь-кассь Крымсэ. Тосо прядызе школанзо ды стясь кевкстема: косо поладома тонавтнеманть седе тов? Тейтеренть тетянзо-аванзо чачома ёнксост – Мордовиясь, секскак Ольга арсизе ды кемекстызе: тонавтнеманть поладсы минек республикасо. Ельникень райононь Сыре Пичингуши велесэ эрясь бабазо, ды сон тусь сонензэ. Сась Мордовияв, максынзе конёвонзо Краснослободской ёнксонь Преображенской (Учхоз) велень училищас, кармась тонавтнеме менеджер специальностенть коряс.

– Мон эштё тонавтнема шкасто кемекстыя, Мордовиясто уш ней мекев а туян. Зярыя шкань ютазь тей сась авамгак, – ёвтни Ольга. – Тонавтнинь училищасо, пурнынь содамочить ды теке шкасто арсинь тевде, важодемадо.
Зярыя шкань ютазь Ольга венчась ды мирденть марто тусть Саранскоев, чачсь васенце тейтерест. Эряви меремс, Ольга колмо эйкакшонь ава, весе тейтерть. Сынь сонзэ кенярксонзо, сонзэ кемеманзо.

– Чачсь васенце тейтерем, шкась ютась, эрявсь вешнемс важодема тарка. Кортазевинь теде ялгам марто, сон тень ёвтнесь эмежень кастома теплицатнеде. Пачтясь, зарплататне тесэ а берянть. Вана истя понгиньгак тей, – тешксты Ольга Семишова.
Ольга роботы 2-це цехсэнть, сонзэ теплицасонть кастовить куярт. Ды, бути васень шкасто сон мезеяк эзь сода аволь ансяк куяронь, куш кодамо эмежень кастома лувдонть, ней анок эрьва ёроков кудазоравантень максомс лезэв урок.

– Мон чачинь-касынь ошсо ды пирень тевтнеде марсинь, ансяк зярдо сакшнынь бабанень инжекс. Зярдо тей сынь, эзинь чарькоде – мейстэ ушодомс, мезес васняяк кундамс. Покш сюкпря мартон важодицятненень, тейтерь-аватне свал лездасть, невтсть, кода весементь теема. Тонавтымизь. Ды ней эсь прям а неян кодамояк лия таркасо. Мон пек вечкса эсь тевем. Кадык лиясто стака, сизят, ансяк тепличницань тевенть а полавтса кодамояк лиянть лангс, – кемексты Ольга Семишова.

Юлия Ерёмина
Фотось: Эдуард Ретунский

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».