2025 иень февральстэ Мордовия Республикасо ушодызе важодеманзо «Герои среди СВОих» программась. Ушодксонь юрокс кармась «Время героев» президентэнь программась. «Герои среди СВОих» региональной программась – те социальной прявт проект, конась течи вадрясто топавтови Мордовиясо. Сон анокстазь СВО-нь участниктнень ды ветерантнэнь ютксто квалифицированной кадратнень анокстамонть туртов госвластень органтнэсэ, общественной ды политической организациятнесэ, республикань предприятиятнесэ седе тов важодеманть туртов.
Ковдо ламо участниктнень ютксо ютавтовсть кочкамот, эйзэст совасть тестированият ды эксперттнэнь марто очной кортамот. Седе тов молить тонавтнемань ниле модульть. Весемезэ те программантень яволявтозель 701 ломань. Эксперттнэ кочкасть ансяк 321 боец. Неть уцяскав ломантнень юткс понгсь алкуксонь церась, специальной военной операциянь ветеранось, отставкасо полковникесь Александр Асманов.
– Минек туртов те программась эрямосо панжи од кить-янт. Аволь умок республикасо прядовсь тонавтнемань колмоце модулесь. Эряви евтамс покш сюкпря сеть ломантнень туртов, конатне важодить мартонок свалшкане. Эрьва модуленть программазо пек сюпав. Минек марто ютавтыть мельстуиця лекцият, мастер-класст, компетентной спикер марто тематической вастовомат. Теориянь весе материалось алтави минек ерокчинь пурнамонтень ды кастомантень, мезесь карми лездамо тенек седе тов важодемасо. Межмодульной стажировканть лувсо программань участниктне важодить тевень содыця наставник марто. Сынст ютксо – министрат, покш организациянь прявтт, общественной деятельть. Саемга, монь наставникем – МР-нь Прявтонь ды МР-нь Правительствань Администрациянь руководителесь Булат Фирдинатович Хайрутдинов. Те программанть ютамсто минь, участниктне, пурнатано лия енов а молиця содамочить, конатне седе тов, кемтяно, лездыть эрьванть эрямосо, – евтни Александр Асманов.
Мекс Александр сюлмизе эрямонзо военной службанть марто, кода понгсь СВО-нь таркатнес – теде ды лиядо евтнетяно материалсонть.
Александр Асманов чачсь-кассь Саранск ошонь округонь Луховка поселкасо. Тетязо, Виктор Данилович, ламо иеть важодсь Луховкань спортивной школань прявтокс, ветясь зярыя секцият. Авазо, Лидия Александровна, роботась школасо тонавтыцякс. Асмановтнень семиясо эйкакштне (Александр Викторовичень ули Максим ялаксозо) вишка порасто саезь содасть дисциплинанть.
Александр Асманов вейксэ класстнэнь прядомадо мейле тонавтнесь машиностроительной техникумсо. Седе тов – Н.П. Огарев лемсэ МГУ-нь юридической факультетсэ. Сон эйкакш пингестэ саезь бажась улемс следователекс, ансяк эрямосонть весемесь лиссь аламодо лиякс. Университеттэ мейле Александр кармась важодеме региононь МВД-сэ юристэкс-консультантокс. Те тевенть топавтсь а вейке ие. Вадря важодеманзо сеске редизь прявттнэ. Ды шкань ютазь, 2004 иестэ, Александр Викторович ютась важодеме СОБР подразделенияв. Нама, тесэ ков седе стакаль. Эрявсь улемс виевекс, кемекс ды шумбракс. Стакачитне истят цераломантнень седеяк кепедить мелест ютамс икелев ды мездеяк а пелемс.
– Те важодемась – свалшкань «форсмажор». Бути вечкат кувать удомо, тантейстэ ярсамо, тонеть а вечкеви спортось ды режимесь, теемс истямо таркасо теть а мезе. Военной службанть шкасто питней эрьва минутась. Эрьва чистэ ульть анок важодемс зыянов преступник марто, лиясто роботамс сави чинек-венек, сестэ уш иля пеняця, кода тон сизить. Службасо те валонть киньгак пельде а марясак, – евтни Александр Асманов.
Минек героесь тешксты, стакачитнеде ульнесть байтяк, ансяк сынст лангс апак вано, церась вечксь эсь тевензэ, путсь тензэ ойме. Сон нейгак ледстни, зяроксть тензэ савсь ардтнемс командировкав. Ламот неть командировкатне ютасть Северной Кавказсо. Аволь весть Александр Викторович эсь боецэнзэ марто венть ютавтнесть кельме мода лангсо ды панжадо менель ало, аштесть вачосто, кельмсесть, понгонесть ятонь леднематнень алов ды седе тов. Весе те макссь церантень эсь эрямонть ванстомань покш опыт. А эрьвантень истямо службась туи мельс, те важодемась прок орма, конасонть эряви сэредемс.
