Весе минь содатано, Мордовиясо ламо пингень перть ояксчисэ эрить эрьва кодат раськеть: эрзят, мокшот, рузт, татарт, чувашт ды лият. Эрьванть эсензэ, киньгак енов а молиця культуразо, коензэ-кирданзо ды келезэ. Ды те кодаяк а меши миненек чарькодемс вейкенек-вейкенек. Культурась ды келесь – эрьва раськенть сюпавчизэ ды сынст эряви ванстомс. Тень коряс минек республикасонть эйкакштнень марто моли покш важодема.

Истя, неть читнестэ Саранскоень 90-це № эйдень кужосо ютась «Пир на весь мир!» раськень ярсамопелень фестивалесь, косо эйкакштне тетяст-аваст марто анокстасть эрьва кодат каванямкат. Фестиваленть прявт тевезэ – ванстомс койтнень-кирдатнень, теемс ялгаксчинь сюлмот лия раськетнень марто.

Эряви евтамс, кенярксчинь инжетнень туртов анокстазель сюпав программа. Мероприятиянть лувсо гайгсть эрзянь, мокшонь, рузонь ды татаронь морот, эйкакштне мельспаросо евтнесть стихть, налксесть сценкат. Седе тов вишкинетне ды эйдень кужонь воспитательтне явовсть колмо группава: рузонь, эрзянь-мокшонь ды татаронь. Эрьва раськесь евтнесь раськень ярсамопельтнень историядост ды пидемань-панемань койтнеде.

Истя, рузтнэ евтнесть «Норовжорчт» булкинетнеде, сывелень прякинетнеде ды каравайденть. Эрзятне каванясть инжетнень овтонь лападо ды калонь ямдо, мокшотне жо – шонгарямдо (ямксонь кашадо) ды пачадо. Татаронь раськесь евтнесь, кода пидевить-паневить «перемячи», «токмач» ды «эчпочмак» раськень ярсамопельтне.

Меельцекс евтасынек, куш кодамо раськень культурань прявт пельксэкс лововить коень ярсамопельтне. Сынст вельде невтевить раськенть историязо, менталитетэзэ, коензэ. Ярсамопеленть вельде ломанентень максовить вийть, шумбрачи, мазычи, духовно-нравственной сюпавчи. А стяко улить истят валмеревкст: «Ули ярсамопель – ули эрямо», «Ярсамось-симемась ды эрямось яксить малацек».

Алена Артемьева

Фототне 90 № эйдень кужонть.