Кизэнь мазычитне седе пек рядявить велесэ улемстэ, вирь маласо куринкатнева ютамсто. Покш Березникень райононь Пермезь велев ардомсто, пандо прясто варштамсто, сельмс сеске каяви лиятнень енов а молиця, седейс токиця артовкс. Теке мерят, велесь вейсэндяви менеленть марто!
Тешкстасынек, тосо улить ламо мазый таркат, вейкесь юткстост – республикань келес содавикс Инерка эрькесь, виртнесэ касыть ягодат ды пангот. Свал кенярдан Пермезь велев самсто, тосо эриця ялгам марто вастовомсто.
Веленть куншкакуров пачкодемстэ неяви: эрямось тесэ юты стамбарнэ. Виде, аволь кода советэнь ды седе икелень шкатнестэ, ялатеке редяви тосонь эрицятне бажить ванстомс ды паролгавтомс тиринь таркаст.
Те велентень эрьва сыцянть сельмс каяви Ине Отечественной войнасо маштовозтненень алтазь парсте теезь кеврунгось, маласонзо – масторонь идицятнень лемест сермадовкс марто стендэсь. Ламот юткстост кадовсть тюремань паксятнес, максызь эрямост минек валдо эрямонок кисэ.
Икелень церькованть эйстэ аволь васоло те велень эрицятне вейсэ лия лездыцятнень, Пазнэнь кемицятнень марто стявтсть од ды мазый храм. Вакссонзо тееви башка здания, косо карми улеме трапезной. Тесэнь ломантнень эрямост шождалгавтомга панжозь лавка, тосо микшневи весе эрявиксэсь.
Тесэ ульнесь школа…
Неень шкасто Пермезь велень эрицятне весе талновтыця кевкстемаст марто сеедьстэ сыть кавто этажсо зданиянтень, косо икеле ульнесь школась. Ледстневи, аволь весть савсь тосо улемс, вастовомс ды кортамс тонавтыцянь коллективенть марто, сермадомс ероков тонавтницятнеде. Ней жо сындест евтнить васенце этажсо стендтнэ, вечкезь пурназь весе выпусктнень фотографиятне…
Течи те зданиясонть вейс пурнавсть истят учреждениятне, кода Пермезь велень поселениянь администрациясь (ков совить эште Специальной поселкась, Од Пермезь ды Нерлей велетне), библиотекась. Теке зданиясонть муевсть таркат ФАП-тень ды почтань отделениянтень.
Видькстан, ульнесь покш мелем вастовомс фельдшерско-акушерской пунктонь прявтонть Максим Белоглазов марто, ансяк эзь топавтово. Фельдшерэсь те чистэнть важодсь Комсомольской больницянь Покш Березникень поликлиникань отделениясонть. Од церась важоди кавто таркава. Кода мерсть те велень эрицятне, Максим Алексеевич куш аволь пек умок сась тей важодеме, тевензэ топавты парсте, ков виензэ сатыть, лезды неть велетнень эрицятненень, бути эряви, надобиятненьгак пачтясынзе тенст видьстэ кудос.
Неень шкане республикань малав аволь эрьва велесэ ули колмо важодиця марто почтань отделения. Пермезь велесэ те паро коесь ванстовсь! Почтальонкань тевтнень топавтыть Нина Иванова ды Ольга Кирюшкина. Прявтокс важоди Светлана Косынкина.
Школань зданиясь стявтозель эште советэнь шкатнестэ. Лангс ваномс сон кеме ды нардев, зярдо-бути тесэ ульнесть ламо эйкакшт. Ней те школань прядыцятне косо ансяк а важодить.
Неявикс таркасо башка стенд, сон алтазь специальной военной операциянь участниктнень валдо лемест ледстямонтень, кить эрясть те велесэнть, тонавтнесть те школасонть. Неть: Николай Яковлевич Горохов ды Василий Геннадьевич Агейкин. Покштояк покш ризксэнтень неть цератне маштовсть масторонок сэтьмечинзэ ванстомсто…
Вера, Надежда, Любовь
Кодат апак учонь тевть эрямосонок ансяк а эрсить! Пермезь велень эрицятнень – Иван Илларионович ды Мария Максимовна Добкинтнэнь ламо эйкакшонь триця семиясост кавтаськеть уш ульнесть, весе республиканть дивавтызь, кода шкань ютазь авась чачтсь колмо тейтерькинеть. Сынь ульнесть пек вишкинеть сталмонь коряс, Мария Максимовнань аламо шкань ютазь нолдызь кудов, эйкакштнень жо кадызь тоско. Врачтне вансть шумбрачист мельга.
