Вторник, марта 19, 2024
Важное
Татарстан Республикань эрзянь-мокшонь национально-культурной автономиянь региононь общественной организациянть прявтсо 2017 иестэ саезь важоди Наталья Сабитова. Истя жо аволь умок сонзэ кочкизь Татарстанонь раськетнень Ассамблеянь советэнь прявтонь полавтыцякс.
 Тевензэ парсте топавтыця, свал анок ёвтамс од мельть-арсемат, эрси весе мероприятиятнесэ, весементь теи сень туртов, штобу эрзятне ды мокшотне сонзэ ладсо а стувтневельть эсь ундокстост, содавлизь келенть, авольть човоряво республикань ды целанек масторонь ламо раськетнень юткс. Наталья Михайловна казезь «За личный вклад в развитие Республики Мордовия» почётонь знаксо. Течи Наталья Сабитова минек инже.

– Наталья Михайловна, тынь чачиде эрзянь аволь покш велесэ. Кода жо понгиде Казанев?

– Истя, мон чачинь Чувашия Республикань Порецкой райононь Алвелесэ. Те – Мордовия Республиканть марто границянть лангсо. Тонавтнинь Алвелень средней школасо, косо домкасто тонавтнинь эрзянь келень грамматиканть, свал пелькстынь райононь ды республикань олимпиадатнесэ. Вете иестэ саезь карминь морсеме «Умарина» эйкакшонь фольклорной эрзянь ансамблясонть ды ульнинь те коллективсэнть школань прядомс.
Эряви тешкстамс, тосо те шкас ванстовсть кезэрень койтне. Истя свадьбасо прявт ломанекс лововить аволь одирьвась ды содамось, а кудавась ды кудатне. Велень ломантнень меельце киланговгак ильтить эрзянь койсэ – кулозенть малавиксэнзэ колмо чинь перть покш седейризкс марто лайшить ды шныть кулозенть, кодамо сон ульнесь паро ломанесь ды кода ламо тейсь паро тевть.
Высшей образованиянть саия Чебоксарсо. Мирденень лисемадо мейле сынек эрямо мирдень тиринь ёнксов. Истя понгиньгак Казанев.

– Ды сеске сыргиде Раськетнень ояксчинь кудов эсь раськень ломанень вешнеме?

– Нама, аволь. Икеле свал топавтынь общественной тевть, тесэ жо кадовинь тевтеме, карминь прям марямо а эрявиксэкс. Ды мирдем ёвтась истямо мель: КАИ-сэ сонзэ преподавателесь, Сергей Владимирович Новиков, эрзянь-мокшонь национально-культурной автономиянь прявт, ды мерсь пшкадемс сонензэ. Истя вастовинек Сергей Владимирович марто. Ды эрямось налксезевсь эрьва кодамо тюсонь артовкссо – монь, кода келень содыцянть, кармасть тердтнеме мероприятиятнес, ламотнень мейле монсь ютавтынь. Сергей Владимирович аламо шкань ютазь пачтясь: «Сась шка кинть максомс одтнэнень», ды мерсь монень арамс автономиянть прявтс. Истя вана 2017 иестэ кундынь прявтонь тевентень минек вейсэнь эрзянь-мокшонь раськень тевенть кис.

– Мезе Татарстанонь эрзятне-мокшотне арсить «мордва» валонть коряс? Эдь лиясто эрси, ломантне «мордвакс» пряст а лемдить, ды мик покордавкшныть, бути тенст истя мерить.

– Ушодан васолдо. Васенцеде «мордва» валось ледстяви IV пингестэ – рузонь кезэрень сёрмадовкстнэсэ. Минь кандовтано финнэнь-угрань раськетненень, ды кезэрень шкасто саезь «мордватне» явовить кавто субэтносос – эрзя ды мокша. Вейке-вейкест эйстэ сынь явовить этнической явовксост коряс, улить эсест литературной келест, пек явовить антропологической типень коряскак: эрзятне – седе ашот, валдо сельметь, сэрейть; мокшотне – седе алкинеть, келей чачот, тюжа сельметь ды раужо черть.

