Вторник, марта 19, 2024
Важное

Станислав Темаев чачсь 1993 иестэ Покш Игнатбуень Ташто Чамза велесэ. Школань прядомадо мейле тонавтнесь Н.П. Огарёв лемсэ МГУ-нь географической факультетсэ. Вишкапингстэ саезь сон пек вечки стихть.

Мадстемстэнзэ авазо моронь таркас свал ловнось тензэ стихть. Эйдесь тантейстэ матедевиль. Паряк, самай тестэ чачсь стихень покш вечкемась. Валморонь сёрмадомасо сон варчинзе виензэ 8-це классо тонавтнемстэ. Васенце стихотворениязо ульнесь эрзянь кельсэ.

– Зярдо тонавтнинь ды эринь Саранскойсэ, зярыяксть ульнинь од сёрмадыцянь семинарсо, эрзянь кельсэ сёрмадыцятнень ютксо. Нейгак покш мелем понгомс семинарс, ансяк эрян Нижней Новгородсо ды Саранскоев сеедьстэ сакшномс а савкшны, – корты Стас.

Од цёранть валморонзо лиснесть «Чилисема» ды «Сятко» журналтнэсэ. Теде башка, нолдазельть «Тешкс» вейсэнь пусмосо. Ней, кода Интернетэсь келейстэ эскельдясь икелев, стихензэ кармась путнеме Инстаграмсо. Стас терди весень тов совамс ды сёрмадстомс @temaevstas лопазонзо.

– Ней седе ламо сёрмадан рузонь кельсэ. Меельце иетнестэ эрян тиринь ёнксонь томбале, перькан рузт, савкшны кортамс седе ламо рузонь кельсэ. Ансяк ёвтан, улить ламо апак прядо сёрмадовксон. Сы шка, сынст прядсынь, сестэ тынь несынк сынст васенцекс. Ней прясон од арсемат, арсян нолдамо видеот, конатнесэ карман ловномо стихть.
Стас Темаев сеедьстэ невтни прянзо литературань вастовоматнесэ, ловны валморот Поэзиянь чокшнетнесэ. Эряви меремс, сон машты мазыйстэ-парсте ловномо стихть сцена лангсто. Аволь умок ульнесь Московсо Сергей Есенинэнь чачома чистэнзэ саезь 125 иетнень тешкстамосонть. Тосо ютась «История, сердцу знакомая» III-це фестиваль.

– Тов каязельть ламо яволявтомат, кочказельть ансяк кемень поэтт. Кенярдан, понгинь неть кементнень юткс. Ловнынь «Мы теперь уходим понемногу» Есенинэнь вейке стих ды колмо эсень. Эсенсетне велень тема лангс, конатнесэ невтезь неень велень эрямось эрьва ёндо, вадря ёнкстнэ ды а пек, невтезь монь покш вечкемам чачома модантень. Бажинь кандомс кунсолыцятнень седейс: велесь – те меельце сырнень покольне, конасонть пурназь кезэрень койтне-кирдатне, историянок. Ёмавтомс те покольненть – ёмавтомс Россиянть оймензэ. Теде икеле ансяк икеле иестэнть лиснинь ломань юткс стих марто, те пандемиянть марто савкшны ансяк Интернетсэ кучномс стихть конкурска, мезе тейнеме а вечкан, ды секскак чуросто кучнан. Вейке парось: те пандемиясь макссь ламо шка сёрмадомс од стихть, ловномс вечкевикс поэттнэнь: Высоцкоень, Евтушенконь, Бродскоень, Есенинэнь, минек Сергей Сеничевень – «МХАТик» театрань режиссёрось. Те театрасонть зярыя иеть паро мельсэ налксинь спектаклясо, – ёвтни Стас.

Миньгак теевтяно содавиксэкс Станислав Темаевень творчестванзо марто. Макссынек сонзэ валморонзо. Арсетяно од сёрмадыцянть туртов шкинемасо од изнявкст, икелев молема ки, кецявтомс ловныцятнень пшти, паро валморосо ды, мезеяк лангс апак вано, а стувтомс эрзянь поэзиянть.

