Кода тешкстызе государствань прявтось Владимир Владимирович Путин, семиятнень ванстомань, сыненст лездамонь, престижень кевкстематне лововить сехте эрявиксэкс Россиянь эрицятнень ламолгавтомасо. Башка мель явови семиянь питнейчитнень ванстомантень ды ламо эйкакшонь триця семиятненень лездамонтень. Течи весе важодемась ветяви истямо лувсо, штобу эйкакш марто семиятне апак пеле вановольть вандынь чинтень, чачтовольть седе ламо эйкакшт.
Покш Березникень районось сюпав ламо эйкакшонь триця семиясо. Вейкесь эйстэст – Госагыр велестэ Маркинтнэнь кудораськесь. Ольга Ивановна ды Юрий Михайлович трясть-кастсть ниле эйкакшт. Сынст семиясо вечкемась, ояксчись ды уцяскась аштить васенце таркасо.
– Мирдень марто минськак ламо эйкакшонь семиясто. Монь тетянь-авань кассть 8 эйкакшт, мирдень семиясо – кото. Эсенек колмо тейтерть – Анастасия, Наталья ды Ксения ды вейке церанок – Михаил. Эряви меремс, церанть чачоманзо пек учинек. Бажинек, штобу Маркинтнэнь улевель раськест поладыця. Семиясь – те уцяска! Зярдо семиясо сэтьмечи ды ояксчи – те покш сюпавчи. Минек бабанок кортыль, а эряви киненьгак евтнемс эсь семиясо тевтнеде, уцяскась эдь вечки чатьмонема. Сонзэ кармавтоматнень топавтозь эрятанояк, – евтни Ольга Ивановна.
Ольга Маркина чачсь-кассь Покш Березникень райононь Госагыр эрзянь велесэ ламо эйкакшонь триця семиясо. Тетянзо-аванзо – Иван Григорьевич ды Надежда Николаевна Суняйкинтнэнь, кассть кавксо эйкакшт, Ольга колмоцель. Вишкинестэ саезь уш тейтересь варчизе велесэ эрямонь танстенть. Суняйкинтнэ роботасть колхозсо. Ольга Ивановнань тетязо пингензэ перть ульнесь шоферэкс, авазо – скалонь потявтыцякс. Весе тейтертне, семиясонть эйстэст ульнесть вете, овсе вишкинестэ саезь роботасть фермасо. Ольга эзь явово эйстэст, сон якась аванстэнь лездамо скалонь потявтомо, алксост урядамо, ракшатнень андомо. Зярдо тензэ топодсть 10 иеть, патянзо-сазоронзо марто сайсть скалонь группат ды кармасть важодеме покштнень марто вейкетьстэ.
Школань прядомадо мейле тейтересь кочкизе М.Е. Евсевьев лемсэ МГПИ-нть (ней – университет), начальной классонь тонавтыцянь специальностенть. Пек покш мелезэль роботамс эйкакш марто.
1995 иестэ велявтсь тиринь велев ды кармась роботамо Госагыр велень школасо начальной классонь тонавтыцякс, заочна поладызе тонавтнеманзо институтсо. Теке жо иестэнть лиссь мирденень Юрий Маркин экшс. Церась эсест велень, вейкест-вейкест содасть вишкинестэ саезь. Юрий Михайлович сестэ роботась тиринь велень колхозсо прявт инженерэкс (ней важоди «Атемарская» нармунень фабрикасо). Урьвакстомадо-венчамодо мейле од нинть ветизе тиринь кудов ды сынь эрясть тетянзо-аванзо марто. Ольга Ивановна кармась тенст тиринь тейтерекс ды мельгаст якамонтень путсь ойме.
1997 иестэ Ольга Маркина получась высшей образованиядо диплом. Школасо роботась 15 иеть, сонзэ пекстамозонзо. Важодемавтомо кадовозь, 2010 иестэ саезь 2017 иенть самс, ветясь кудоютконь тевть, трясь-кастсь эйкакшт.
2017 иень июньстэ Госагыр велесэ панжозель «Колосок» эйдень кужось. Ольга Маркинань тердизь важодеме воспитателекс, сон кувать эзь арсе, покш мельсэ кундась тевс.
– Зярдо эйдень кужонть ансяк панжизь, якицятнеде ульнесь 12 эйкакшт. Ней, нама, ков седе аламо – весемезэ колмо. Ды сынь монь туртов прок эсень. Весе колмонест эште овсе вишкинеть, кавтотне колмо иетнень ансяк эскельдизь, вейкенть жо кавтояк эзть топоде. Важодемс мартост монень вечкеви. Эйкакштне – те весе монь эрямом, – евтни Ольга Ивановна.
Ламо эйкакшонь аванть туртов лиякс а кода. Маркинтнэнь семиясо васенце тейтерест, Анастасия, чачсь 1996 иестэ, 2001 иестэ – Наталья. Кавонест покш тейтертнень улить уш эсест семияст.
Анастасия прядызе Ульяновскоень государственной университетэнть ды получась высшей образования «провизор» специальностенть коряс. Важоди Чаунзасо аптекасо. Александр мирдензэ марто кастыть ниле церат: Константинэнь, Кириллэнь, Тимофеень ды Арсениень.
Наталья, 9 класстнэнь прядомадо мейле, тусь аванзо киява – тонавтнесь М.Е. Евсевьев лемсэ педагогической институтсо «начальной классонь тонавтыця» специальностенть коряс. 2025 иестэ прядызе Московонь психолого-социальной университетэнть «логопедия» специальностенть коряс. Ней получи омбоце высшей образования тиринь МГПУ-нь филологиянь факультетсэ. Иван мирдензэ марто кастыть Ольга тейтерькаст. Наталья, кода авазояк, важодсь эйдень кужосо воспитателекс, ней вишка эйкакш марто декретной отпусксо. Мирдезэ юты служба армиясо.
Колмоце тейтерест – Ксениянь туртов 14 иеть. Тонавтни Покш Березникень 2 № средней школасо 8 классо.
2012 иестэ Маркинтнэнь чачсь учовикс цераст – Михаил. Сон тонавтни 7 классо.
Ксения ды Михаил – школань мероприятиятнень свалшкань участникть, содамочист ды ерокчист невтнить олимпиадатнесэ ды спортонь пелькстамотнесэ. Кавонест тонавтнить «ветес».
– Тетям-авам минек тримизь аволь ансяк важодемань вечкицякс, истя жо эсь покштятнень-бабатнень койтнень-кирдатнень ванстыцякс. Сынь снартнесть максомс миненек, эсь эйкакштненень, весементь. Минь кавксонек получинек высшей образования ды эрямосонть муинек эсь кинть. Монь сазором – Наталья Ивановна Суняйкина, истя жо ламо эйкакшонь ава. Сынст касыть 6 эйкакшост. Эрить эсенек велесэ, роботы фельдшерэкс. Специальностень коряс хирург, – евтни Ольга Маркина. – Минек прявт сюпавчинек – минек эйкакшонок, вечкиця ды ояксчисэ эриця кудораськенек. Эйкакштне аштить аволь ансяк минек тевтнень невтемакс, истя жо кенярксокс ды каштанчикс.
Ольга Ивановна ды Юрий Михайлович эйкакштнень трямонть-кастоманть кисэ тешкстазь покш казнесэ. Теде башка, Ольга Ивановна – Мордовия Республикань Прявтонь «Раськень каштанчи» премиянь лауреат «За вклад в сохранение и поддержку традиционных российских духовно-нравственных ценностей» номинациясонть.
Юлия Еремина