Вторник, марта 19, 2024
Важное

СЕНТЯБРЯНЬ 2-це ЧИСТЭ, КОЕНЬ КОРЯС СЁКСНЯ, ЮТАВТОВСЬ «ШУМБРАТ» РЕГИОНЪЮТКОНЬ РАСЬКЕНЬ-ФОЛЬКЛОРОНЬ КЕНЯРКСЧИСЬ. ТЕДЕДЕ СОН УЛЬНЕСЬ АВОЛЬ САРАНСК ОШСО, КОВЫЛКИНАСОЛЬ.



Кенярксчинтень пурнавкшность делегацият масторонь кемгавтово регионтнэстэ, косо эрить эрзят ды мокшот, истя жо республикань весе районтнэстэ представительть.
Ковылкина ошонь прявт площадьсэнть сентябрянь аволь пси чипаенть ало сравтовкшность кенярксчинь площадкат, конатнесэ весе инжетне содавтовсть раськень культурань сюпавчитнень марто, эдь республикань эрьва районсонть ды эрьва регионсонть, косо эрить эрзятне ды мокшотне, эсест коест-кирдаст.

Орданьбуень Орозбиестэ ускозельть понань кемтне, Вирь Тавласто – чувтосто теезь налкшкетне, Теньгушевасто – сисем тюсонь варьгатне-цюлкатне, Покш Игнатовасто – эрзянь викшневкс марто някатне ды нардамотне, Ицялбуестэ – чувтонь скульптуратне ды пенчтне-вакантнэ, Зубова Полянасто – мокшонь авань кирьгава каявкстнэ… Ды ламо лия парочить ды сюпавчить невтезельть «Шумбратсонть». Эрьва районось снартнесь дивавтомс сеньсэ, мезесь арась шабра ёнкссо.
Кенярксчись ушодовкшнось торжественной промкссо, козонь сакшнось Мордовиянь Прявтось Артём Здунов. Кенярксчинь участниктненень ды инжетненень пшкадемстэ, сон тешкстызе, раськень культурась – те кеме государственностень юр. «Эряви пачтямс минек койтнень-кирдатнень од ломантненень, – мерсь сон. – Те минек безопасностень гарантия. Мартонок аволь ялгаксчисэ эриця мастортнэ вачкодить, васняяк, минек культуранть ланга, минек кемеманть ланга, раськень ундоксонок ланга. Ансяк минь тень а нолдасынек!»
Мордовиянь Прявтось пачтясь, «Шумбрат» регионъютконь кенярксчись карми ютавтовомо республикань эрьва кодат оштнесэ ды велетнесэ. Сы иестэ сон таго карми Мордовиянь прявт ошсонть. Саранск ошонь округонь прявтось Игорь Асабин саизе эстафетанть Ковылкинань райононь прявтонть Игорь Бутяйкинэнь пельде. Сонензэ максозель раськень штатолось.

Теде мейле Артём Здунов явшесь райононь ды республикань эрицятненень государственной наградат.
«МР-нь культурань заслуженной роботник» лемесь максозель Национальной библиотекань краеведениянь отделэнь библиотекарентень Вера Пронинанень, Мордовия Республикань заслуженной артистэнь лемесь максозель Краснослободской ёнксонь Чукалы велесэ чачозентень – «САДко» группань артистэнтень Александр Бардиннэнь. «За личный вклад в развитие Республики Мордовия» Мордовиянь Прявтонь Почетной знаксо казезель Пенза ёнксонь содавикс историкесь ды общественной деятелесь Владимир Первушкин, республикань Прявтонть пельде покш казнесэ казезельть Орозбиень кевень кевердицясь Юрий Аксенов, С.Д. Эрьзя лемсэ музеень сотрудникесь Наталья Челмакина, Кочкуровасто чувтосто керсицясь Василий Ширманкин ды лият.

Республикань Прявтось ды инжетне ваннызь раськень промыслатнень, декоративно-прикладной шкинемань, раськень ярсамопелень, предпринимательтнень продукциянь выставканть. Артём Здунов кортась Ковылкина ёнксонь эрицятнень, истя жо од ломантнень марто, кунсолынзе сынст энялдомаст, конат сюлмавозь муниципалитетэнть виевгавтоманзо ды вадрялгавтоманзо марто. Талновтыця кевкстематнень республикань руководителесь толковинзе Ковылкинань райононь прявтонть Игорь Бутяйкин марто.

Торжественной пелькстэнть мейле ульнесь мельстуиця концерт. Васняяк весень киштевтинзе Московсто «САДко» группась. Те содавикс коллективенть морамозо кармась вадря казнекс Ковылкина ёнксонь эрицятненень ды кенярксчинь инжетненень. Ваныцятне куватьс эзть нолда «САДконь» морыцятнень, сехте пек Александр Бардинэнь, конанть марто весе бажасть снимсевемс ды саемс кедьстэнзэ автограф.

«Шумбрат» кенярксчись теевсь алкуксонь праздникекс, конась пурны ламо раськень ломантнень вейсэ ды содавты весень культуратнень марто. Тедедень «Шумбратонть» мазылгавтомакс кармась покштояк покш самоварось, конась артозель раськень тешкссэ ды якстере-ашо тюссо. Ковылкинась те чистэнть пешксель раськень оршамопельсэ оршнезь ломанде ды гайтев «шумбрат» валось марявсь эрьва ёндо.

Ошонь прявт площадентень весе пурнавозтненень поздоровт истя жо ёвтасть республикань Госсобраниянь Председателесь Владимир Чибиркин, Федерациянь Советэнь сенаторось, «Ассоциация финно-угорских народов РФ» Весероссиянь общественной движениянь председателесь Пётр Тултаев, Эрзянь-мокшонь раськень регионъютконь общественной организациянь председателесь Юрий Мишанин.

Морамосост ды киштемасост весень кенярдовтызь «Росичи», «Умарина», «Келу», «Мерема» фольклоронь ансамблятне, Артём Мамаев, «Торама» фолк-группась. А эштё вейке сценасонть ёрокчист невтизь районтнэстэ велень ансамблятне, нурька морынень морыцятне.

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».