Вторник, марта 19, 2024
Важное


Ожоковонь 23-25-це читнестэ Саранскойсэ ютавтовсь Эрзянь ды мокшонь раськень регионъютконь общественной вейсэндявксонь VII Инекужось, сонзэ темась: «Эрзянь ды мокшонь раськесь ламо раськень Россиянь культурань вейкине кодсонть». Те покш промксось, конась ютавтови вете иес весть, кенярксчинь лувсо панжовсь ожоковонь 24-це чистэ Республикань Культурань кудосонть. Залонтень пурнавкшность 369 делегатт, 74 наблюдательть, 543 инжеть масторонь 33 регионтнэстэ, ине Россиянь сеть ёнкстнэстэ, косо эрить эрзятне ды мокшотне: Приморской крайстэ саезь Калининградс, Мурманскойстэ саезь Крымс. Сынь талныть-мелявтыть тиринь раськенть кисэ, весе вийсэст бажить ванстомс-сюпалгавтомс раськень кельтнень ды койтнень. Эрьвась эйстэст Инекужонтень усксь пшти кевкстемат, конат сюлмавозь раськенть марто. Мельспаро тешкстамс, залонтень малав весе пурнавозтне раськень оршамопельсэльть. Истямо мазычи, сельметькак а саевить!


Инекужонть панжомо сакшность покш инжеть: Мордовиянь Прявтось Владимир Волков, МР-нь Госсобраниянь Председателесь Владимир Чибиркин, МР-нь Правительствань Председателень полавтыцясь Галина Лотванова, МР-ва Прявт федеральной инспекторось Михаил Сезганов, ФАДН-нь прявтонь полавтыцясь М.Н.Мишин ды лият.

– Кельгома ялгат, вечкевикс оят! – пшкадсь пурнавозтненень Владимир Волков. – Неть читнестэ республикась кармась эрзянь ды мокшонь раськень ламот ломантнень туртов вейсэнь кудокс. Ёвтан тенк сюкпря ундокстнэнень ды раськень койтненень кемевиксчинть кисэ. Содан, Россиянть келес ды сонзэ томбале эриця сядот тёжат минек соотечественниктне покш мель марто ваныть Мордовиясо молиця тевтнень мельга, ваныть, кода виевгады республикась. Тынь мартонок вейсэ мелявттадо эрзянь-мокшонь ёнксонть уцяскадонзо, печтятадо мартонок кеняркстнэнь ды кемематнень, апаротнень ды изнявкстнэнь!
Тешкстызе, вете иетнень перть, конат ютасть меельце Инекужодонть мейле, топавтозь покш важодема эрзянь-мокшонь раськенть историянь сюпавчинть тонавтнеманзо ды содавиксэкс тееманзо коряс. Покш таликазо теньсэ Эрзянь ды мокшонь раськень регионъютконь общественной вейсэндявксонть. Ламо теезь культурань диалогонь кемекстамонть, раськень-культурань куншкакуротнень ламолгадоманть, эрзянь-мокшонь диаспоранть ды финнэнь-угрань вейсэндявксонть ютксо сюлмотнень кемекстамонть коряс. Башка тешкстазельть «Равось – ояксчинь лей» раськеютконь этнокультурной экспедициясь, «Шумбрат!» раськень-фольклоронь кенярксчись, конась ютавтови Россиянь ламот регионтнэсэ. Тедеде сонзэ ютавтомс максозь грант «Культура» нацпроектэнть лувсо. Советской Союзонь Героенть М.П.Девятаевень ине тевензэ содавиксэкс теемга Ю.А.Мишанинэнь проектэсь изнясь Президентэнь грант. Тедеде ютавтовсть кенярксчить, конат алтазельть эрзянь-мокшонь раськень васенце учёноенть-энциклопедистэнть ды просветителенть М.Е.Евсевьевень ды Мордовиянь раськень сёрмадеенть, республикань Почетной гражданинэнть К.Г.Абрамовонь юбилеест тешкстамонтень. Ютазь недлясто Саранскойсэ, кото иень ютазь, ветявсь «Штатол» раськень театратнень весероссиянь фестивалесь.

Мордовиянь Прявтось тешкстынзе сеть кевкстематнень, конат кепедевкшнесть икелень инекужосонть ды пштистэ аштить нейгак: раськень интеллигенциянь кадратнень анокстамось, раськень кенярксчитнень ютавтомась, раськень школатненень учебниктнень явомась, тонавтомань-культурань сферантень методической лезксэнь максомась.



– Келенть ванстомась – прявт тев, конань лангсо миненек тынк марто сави ламо важодемс. Уш течи республикасонть тень коряс ламо тееви. Мордовиясо вадрясто важодить радионь ды телевидениянь, газетань ды журналонь раськень редакциятне. Покш мель явови издательской тевтеемантень, – мерсь Владимир Волков. – Меельце вете иетнень перть нолдазь малав 80 книгат, конатнесэ ёвтневи эрзянь-мокшонь раськенть историядонзо ды койдензэ-кирдадонзо, художественной литературань классиктнень зярыя томт ды энциклопедият. Лиснить журналт эрзянь ды мокшонь кельтнесэ. Кавтотне эйстэст эйкакштнень туртов. Инекужонть каршо кой-кить арсесть «кундамс калт рудазов ведьстэ» ды пачтясть Мордовиясо раськень кельтнесэ лисниця журналтнэнь пекстамодост. Весе ответственностенть марто ёвтаса, те кулясь аволь виде. Раськень кельтнесэ лисниця СМИ-тненень ды литературантень лездамс ансяк тедеде явозь 45 млн. ламо целковойть (меельце вете иетнень перть 257 млн. ламо целковойть). Секскак Мордовиянь раськень кельсэ лисниця изданиятне нолдавсть ды кармить нолдавомо. Эдь сынь эрявить ловныцятненень.

