Вторник, марта 19, 2024
Важное


Июнень 6-це чистэ саезь 9-це чис Мордовия Республикань делегациясь региононь Правительствань Председателенть Владимир Сидоровонь прявтсо важодемань тевень коряс ульнесь Беларусь Республикасо. Минек делегациянть юрс совасть региононь министерстватнень ды ведомстватнень важодицятне, велень хозяйствань, переработкань ды промышленной предприятиятнень, культурань ды образованиянь учреждениятнень прявттнэ.


Тешкстасынек, Беларусь Республиканть ды Мордовиянть умок уш улить ояксчинь ды важодемань ёнкссо сюлмот.
Беларусесь – Мордовиянь внешнеэкономической покш партнёртнэстэ вейкесь. Микшнемань-экономикань сюлмот Беларусенть марто кирдить минек республикань 60 ламо предприятият. Истя жо минек регионось ды Беларусесь кемекстыть сюлмотнень культурань, образованиянь ды здравоохранениянь ёнкстнэсэ.
Официальной содавтоманть шкасто истя жо ульнесть зярыя вастовомат, конат алтавить кавто ёндонь сюлмотнень кемекстамонтень.

Беларусь Республикасо 2022 иесь ёвтазь Исторической ледстнемань иекс: Ине Отечественной войнадо ледстнематне аштить иневаньксэкс Беларусень ды Россиянь раськетнень туртов. Секскак, Беларусьсэ Мордовиянь делегациянть официальной содавтомась ушодовсь «Хатынь» государственной мемориальной комплексэнть ванномасто ды «Непокоренный человек» кеврунгонтень цецянь путомасто.
Белоруссиясо минек региононь делегациянть важодемазо ушодовсь Беларусь Республикасо Российской Федерациянь Чрезвычайной ды Полномочной посолонть Борис Грызлов марто вастовомастонть. Сонзэ шкасто кортавсь Мордовиянть ды Беларусь Республиканть ютксо сюлмотнень эштёяк седе кемекстамодо.

Владимир Сидоров ёвтнесь, Беларусесь ашти Мордовиянь омбоце покш экспортёрокс. Истя, тов миевить электрической машинат ды оборудования, чугункань кинь вагонт, кабельной продукция, оптикань инструментт ды аппаратт, цемент, пластмасса, фармацевтической продукция, истя жо Мордовиясь мии агропромышленной комплексэнь продукция. Владимир Сидоров тешкстызе, минек республикань предприятиятне анокт кастомс миевиця товартнэнь ламочинть ды покшолматнень. Эряви меремс, Мордовиясояк белорусской продукциясь рамавикс.

Ней, внешней политикань ёнкссо полавтоматнень кувалма, одс ванновить минек республикань промышленной, велень хозяйствань ды тонавтнемань сфератнесэ тевтне.
«Мордовиясо важоди Кооперациянь ды импортонь полавтомань центра. Те башка структура, конась арсесь импортонь полавтомань ды кепетемань од ёнкст, теке марто Мордовия Республикав белорусской продукциянть пачтямосояк. Минь пек кемтяно Беларусь Республикасо Российской Федерациянь Посольстванть неть тевтнесэ лездамонтень ды те масторонть марто минек сюлмотнень кемекстамонтень», – тешкстызе Мордовиянь премьер-министрась.

Теке жо чистэнть Минскойсэ ульнесь вастовома Беларусь Республикань Премьер-министрань полавтыцянть Леонид Заяц марто.
Леонид Заяц тешкстызе, Беларусь Республиканть ды Мордовиянть ютксо ладявсть кеме сюлмот. Теке марто ули эштё мезень коряс неть сюлмотнень седе кемекстамс.
«Миненек тукшны мельс тынк регионось ды бажатано кемекстамс ояксчинь, микшнемань-экономикань сюлмотнень», – мерсь Леонид Заяц.