* * *
Валскесь васолга уцордась пеельсэ,
Моданть эйстэ сон менеленть явизе.
Сеске манеесь невтизе келензэ,
Моданть пизёлонь турвасо палызе.
Оштне, велетне удомсто сыргозить,
Мазый сельминекс цецятне панжовить,
Ды церьковатнень пряст толсо
кирвазить,
Вирьстэ нармунень моротне
кандовить.
Пондакш паксятнень судринзе
варминесь,
Чинень пусмотнень кандынзе.
Кеман, кие неть чинетнень маринзе,
Мизолкс весенень кази се вастомга.
Паряк, зярдояк чарькодить ломантне:
Аволь ярмаксо уцяскась тееви.
Алкукс чанстев се ломанесь, конантень
Валскень зорювась вальмава неяви.
* * *
Сиянь тештеть менельганть
Почодсть чокшнесь ковонть марто.
Тёкшкестэнть а менемга
Састынестэ валыть валдост.
Мадинь ушос эзем лангс,
Сельмсэ тештень паксянть нуян.
Монь арась мелем кортамс,
Арсемава-лейга уян.
Кельме ковось чокшнень перть
Палси моданть ожо толсо.
А вайгель марят, а зэрть…
Пуви вармине коволсо.
Ламо мезде арсинь мон,
Ледстнинь эйкакшпингем яла.
Бути улевельть сёлмон,
Ливтявлинь тештетнень малав.
Зярдо валскесь оляс лиссь,
Атямарень тюссо валовсь,
Таго токась эйзэнь псись,
Венть экшезэ салазь салавсь.
* * *
Эрямосонть сех питней – авась.
Авась – эрямодонть питней.
Киньгак лиянь истямо арась
Лембе ды вечкиця седей.
Авань сельмензэ – маней менель,
Оймес вановтозо токи,
Сельведензэ – прок седейс пеель,
Мизолксозо эй солавты.
Чанстясамам ошов туемстэ,
Лембе валт пилезэнь тошки:
– Эряк, цёрынем, эсеть превсэ,
Панжат икелеть келей ки.
Тон бажак чарькодеме, ломань:
Зярс авать седеесь чави,
Сон свал карми кисэть озномо,
Сон свал тонь вечкеме карми.
ТИРИНЬ ВЕЛЕ
Тиринь велем! Чамза велем!
Тондеть морамс ули мелем!
Мон вечксынь тонь келей ульцят,
Кува чийнинь, варманть кундсезь.
Мон вечкса тонь тундонь коштот,
Вирень кужот, ловонь шушмот.
Кизна цецят перькат касыть,
Ламо сюро паксят максыть.
Тонь эрицят вадря ломанть:
Мазый тейтерть, шумбра цёрат.
Тон васолат оштнень эйстэ,
Ды сюпават паро тевсэ.
Вадря куля эйстэть моли.
Зярдояк мелем а моли
Тондеть морамс, Чамза велем!
Вечктян тонь ды эрзянь келем!
* * *
Вечкан аштеме лей чиресэ.
Озан, нежедян эчке кальс
Ды ванан, кода чись менельстэ
Кевери кирекс моданть лангс.
Ведьчамась толдонзо якстерди,
Калень лопатне тошкить тень…
Сынь свал монь мекев тезэнь тердить, –
Кортыть, тошна тенст монтемень.
Сестэ ёвтынь тенст берянь куля:
Туян куроксто мон ошов,
Зярс-бути велесэнть а улян,
А содан, зярдо сан кудов.
…Ней эрян ошсо. Чады теле,
А пачкодян се каленть видьс.
Седейсэнь свал чачома велем,
Тардян-ризнан мон сонзэ кис.
…Ды вана тундо! Сынь мон велев,
Тей чудикерькстнэ кинть невтизь.
Ташто Чамзась аштесь икелень,
Косто одксчим манеекс лиссь.
* * *
Умок ёмасть ленгень картне,
Сынь каязь ды стувтозь.
Стувтозь чакшкетне ды партне –
Сезевсь пингень лувось.
Колыть минек веленть эйсэ
Рузонь обуцятне.
Кияк а кирди эсь мельсэ
Паронь теицятнень.
А стувттан, чачома велем,
Совавттан эсь стихтнес.
Тон ды тиринь авань келем
Монень сехте питнейть!
* * *
Вечкемась тенек а неяви,
Кинь сон сюлми ды кинь сон яви.
Моньгак те вечкемась кундымим,
Мазый тейтерь марто сюлмимим.
Монь седейёжом калавтызе
Сонзэ певтеме мазычизэ.
Тейтересь тундонь цецякс цвети,
А стяко мештем кецязь кеци.

Анокстызе Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».