1928 иень июльстэ Совнаркомонь заседаниясо эрзянь-мокшонь округонь теемань кевкстеманть коряс мерезель лемдемс огругонть Мордовскойкс – сень мельс саезь, што «эрзя» ды «мокша» раськетнень лемтне пек эзть марсеве, «мордватнень» содасызь весе. Истя теевськак Средне-Волжской областенть юрсо Мордовской округось. Ней ули Мордовия Республика, ды сонзэ неень региононь прявтонь топавтыцянть, Казаньсэ чачозенть Артём Алексеевич Здунов марто минь сеедьстэ кортнетяно тевень коряс.

Виде, ули истямо раське – мордва, тетянь ды авань паспортсост сёрмадозь «мордвин» ды «мордовка» (монь чачомадо свидетельствасонть сёрмадозь «эрзя»). Эрзя ды мокша субэтностнэнь представительтне чарькодезь ваныть «мордва» валонть лангс – миненек истя мерить сядодо-сядо иеть. Минь важодемань вечкиця ды важодеме маштыця, каштан раське. Минь ояксчинть кис! Ней васень таркасо – ванстомс раськенть ды сонзэ койтнень-кирдатнень. Те самай минек организациянть прявт тевезэ. Эдь минь аволь ве ёндо сазь раське, минь – Татарстанонь коренной эрицят, минек покштятне-бабатне те моданть лангс састь эрямо эштё Булгаронь государстванть, Темниковской княжестванть шкасто.

– Зяро Татарстансо эрзятнеде-мокшотнеде?

– Россиясо финно-угорской группань раськетнень ютксо минденек сехте ламо. 2010 иень эрицятнень сёрмадстоманть коряс, Татарстан Республикасо эрить 19156 эрзят ды мокшот, ютксост 1284 – Казаньсэ, 1979 – Набережной Челнысэ, 2749 ломанть – Альметьевской районсо, 2533 – Бугульминскойсэ, 4006 – Лениногорскойсэ, 2399 – Тетюшской районсо. Течинь чис республикань келес минек 11 отделениянок ды эрьва косо лаказь лаки виев важодема. Бажатано НКА-нь заседаниятнень ютавтнемс аволь вейке таркасо, штобу ве ёнксоськак аволь маря прянзо кадозекс.

Тедедень Тиринь келень ды раськень вейсэндявомань иестэнть важодемась седеяк эрязасто моли – эрьва чистэ ютавтневить кодаткак мероприятият. Минек прявт мероприятиясь эрьва иестэ ютавтневи ноябрясто. «Там на реке Рав» фестивалентень миненек сакшныть республикастонть ды шабрань регионтнэстэ малав ведьгеменьшка творческой коллективть, ютавтневить эрьва кодат выставкат. Неть мазый ды гайтев моротнень кунсоломо сакшныть ламот ошонь эрицятнестэ, конат а содасызьгак эрзянь ды мокшонь кельтнень. Пек сюпав эрси программась. Ютазь иестэ ковидэнть кувалма фестивалесь ютавтовсь онлайн-лувсо. Тедеде арсетяно ютавтомс кода свал.
Кадовсь поладомс, общественной тевенть Наталья Сабитова топавты вишка цёрынензэ марто декретсэ аштемстэяк. Кода сонсь пейдезь корты, васенцетнень ютксо топавтызе РФ-нь Президентэнть чачицятнень ламолгавтомадо тердеманзо. Наталья Михайловнань кеветее иесэ тейтерезэ парсте корты эрзякс, цёрынезэяк чарькоди, кода эрзянь, истя жо татаронсентькак – те уцяскав семиясонть кортыть колмо кельсэ.

Анокстазь «Ватаным Татарстан» газетанть марто
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».