Июнень 8-це чистэ Отяжбуень Каменкасо, Троицкой кезэрень церькованть маласо, ютась «Пазось мартонок» духовной моронь фестивалесь.
Те чистэнть тешкставсь Иневанькс Троицянь покшчись. Орданьбуень ды Отяжбуень епископось Мелетий Отяжелень Андреевской кафедральной соборсо ютавтсь Пазонь литургия. Теде мейле поселкаванть Крестной ходсо весе сыргасть Каменканть енов. Тосо одс витневи-петневи Живоначальной Троицань ды Рождества Пресвятой Богородицань кезэрень церьковась.
Теде мейле вельмевтевиця Троицкой церькованть вакссо ушодовсь «Пазось мартонок» духовной моронь православной фестивалесь. Сон анокстазель Орданьбуень ды Отяжбуень епископонть Мелетиень баславамонзо ды «Талина» компаниянь Группатнень лездамост вельде. Покш концертсэнть морасть самодеятельной ды профессиональной артисттнэ.
Фестиваленть панжомадо икеле лембе поздоровт весе пурнавозтненень евтасть Отяжелень райононь прявтось К.Н. Константинов ды Орданьбуень ды Отяжбуень епископось Преосвященнейшей Мелетий, конатне весенень арсесть шумбрачи, сэтьме эрямо ды кемема паро сыця шкантень. Истя жо мероприятиясонть ульнесть «Талина» ГК-нь президентэсь В.С. Бирюков ды МР-нь Государственной Собраниянь депутатось М.Н. Подмарев.
– Фестивалесь ютавтови уш аволь васенцеде. Сонзэ вельде бажатано евтнемс койтнеде-кирдатнеде, культурань сюпавчитнеде, конат пингеде-пингес ульнесть покштянок-бабанок эрямосо. Паро улевель ванстомс неть койтнень, евтнемс сындест одтнэнень, кадомс тенст православной культуранть. Кемтяно, те фестивалесь поладови седе товгак, штобу тей сыця морамонь коллективтне пачтявольть духовной сюпавчитнеде. Пазось лездазо тенек те паро тевсэнть! – кортась Орданьбуень ды Отяжбуень епископось Мелетий.
Башка мель те чистэнть явовсь сетненень, кие тюри Тиринь масторонть кис. Сетненень, кие мартонок ды кие максызе эрямонзо эсь Отечестванть кис. Кие ванстсь минек, топавтсь ды топавты эсь долгонть специальной военной операциянь таркатнесэ.
СВО-нь участниктнень аваст ды доваст пельде кортасть Россиянь Героенть, Орданьбуень райононь Баеньбуесэ чачозенть Григорий воинэнть довазо – Елена Михайловна Слугина ды Россиянь Героенть (чавовозь), Отяжелень райононь Ушаковка велесэ чачозенть Алексей воинэнть авазо – Вера Васильевна Щукова.
Зярс Вера Васильевна ловнось «Не плачь ты, мама, обо мне» валморонть, сельведтне эзть кирдеве аволь ансяк аваломантнень, истя жо тесэ улиця цератненьгак.
Фестивалень программанть панжизе Отяжелень Культурань куншкакуронь методистэсь Ольга Колемасова «Небесная рать» моросонть. Лембестэ пурнавозтне вастызь СВО-нь таркатнев концерт марто ардтницянть Дарья Ушаковань. Эзть жаля эсь цяпамотнень Отяжелестэ Владимир Титяпкиннэнь. Владимир моры, кода кортыть, эсензэ туртов, ансяк вечкеви весенень.
Эсь ерокчисэнть ваныцятнень кенярдовтынзе МР-нь Госсобраниянь депутатось Михаил Подмарев. Сынст триось морызе «Брат» моронть.
О. Евгений Самаркин ламо иень перть служи церьковасо. Сон умок уш морси Пазонь морот. Сермады морот сонськак, конатнесэ алкуксонь проповедь.
Сценанть вакссо важодсть декоративно-прикладной творчествань мастертнэнь выставкаст, Орданьбуень епархиянь Ф.Ушаков лемсэ православной спортонь клубонь тонавтницятне невтсть тюремань лувт.
Фестивалень весе участниктне казевсть дипломсо ды казнесэ.
Весе инжетне каванявсть штюрьбадо, кашадо ды чайде, менель ало вейсэнь ярсамось пек тантеель!
Фототне Сергей ЧИЖЕНКОВОНЬ.