Вторник, марта 19, 2024
Важное

«Равось – ояксчинь лей. Рав чирень раськетнень культуратнень вейсэнь кортамось» XXI-це экспедициясь-фестивалесь а улевель бу истямо мельстуицякс, бути а сонзэ прявтось, «тиринь авась», кисэнзэ мелявтыцясь – МР-нь Культурань, раськень политикань, архивень тевень министрась Светлана Баулина. Экспедициянь меельце чистэнть минь вастовкшнынек мартонзо ды кортнинек седе, мезе одось ульнесь те иестэ, мейсэ дивавтызь Светлана Никитовнань участниктне ды мезе эряви теемс, штобу понгомс фестивалентень сы иестэ?


– Тешкстаса, тедедень экспедициясь лиятнень ёнов а молицяль! Эйсэнзэ ульнесть ламо од ломанть, ёжовт, эрязат, пертьпельксэнть полавтомс бажицят. Сынь паро мельсэ сакшность весе мероприятиятнес ды невтизь Мордовиянтень вечкеманть, эсь пряст, истя жо флэшмобтнесэ оршамопелест, конатне, тешкстаса, истя жо тедеде ютавтозельть васенцеде.

– Экспедициянь участниктненень Мордовиянь Прявтось Артём Здунов кучокшось поздоров марто пшкадема. Теке марто, содатано, сон тедеде эштё явшесь покш казнеть республикань творческой коллективтненень…

– Минь, культурань роботниктне, свал кемтяно Артём Алексеевичень лездамонзо лангс. Тедеде культурань программатнень юрсо максозельть ярмакт од спектаклятнень путомс. Сынст премьератне кармить сёксня.

Экспедициянть сыргамодо икеле максозельть ярмакт творческой коллективтненень оршамопелень стамс, анокстазельть эскизт. Весе покш мельспаросольть. Эдь гастролев ардтнемстэ морыцятненень-киштицятненень ули мель невтемс аволь ансяк шкинемаст, истя жо оршамопелень мазычист. Мордовиянь Прявтонть пельде лезксэсь сась пек шкастонзо. Секскак покш сюкпря тензэ! Сыця шкасто творческой коллективтне кенярдовтсамизь од программатнесэ, конатнень курок несынек ютавтовиця фестивальтнесэ ды форумтнесэ: «Диалог культур» финнэнь-угрань од ломантнень форумсонть, сентябрясто – «Шумбрат» раськень культурань праздниксэнть ды ламо лия мероприятиятнесэ.

– Светлана Никитовна, вечкевсть тенк эрзянь ды мокшонь кельтнень тонавтомань интенсивтне? Весемесь-аволь топавтозель, мезе арсезель ютавтомс экспедициянть шкасто?

– Монень ды, арсян, весенень, кить эйзэст сакшность, неть уроктне пек вечкевсть. Теплоходсонть теевсь уш коекс эрьва валске «шумбракстнемс», ёвтамс «сюкпря», «вастомазонок», арсемс «тантейстэ ярсамс»... Арсетяно кадомс истят тонавтоматнень сыця иень программантеньгак, ансяк бути анокстатано сеедьстэ вастневиця валтнэнь электронной валкске.

Тешкстаса, фестивалень программась топавтозь педе-пес. Кода лангозонок вансть туристтнэ, тынсь неиде! Сынь сакшность минек мероприятиятнес ды неявсь, кода сявадсть сельмест. Теплоходсонть ульнесь эрьгелемань, ёрокчинь кошт ды те, васняяк, од ломантнень кувалма. Этноэкспедициясь сюлминзе вейс весень ды седе тов эряви а сеземс ялгаксчинь суринетнень, конатне вейсэндязь вейке мельсэ – тиринь Мордовиянтень ды масторонтень вечкемасонть.

– Кодамокс карми сыця шкань экспедициясь ды кода тозонь понгомс?
– Монь мельсэ, эрьва экспедициясонть ней эрявить ванкшномс проектт, теемс теплоходонть культурань сферасо проектной управлениянь коряс образовательной площадкакс. Ютавтомс тонавтомань семинарт НКО-тнень представительтненень: кода проекттнэнь сёрмадомс, совавтомс эрямос. Те тевесь эряви регионтнэстэ сыцятнененьгак.

Кода теевемс минек экспедициянь участникекс? Арсян, сы иестэ ютавттано тень коряс натой пелькстамо. Минек республикасо истя зняро од ёроков ломаненек! Невтеде эсь прянк эрьва косо, тынк нетядызь ды сайтядызь!
А те иень фестивалесь, эштё весть мерян, ютась пек парсте. Сонзэ теизь весе 90 участниктне! Кадык истя ули свал!

Марина ДЕВЯТОВА
https://sun9-west.userapi.com/sun9-8/s/v1/ig2/QfqDp_F0bWPmOMYm_bg5U4f0y_KEdT8EA1cbi9bBhdzgDesmEy7r2-UUCuUraGpBhcH05QWMK5Zt605UBvF4vqrr.jpg?size=604x579&quality=95&type=album");">https://sun7.userapi.com/sun7-6/s/v1/ig2/i-vhe7BkLB8fLBYXSYWbqpJEijt_1SAJOcAqKl9BrkTf8OKntQcgzNEbNZ9TPb8z98G0_pPxjp0NFZvECNjMav_t.jpg?size=604x453&quality=95&type=album");">

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».