Суббота, апреля 20, 2024
Важное

Маень 9-це чистэ Саранскойсэ ды республикань районтнэсэ ютавтовсть торжественной мероприятият, конат алтазельть Ине Отечественной войнасо Изнямонь 78 иетненень.


Мордовиянь прявт ошонь Изнямонь площадьсэ ютавтовсь митинг-реквием, воинтнэнь-олякстомтыцятнень ине тевест ледстямо сакшность Саранскоень малав 10 тёжат эрицят ды инжеть. Почётонь таркатне максозельть ветерантнэнень. Митингенть ушодовомадо икеле сынст марто лембестэ кортась Мордовиянь Прявтось Артём Здунов. Митингсэнть истя жо ульнесть СВО-нь участниктне ды сынст семиятне.
Артём Здунов маень 9-це чинть лемдизе минек масторонь прявт кенярксчикс, ледстнемань ды раськень каштанчинь чикс. «Минек вейке уцясканок, вейке масторонок ды вейке Изнямонок! – мерсь сон. – Вечкевикс ветерант! Минь аштетяно кувалманк каштанчисэ. Ды тейсынек весементь, штобу тынь тень марявлинк оймеёжосонк. Свал палыця толонть вакссо комавтсынек прянок сетнень ледстнемга, кить эзть эря течинь чинтень, кить малавгавтсть Изнямонть фронттнэсэ, тылсэ, кепедсть масторонть войнадо мейле. Изницятнень поколениясь свал карми минек туртов невтемакс весемесэ – Чачома масторонтень алкуксонь вечкемасонть, важодеме маштомасонть ды паро ломанекс улемасонть.

Ломантне кортыть: эрьва поколениянть эсензэ войназо. Секс минек туртов сехте эрявиксэсь: изнямс кеженть каршо тюремасонть. Седеяк чарькодевицякс те кармась ней, специальной военной операциянть шкасто. Минек Верховной главнокомандующеесь, РФ-нь Президентэсь Владимир Владимирович Путин ёвтынзе героекс минек Отечествань весе ванстыцятнень.
Ды эрьва солдатонтень, весе минек армиянтень ней, кода Ине Отечественной войнань иетнестэяк, пек эряви минек лезксэсь. Сон истя жо эряви боецтнэнь малавиксэст туртов. Маень неть читнестэ седеяк пек маряви шкатнень ды поколениятнень сюлмось. 80 иеде икеле, 1943 иестэ, лиссь редявикс полавтома Ине Отечественной войнанть молемасо. Те ульнесь покш тюрематнень иекс:
Сталинградской, Курской, Кавказонть ды Днепранть кисэ тюрематне. Ноябрянь 2-це чистэ топодить 80 иеть Херсонской областень Каланчак посёлканть – Мордовиянть туртов братской райононть – фашисттнэнь эйстэ олякстомантень. Кода васоло 1943 иестэ, нейгак доброволецтнэ туить фронтов. Мордовиянь эрицятне, вишкинетнестэ саезь покштнес, кучить сыненст посылкат, сёрмат. Минек заводтнэ чинек-венек кемекстыть Тиринь масторонь оборонанть виензэ. Врачтне топавтыть долгост фронтонь маласо госпитальтнесэ. Панжадо седей марто васттано минек соотечественниктнень, сетнень, кить понгсть зыянс.

Кода сестэяк, ниленьгеменце иетнестэ, учотано сводкат передовойстэ, кулят фронтсто, ознотано боецтнэнь кисэ. Эрятано ды важодтяно тердеманть коряс: «Весемесь фронтонть туртов – весемесь Изнямонть туртов!» Минь содатано, тевенек виде, ды минь изнятано!»
Войнань иетнестэ фронтов туекшнесть Мордовиянь 246 тёжат цёрат ды тейтерть. Ине Отечественной войнасо маштовозь воинтнэнень кеврунгонтень путсть цецят. Сынст ледстизь чатьмонемань минутасо.
Митингенть прядовомадо мейле Изнямонь площадьсэнть ютавтовсь парад, конась алтазель Ине Изнямонь 78-це иетненень. Торжественной маршсо ютасть военнослужащейтнень, МЧС-нь ды Росгвардиянь сотрудниктнень, кадеттнэнь ды юнармеецтнэнь парадонь расчёттнэ. Теде мейле Изнямонь площадьсэнть ютавтовсь театрализованной невтема.

* * *
Изнямонь площадьсэ мероприятиятнеде мейле Саранскоень мемориальной калмолангсонть путовсть цецят «Скорбящая мать» мемориалонтень. Тосо ульнесь Мордовиянь Прявтось Артём Здунов. Сонзэ марто вейсэ маштовозтнень ледстизь специальной военной операциянь участниктне ды сынст семиятне, республикань министерстватнень ды ведомстватнень, Саранск ошонь округонь руководительтне, общественной ды ветеранонь организациятнень представительтне, республикань школань тонавтницятне.
Войнадо ледстнематне – те, васняяк, ломантнеде ледстнематне. Ютыть иеть, кементь иеть, ансяк эрицятнень ине тевест – Ине Отечественной войнасо Изнямось – свал кадови седейтнес. Те минек историясь – эрьва семиянь историясь, масторонь историясь.
Саранскоень госпитальтнесэ маштовозь воинтнэнь ледстизь чатьмонемань минутасо. Войнань весе участниктнень коряс служазель панихида.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».