МР-нь Правительствань Председателесь Владимир Сидоров ёвтнесь, минек регионось ды Беларусь Республикась ламо иень перть важодить велень хозяйствань ёнкссонть. Мордовиясо видневить белорусской селекциянь велень хозяйствань культуратне, ракшань трямонь ёнкссонть Беларусень предприятиятне аштить оборудованиянь ды искусственной осеменениянь туртов материалтнэнь пачтицякс. Истя жо кеме важодема ветяви велень хозяйствань техникань нолдыцятнень марто: минек республикань агропромышленной комплекссэнть важодить малав 2000 единицат Белоруссиянь анокставт техника. Те иестэ арсеви рамамс эштё 100 ламо единицат – неть тракторт, сюронь ды коромонь урядыця комбайнат.

2021 иестэ саезь Саранскойсэ важоди Ламо функциянь куншкакуро Беларусь Республикасо теевть велень хозяйствань ды коммунальной техникань миемань ды технической пачтямонь коряс.
«Арсетяно, Беларусь Республикав самонок кемекстасынзе сюлмотнень, – мерсь Владимир Сидоров. – Минь жо панжадот Белоруссиянь партнёртнэнь марто важодемантень».

Эряви меремс, Белоруссиясо улемстэ минек делегациясь примась участия «БелАгро-2022» велень хозяйствань, переработкань ды пищевой промышленностень раськеютконь XXXII-це специализированной выставкасо. Тесэ эсь пряст невтизь Польшань, Китаень, Белоруссиянь ды Россиянь компаниятне. Россиянь кемготово регионтнэ, теке марто Мордовияськак, невтизь пряст башка стендтка.
Мордовия Республикань предприятиятнень экспозициянь стендсэнть промышленной ды велень хозяйствань продукциядонть башка невтевсь раськень художественной промыслатнень ды ремеслатнень выставкась, ютавтовсть «Мордовия мастеровая» мастер-класст. Культурной программасонть эсь ёрокчист невтизь минек творческой коллективтне: «Умарина», «Торама», «Мерема», «Земляки» ансамблятне.
Июнень 8-це чистэ «Умарина» ансамблясь макссь покш концерт «Из Мордовии с любовью!» Червень ошонь Олячинь (свобода) площадьсэ.
Июнень 8-це чистэ Минскойсэ ютавтовсь промкс, косо ульнесть Беларусь Республикань налогтнень ды сбортнэнь коряс министрась Сергей Наливайко, Мордовиянь Правительствань Председателесь Владимир Сидоров ды делегациятнес совицятне.

«Беларусенть ды Мордовиянть вейсэнь важодемадо тевтнень коряс робочей группань промксось ульнесь малав иеде икеле, ансяк те шканть перть ламось полавтовсь: минек мастортнэ аштить санкциятнень условиятнесэ. Полавтовсть импортозамещениянь ёнкстнэ, эряви муемс важодемань од кить-янт. Течи весе сфератне тонавтнить важодеме од условиятнесэ. Кеман, Беларусентень ды Мордовиянтень вейсэ тень карми теемс седе шожда, – мерсь Сергей Наливайко. – Пек паро, Мордовиянь делегациянть самозо ютась аволь ансяк вастовоматнень юрсо, Российской Федерациясто минек инжетне содавтызь «БелАгро-2022» выставканть. Те пек вадря од партнёртнэнь муемга, сюлмотнень кемекстамга».

Истя жо важодемань тевтнень коряс Белоруссиясо улемстэ кортавсь культурань сферасо тевтнеде. Истя, кемекставсь вейсэнь важодема музеень тевень ёнкссонть, Россиянть ды Беларусенть ютксо кортавсь раськень кенярксчитнеде.

А вана Мордовиянь Отяжелень райононь прявтось Виктор Прокин ды Беларусень Минской областень Червянской райононь райисполкомонь председателень васенце полавтыцясь Александр Годун кемекстасть вейсэнь важодемадо вейсладямо.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».