Вторник, марта 19, 2024
Важное



Покш Березникень районсо арась истямо ломань, кие бу аволизе сода «Полет» крестьянонь-фермерэнь хозяйстванть, конань азорозо Сергей Александрович Кипаев.

Велень хозяйствань продукциянзо – ловсонть ды сывеленть – мельспаросо рамсить аволь ансяк Покш Березник велень, сонзэ томбалень эрицятнеяк. Сергей Александрович фермерэнь тевенть топавты уш аволь вейке кементь иеть. Фермерэнть ули аволь ансяк фермазо, истя жо паркозо, косо кирдевить тракторт, комбайнат, автомашинат, велень хозяйствань прицепной инвентарь. Эштё фермерэнь тевенть ушодомань васень шкастонть С.А.Кипаев чарькодсь, ракшань трямось парсте а ладяви, а карминдерят мель явомо растениеводствантень. Васень шкастонть С.А.Кипаевень аравтлувсо ульнесь букинень трямось. Но мейле одс витнизе ферманть ды арсесь тевензэ келейгавтомс. Крестьянонь-фермерэнь хозяйствань азоронть С.А.Кипаевень васня ульнесть 162 скалонзо. Эйстэст 29 ульнесть потявтовицят. Течи фермасонзо кирдевить-андовить 195 ракшат, эйстэст потявтовить 46. Тедеде, невтемга, фермерэсь мись 30,5 тоннат ловсо, мезесь мелень коряс седе ламо. Ней иезэнзэ эрьва скалсто саеви 6230 килограммат ловсо, ды неть цифратне пек парт. Зняро ловсо скалсто районсо кияк а потявты.

С.А.Кипаев аволь ансяк анды ракшат, истя жо виевгавты сюронь кастоманть. Бути фермерэсь ушодсь важодеме 100 гектарт мода марто, течи крестьянонь-фермерэнь хозяйстванть мельга кемекстазь 2,5 тёжат гектарт ды лангсост касты сюпав урожай. Истя, 2019 иестэ, невтемга, фермерэсь сайсь 3069 тоннат сюро, эрьва гектарсто – 16,7 центнерт. Сергей Александрович видни озимойть, яровой товзюро, истя жо шуж, кормовой культурат. Фермерэсь ракшатнень анды тикшеде ды сенаждо, силосто ды фураждо. Максни бардаяк. Те иень телентень крестьянонь-фермерэнь хозяйствань азорось эрьва скалс анокстась 46 кормовой единицат.

– А мезть сёпомс, меельце иетнестэ монь кондятнэнень важодемась пек стакалгадсь, – ёвтни С.А.Кипаев фермерэсь. – Эрьва мезенть лангс касыть питнетне, ансяк велень хозяйствань продукциянть лангс питнетне а касыть. Кода илязо уле, мон эсь тевем а кадса, крестьянонь-фермерэнь хозяйстванть а калавтса.
Эряви меремс, С.А.Кипаев фермерэсь покш мель яви животноводстванть виевгавтомантень. Кавто-колмо иень ютазь полавтни племакс буканть, скалонь стадас нолдтни 20-25 вазыиця скалт. Фермасонть скалонь вазыямонь шкась свал юты апак тално, вазтнэ ванстовить весе. Кизна ракшатне вановить калдасо, луга лангсо, тельня кирдевить кардосо. Весе те лезды скалсто ламо ловсонь саемантень.

«Полет» крестьянонь-фермерэнь хозяйствасонть теезь сисем важодема таркат. Сергей Александровичень прявтсо важодицятне тевест топавтыть вадрясто, покш ответственностень марязь. Неть – В.Н.Тирюшкин, Т.Б.Забатурина, А.И.Ромашкин. Арасель истямо тев – скалтнэ шкастонзо авольть андово ды авольть потявтово. Сынь важодить истя, кода хозяйствань азорось С.А.Кипаев. Сергей Александровичень хозяйствась аламонь-аламонь ары райононь виев хозяйстватнень ваксс. Сынст покш таликаст райононь бюджетэнть сюпалгавтомасо.

Ютазь иень велень хозяйствань невтематнень коряс «Полет» крестьянонь-фермерэнь хозяйствантень важодемасо покш изнявкстнэнь кис таго максозь райононь Администрациянь дипломось. Теньсэ, нама, покш таликазо сонзэ прявтонть – Сергей Александрович Кипаевень. Сон весе виензэ, содамочинзэ максы вейке тевентень – ламо ловсонь потявтомантень ды сывелень саемантень. Нурькинестэ, ракшань трямонтень.

Пётр ЗИНОВЬЕВ
Покш Березникень район

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».