Мордовиянь Прявтось истя жо ёвтнесь республикань эйдень кужотнесэ ды школатнесэ эрзянь ды мокшонь кельтнень, раськень историянть ды культуранть тонавтнемадост.

– Теке шкане улить стакачить тонавтыцятнень асатноманть марто. Официальна яволявтан: бути улить ломаненк, кить бажить тонавтомс эрзянь ды мокшонь кельть, минь аноктано лездамс тенст, максомс целевой направления ды пандомс тонавтомаст минек вузтнэсэ! – мерсь Владимир Волков.

Вете иетнень перть топавтозь тевтнеде пачтясь Эрзянь ды мокшонь раськень регионъютконь общественной вейсэндявксонь прявтось Юрий Мишанин. Тешкстызе, Инекужонь темась пек эрявикс ды канды домка смусть. Теньсэ эштё весть тешкстави эрзянь ды мокшонь раськенть прявт тарказо Россиянть историясо ды культурасо. Валонзо коряс, вейсэндявксонть тевтеемазо целанек алтазь эрзянь ды мокшонь койтнень ванстомантень ды сюпалгавтомантень.

– Вете иетнень перть миненек ламо мезе удалась топавтомс эрзянь-мокшонь раськень культуранть сюпалгавтоманть, межэтнической сюлмотнень кемекстамонть, Мордовия Республикань имидженть кастоманть коряс, – мерсь Юрий Мишанин.

Ёвтызе, пек лезэвстэ важодить эрзянь-мокшонь раськень культурань вейсэндявкстнэ весе масторонть келес. Меельце вете иетнень перть од вейсэндявкст пурнавсть Саратовань, Новосибирскоень, Кемеровань, Челябань ды Рязанень областтнесэ, Крымсэ ды Якутиясо. Вадря ёндо тешкстазель Ульяновскоень областной вейсэндявксонть важодемазо, тосо 37 школатнесэ тонавтневи эрзянь келесь, ютавтовить покш кенярксчить. Виев важодема раськень койтнень-кирдатнень ванстомга топавтови Пензань ёнкссо. Омбоце ие «Шумбрат!» фестивалесь ютавтови Крым Республикасо, тедеде сон ветявсь Ялта ды Алушта оштнесэ. Истя жо тешкстазельть раськень культурань лия вейсэндявкстнэ, конат важодить аволь ланга-прява, а весе оймень путозь ванстыть ды сюпалгавтыть эрзянь-мокшонь раськень культуранть, кельтнень.

Ю.А.Мишанин тешкстызе, Эрзянь ды мокшонь раськень регионъютконь общественной вейсэндявксось сеедьстэ ютавтни покш промкст, косо кепсевить пшти кевкстемат ды ёвтавить сынст витеманть коряс мельтне-арсематне. Невтемакс, Мордовиянь Прявтонтень вейсэндявксонть пшкадеманзо вельде явозь малав 8 млн. целковойть эрзянь ды мокшонь кельтнесэ учебниктнень нолдамс, явозь транспорт раськень редакциятнень туртов, питневтеме явови литература регионтнэс, косо эрить эрзятне ды мокшотне. Ю.А.Мишанин ёвтнесь раськень кенярксчитнень ютавтомадост, эрзянь ды мокшонь кельтнень тонавтомадост, учебниктнень, энциклопедиятнень нолдамодост, олимпиадатнень ды пелькстамотнень ютавтомадост.
Тешкстасынек, Инекужонть лувсо делегаттнэ Эрзянь ды мокшонь раськень регионъютконь общественной вейсэндявксонь прявтокс таго кочкизь Юрий Мишанинэнь.

Омбоце чистэнть Инекужонть роботась поладовсь вете секциява. Кортамось мольсь минек масторонь социумсо эрзянь ды мокшонь раськетнень эрямодо, раськень культуранть, литературанть, СМИ-тнень ванстомадо ды неень шкань мелявкстнэде, тиринь кельтнеде образованиянь системасонть, государствань властенть ды гражданской обществань органтнэнь вейсэнь важодемадост, семиятнень койтнеде-кирдатнеде ды неень шкань демографиянь процесстнэде. Ловнозельть ламо докладт, секциятнень весе участниктне совавтозельть кортамотнес ды ёвтызь мелест-арсемаст. Седе келейстэ секциятнень важодемадо ёвтнетяно сыця номертнэсэ.

Седе тов Республикань Культурань кудосо ютась пленарной промкс, косо секциятнень прявттнэ ловнызь роботамодост эсест отчёттнэнь ды примазель Эрзянь ды мокшонь раськень регионъютконь общественной вейсэндявксонь VII-це Съездэнь Резолюциясь. Истя жо ловнозель Исполнительной комитетэнь од составось, козонь совасть 55 ломанть. Исполкомонть прявтокс таго кочказель А.С.Лузгин, сонзэ полавтыцякс – Е.Е.Ледяйкин ды В.И.Брындина, секретарекс – О.В.Дулкин. Съездэсь прядовсь Мордовиянь артисттнэнь концертсэ.

Татьяна ИКОННИКОВА
ФОТОТНЕ Э.РЕТУНСКОЕНЬ
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».