Вторник, марта 19, 2024
Важное



Нина Васильевна Царева эри Покш Манадыши велесэ, важодеме яки шабра Тетюши велев. Сон - фельдшерэнь-акушерэнь пунктонь прявт ды теке шкане медсестра.



- Тевем вечкса, - ёвтни Нина Васильевна. - Важодема чим ушодови рана валске ды прядови позда чокшне. Врачонь рецептэнь коряс сэредицятненень тейнян уколт.

Н.В.Царева медсестрань тевенть тонавтнизе Орданьбуень медучилищасо ды 1986 иестэ сонзэ прядомадо мейле медсестрань тевенть топавтсь васня Отяжелень мясокомбинатсо, мейле - Сабанцелень средней школасо. Ды свал важодсь ськамонзо. Косо эзь важоде, Нина Васильевнадо кортыть ансяк паро валсо.

Сон эрицятнень марто мукшны кель-вал. Эдь а стяко кортыть: паро валоськак леци.

- Минек медпунктсонть весемесь ули: эрьва кодат надобият. Ней коронавирусонь инфекциянть а нолдамга кирдтяно маскат, перчаткат, антисептикть, - ёвтни ФАП-нь прявтось Н.В.Царева. - Велесэнек истямо ормасо сэредсть кавто ломанть. Сынь ней пичкасть. Эйсэст лецясть Саранскойсэ.

- Тетюши велесэ эрить 279 ломанть, - полады Нина Васильевна. - 62 - од ломанть.

- Маласо шкастонть Тетюшинь ФАП-сь юты од зданияс, - ёвтни Покш Манадыши велень администрациянь прявтось А.В.Гурьянов.

- Зданиясь строяви «Здравоохранение» национальной проектэнть лувсо. Эйсэнзэ кармить ламо кабинетт.

ФАП-нь прявтонтень Нина Васильевна Цареванень пшкалить эрицятнестэ ламотне. Нина Васильевна киненьгак а отказакшны. Сон лезды. Кинень укол путы, кинь давлениянзо онкстасы, кинень надобият максы. Ды истя важоди уш комсьвейксэе иеть.

- Эзинь фатяяк, кода ютасть иетне. Меревельтькак таго ютамс ки, мон бу кочкавлия текень, - тешкстызе Нина Васильевна.

Пётр Зиновьев

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».