Зярдо авась сась эйкакшонзо содавтомо, те больницясонть важодицясь яволявтсь тензэ: «Тейтеренк лемдинек Вера, Надежда, Любовь лемтнесэ!» Теньсэ пек дивавтызь аванть. Эдь сонзэ эйкакштнень ютксо уш ульнесть Вера ды Люба. Истя кадовсть семиясост кавто Верат ды кавто Любат. Иван ды Мария Добкинтнэ трясть-кастсть кемень эйкакшт, юткстост эрьвась муизе эрямонь кинзэ. Вейке Любась ней Пермезь велень поселениянь прявт.
Кода кортыть те велень эрицятне, Любовь Ивановна те тевсэнть прок пинге важодсь. Ули эйсэнзэ од тевень ушодыцянь ды перьканзо ламо лездыцянь пурныцянь ерокчи.
Куш аволь пек умок сон те таркасонть, ялатеке улить паро тевензэ. Невтемакс, меельце шкасто одкстомтозельть Од Пермезь ды Нерлей велетнес китне, ванськавтозель Пермезь велень калмазыресь ды истя седе тов. Велень прявтонть ушодксонзо коряс Пермезень эрицятнень туртов социальной сетенть вельде теезь группа, косо сермадовить яволявтоматне, евтавить мельтне-арсематне. Сонзэ вельде куроксто ванкшновить ламо эрьва кодат кевкстематне, конатне талновтыть тосонь эрицятнень. Те тевенть топавтомасо, Любовь Ивановнань валонзо коряс, покш лезкс тензэ максы сынст велесэ чачозесь-касозесь Инна Лизикова. Инна Владимировна свал анок лездамс велень кенярксчитнень ютавтомсто, покш тевтненень анокстамсто.
Кадык седе ламо ломанть велявтыть тиринь велев
Видькстан, аволь весть савсь тень улемс кезэрень те таркасонть ды свал редян полавтомат. Тесэ, кода масторонь ламо лия велетнесэяк, эрицятне иестэ иес аламолгадыть. Вейкесь оймавты: икелень эрицятнень эйкакшост ды нуцькаст седе сеедьстэ кармасть сакшномо покштяст-бабаст, тетяст-аваст юртнэнь содавтомо, сынст кудотнень одкстомтомо.
Истят семиятнень ютксто – Александр ды Нина Карьгинтнэ, Анатолий ды Людмила Юртайкинтнэ, кить пенсияв лисемадо мейле, эрямо таркакс кочкизь Пермезь веленть. Сынь, ков виест сатыть лездыть велень ломантнень эрямост шождалгавтомасо, кодамо кевкстема марто ансяк а пшкалить тенст те велень эрицятне. Теде башка, тов велявтсть эрямо од семият – Николай ды Людмила Чикнайкинтнэ, Ирина ды Сергей Макаровтне.
Ледстясынек, Нина Карьгинань (Ромашкинань) весе раськезэ ламо шкань перть кезэрень те эрзянь велестэнть. Тетязо, Иван Прокопьевич, Ине Отечественной войнань участник, фронтсто самодо мейле ламо иень перть ульнесь тонавтыцякс Пермезь велень средней школасо. Авазо, Варвара Трофимовна, мирдензэ ладсо истя жо ламо иень перть важодсь школасо тонавтыцякс.
Кемеви, сынст лангс ванозь, эште ламо семият сыть эрямо Пермезев, кармить вельмевтеме тетяст-аваст, покштяст-бабаст кудоюрттнэнь. Эдь ансяк истя ванстовить минек велетне, чачома-касома таркатне.
Неень шкане Пермезь велесэ кудотнеде – 525, эрямо таркань кемекстамонь коряс сермадстозь (пропискаст ули) – 263 эрицят, ютксост 18 трудонь ветерант. Виде, течи велесэнть седе ламотне сыре ломанть. Кувака пингень эрицянтень, Ине Отечественной войнань участникень довантень Ольга Петровна Сыроваткинанень тедеде топодить 95 иеть.
Волонтерось, Покш Березникень райсоветэнь депутатось Татьяна Калинина: «Покш Березникень муниципальной райононь велетнесэ эрицятнень ютксто ламот бажить лездамс специальной военной операциянь участниктненень, кинь ков сатыть виест.
Башка мель те тевентень явить Пермезь велень эрицятне, сынь свал анокт максомс лезкс кода передовойсэ улезтненень, истя жо госпитальсэ шумбрачист витицятнененьгак».
Валентина Юдина