Ютазь недлясто Г. И. Сураев-Королев лемсэ «Келу» государственной фольклорной ансамблясь нолдась «Нарчаткадо ёвтнема» од проект. Те музыкальной спектакля, конась арсезель мокшонь эпосонть коряс. Нарчатка – те мокшонь виев ава, кона сисем пингеде теде икеле кармась мокшонь ушмантнэнь прявтокс ды тусь тюреме татаро-монголтнэнь каршо Мокша леенть чиресэ. Кеме обуця авась эзизе максо прянзо полонс, ды Батый ханось мерсь лемдемс саезь ошонть Нарчаткань лемсэ.
Спектаклянть режиссёрось – Андрей Ермолин, текстэнть ловнось Александр Перелогин, художественной руководителесь – Екатерина Модина, хормейстерэсь – Ирина Макейкина, хореографось – Ольга Лясина. Путовкссонть, «Келудонть» башка, ёрокчист невтизь «Мерема», «Виртеня», «Лейне» ансамблятне. Минек меленек коряс, истямо лувсо путозь спектаклясь карми вановомо, сонзэ юрс нолдазь од формат, неень шкань ёнкст. Ансяк улить лияткак мельть-арсемат. Ды сындест пек ламо. «Нарчаткадо ёвтнеманть» ламот шнызь, ламотне сялдызьгак. Сехте пек блогерэнть Николай Храмовонь лопасонзо, косо сон ёвтызе арсеманзо, конасонть а шны те путовксонть. Интернет-лопатнесэ ушодовсть пелькстамот, мелень ёвтамот. Эйстэдест зярыятнень макссынек.
Вана кода тешкстась Светлана Сураева-Королева: «Бути максомс питнейчи Нарчаткадо спектаклянтень, эряви ванкшномс сонзэ кавто ёндо: кода проект ды эряволь-арась эйзэнзэ совавтомс «Келу» ансамблянть. Кода проект, сон пек паро, мазый. «Келунть» коряс седе стака тевесь. Георгий Сураев-Королев теизе те коллективенть сень кисэ, штобу мокшонь-эрзянь ламо вайгельсэ морамось а ёмаволь минек эрямостонть, сонзэ эряви ванстомс, тонавтнемс, виевгавтомс. Пек шожда совавтомс эйзэст вешкемкат, барабант, сюро марто оршамопельть. Седе стака кемекстамс ды кастомс раськень партитуранть. Георгий Ивановичень материалонзо ваннозь, эряви тонавтнемс роботамо те материалонть марто, аволь полавтнемс сонзэ. «Келунтень» эряви молемс эсензэ киява. Секскак те проектэсь тензэ а эряви ды сон валгсты коллективенть профессиональной докачинзэ. «Келу» – те лемтеме тёжа музыканттнэнень памятник, конатне совавтызь эсь оймест мокшонь-эрзянь моротнес».
Лия мелезэ Ирина Беляковань: «Зяро вийть ды труд путозь! «Келу», тынь молодецт, поздоровт тенк!» Андрей Бочканов сёрмады истя: «Музыкальной ёнксонть коряс те спектаклясь монень пек вечкевсь. Хорось задачанзо топавтызе сядо процентс. Стакадояк стака вокальной произведениятне моразельть пек парсте. Сыненст овсе эзь меша хореографиясь. Кияк эзь пра оймевтеме…» Елизавета Пиксаева тешкстызе спектаклянть од форманзо: «Моротненень ды музыкантень эряви молемс эрямонть марто ве эскелькссэ, а эряви каназкалемс, кода стенасо ташто рамкатне. Ды тешкстаса, эрьва ломаненть эсензэ вановтозо!»
Арсетяно, те спектаклясь невтеви эштёяк, эдь бути ланганзо кортыть, сонзэ ваномо кармить само. Ансяк эрьванть кадови эсензэ мелезэ!
Марина Девятова