РЕСПУБЛИКАНЬ ПАКСЯТНЕСЭ УШОДОВСЬ СЕХТЕ ПСИ ШКАСЬ – СЮРОТНЕНЬ ПИВСЭМАСЬ. КОМБАЙНАТНЕНЬ АРДОМАСЬ, СЫНСТ УВТОСЬ КЕЦЯВТЫ, АРСЕТЯНО, ЭРЬВАНТЬ. ТЕДЕДЕ МИНЕК АГРАРИЙТНЕ БАЖИТЬ ПУРНАМС 1,5 МЛН ТОННАТ СЮРО.
Неть читнестэ минь пачколинек «МАПО «Восток» ООО-нь предприятиянтень. Сынст паксяст сравтовсть кавто районга – Отяжбуева ды Ицялбуева. Весе важодицятне ней паксясот. А шождаль кундамс прявт агрономонтькак. Ней сонзэ ламо тевензэ ды мелявксонзо.
– Сюротнень пивсэме ушодынек июлень 27-це чистэ. Лия иетнень коряс кавто недлядо седе мейле. Васня, нама, карминек пивсэме озимой товзюротнень. Сынь видезь 5 тёжат гектартнэнь лангсо. Сюротне парт – саеви 45,4 центнерт гектарсто. Летькесь – 15%. Пивсыть вейксэ комбайнат (весемезэ кармить пивсэме 20 комбайнат), сюронть усксить 6 КамАЗт. Цёратне важодить валскень 6 чассто саезь позда чокшнес. Мелят раминек вейке комбайна, тедеде – эште кавто АКРОССт. Сынь вадрят. Ули меленек эштё рамамс. Нуемстэ явовтано робочей колмо группава, эрьвасонть ладязь агроном, механик, ремонтной мастерской, истя жо зыянонь а нолдамга трактор ведень боцька марто ардтни. Курок весе комбайнёртнэнь кармить рацияст, те шождалгавтсы тевест. Одкстомтоматнень коряс сюкпря эряви ёвтамс минек прявтонтень А. В. Трошиннэнь, – пачтясь «Восток» МАПО-нь прявт агрономось Николай Слугин. Сонзэ марто Андрей цёразояк важоди агрономокс.
Комбайнёртнэ Ицялбуень ды Отяжбуень велетнестэ. Тунда сынь сокить-видить модат, пивсэмстэ озыть комбайнатнес. Эсь тевест содасызь парсте. Ютксост улить сеть, кить ламо иень перть важодить мода лангсо. Неть: Александр Киринкин, Сергей Инчин, Евгений Эрзяйкин, Сергей Беляев, Николай Клинов, Дмитрий Трофимов ды лият. Сынь тонавтыть ды максыть превть од ломантненень.
– Пивсэма шкасто важодицятнень ёжост паро, велень хозяйствасо роботыцятнень туртов нуемась – теке кенярксчи! Те шканть весе учотано. Ней эрявить тенек маней чить! Шкастонзо пивсэмс, усксемс сюронть. Бути модантень кармат явомо покш мель, сон паросо теть пандыяк, – корты Николай Иванович.
«МАПО «Восток» ООО-нь модатнеде 20 тёжат гектарт. Тедеде сынь видсть эрьва кодат культурат: 2573 гектарт шуж, 2124 гектарт яровой товзюро, 320 гектарт ликша, малав 1700 гектарт кснав, 450 гектарт лияназ, 400 гектарт соя, 265 гектарт рапс, малав 400 гектарт силосокс кукуруза, 100 гектартнэ максозь зёрнакс кукурузанть алов. Теде, башка, 383 гектарт вейке иень тикшеть, малав 900 гектарт – ламо иень. Тедеде малав 3000 гектарт явозь ламбамо якстерькаентень.
Товзюронть пивсэмадо мейле кармить нуеме кснавонть, сон туи видьмексэкс. Мейле кундыть яровойтнес.
Чарькодеви, пивсэма шкасто ломантненень эсь ютковасткак а кона шкане кортнемс. Ансяк минь ялатеке чинь куншкасто энялдынек куш кавтошка валт ёвтавольть тенек комбайнёртнэде.
Дмитрий Гущиннэнь 22 иеть. Сон чачсь-кассь Ицялбуень Пардалесэ. Школанть прядомадо мейле тонавтнесь Кемлянь аграрной колледжсэ. Мейле служась армиясо. Сон колмоце кизэ сакшны «Восток» МАПО-в сюронь пивсэме. Важоди АКРОСС комбайнасо. Тетязояк важоди те предприятиясонть. Самай сон сайнесь цёрынензэ мартонзо, зярдо тона эште вишкинель, комбайнасо пивсэме. Истя вана кассь од комбайнёр, кона ней пивсы ськамонзо те покштояк покш комбайнасонть.
Владимир Яковлевич Ютяев МАПО-со уш 15 иеть. Сон чачсь Отяжбуень Киржеманы велесэ. Важоди механизаторокс. Пивсэма шкасто свал озакшны комбайнас. Ды лия важодема таркасо а неи прянзо.
– Зярдо сюрось чачи вадря ды ламо – ёжоськак паро, кецнят тенень а ёвтавияк кода. Ней васенце тевенек – шкастонзо пивсэмс, – мерсь В. Я. Ютяев.
Татьяна Маторкина
Фототне
Эдуард РЕТУНСКИЕНЬ