СВО-нь таркатнесэ улемстэ
Александр Асмановонь СВО-нь таркатнес васенце командировказо ульнесь 2022 иень июньстэ. Позывноезэль «Арбат». Сон нейгак ледстни се чинть, зярдо васенцеде вастовсь тосо эсенек цератнень марто.
– Эрьва церась, конась вансты Тиринь масторонть, – алкуксонь герой! Сынст героизмаст – апелемачись, мезе марто сынь сыргасть тиринь кудосто масторонть сэтьмечинзэ ванстомо. Мон аштян каштанчисэ минек цератнень кувалма. Сынь эзть пота удалов, зярдо сась тенст повестка, мольсть апак тално, – корты Александр Викторович.
СВО-нь таркатнестэ велявтомадо мейле церась арсесь лия енов а молиця проект – панжомс Мордовиясо «Выживание в экстремальных условиях» куншкакуро. Те мелесь чачсь сестэ, зярдо ансяк ушодовсь спецоперациясь.
– Зярдо тон 21 ие максыть истямо таркасо службантень, тонь таштави покш опыт, конась лезды аволь ансяк эстеть, лиятнененьгак. Курсатнень тевс нолдамга монень лездась вадря ялгам – Валентин Викторович Крутов. Сон тейсь реклама, лездась муемс занятиянь ютавтомань туртов тарка. Ды, 2022 иестэ, юткошкасто мон карминь пурнамо ломанть ды евтнеме тенст, кода ветямс прянть стака шкасто, кода ванстовомс, бути понгить зыянс, мезе эряви СВО-нь таркатнев молицятнень туртов ды седе тов. Васенце вастоматнес сакшность 400 ламо ломанть, Саранскоень спортивной комплексэнь залось пешксель. Мезе дивавты, ламот кунсолыцятнень ютксто ульнесть тейтерьават, – евтни Александр Асманов.
Пенсияс лисемадо икеле сон якась СВО-в весемезэ колмоксть. Пазось ванстызе, кудов велявтсь шумбрасто-парсте. Неень шкане Александр Асманов свалшкань инже «Кемечинь уроктнесэ», конатнень ютавтыть школасо тонавтницятнень ды студенттнэнь туртов. Эрьва истямо уроконтень церась вадрясто аноксты, евтни эйкакштненень эрямодонзо ды боевой кидензэ.
– Мельспаро, зярдо эйкакштне кунсолыть эйсэть, максыть кевкстемат. Лисни, неень шкань масторонть историязо токи сынст седеест. Минек жо прявт тевенек – кемекстамс эйкакштнесэ патриотизманть, – тешксты тиринь масторонь ванстыцясь.
Эряви евтамс, «Центр по выживанию в экстремальных условиях» проектэнзэ лангсо Александр Викторович важоди свалшкане. Ды нейгак эрьва вастовомантень сыть ламо ломанть.
– Проектэсь карми важодеме се шкас, зярс карми эрявомо ломантненень. «Герои среди СВОих» региональной программанть лувсо нилеце модуленть прядовомсто эрьва боецэсь невтьсы эсензэ проектэнзэ, конань сон арсизе тонавтнемань шкастонть. Монь проектэм ули, ансяк сонзэ вадрялгавтомга важодемась моли эрьва чистэ, – евтни церась.
Весементь прявтсо – семиясь
Александр Асмановонь уцясказо – семиязо. Елена низэ важоди врачокс С.В. Катков лемсэ республикань клинической больницясо. Авась уш ламо иеть роботы гастроэнтерологокс. Мирдть-нить Асмановтне трить-кастыть кавто эйкакшт. Артур цераст тусь тетянзо киява, прядсь военной училища, ней канды военной службанть. Арина тейтерест тонавтни школасо, 11-це классо, зярс эсензэ туртов эзизе кемекста, ков моли тонавтнеме седе тов. Кода тешксты Александр Викторович, эйкакшонзо, кода сонськак, вишка порасто саезь явить мель спортонтень, дисциплинанть ды кемекстазь аравтоматнень лангс а пеняцить. Кие соды, паряк, Арина тейтерезэяк седе тов кочкасы военной службанть. Тенень Александр Асманов карми ансяк кенярдомо.
Алёна АРТЕМЬЕВА.
Фототне «Защитники Отечества» Госфондонть.